ОТБАСЫ – ҚОҒАМНЫҢ ТҰРАҚТЫЛЫҒЫНЫҢ ТІРЕГІ
Лаура Мұхаметқали, «Қарқара» газеті.
Қоғамның қуаты – отбасының беріктігінде. Әрбір шаңырақтың шаттығы мен берекесі мемлекет тұрақтылығының негізін қалайды. Сондықтан отбасы институтын нығайту – ел болашағына салынған ең қастерлі инвестициялардың бірі. Осы ізгі мақсат жолында ауданда нәтижелі еңбек етіп келе жатқан «Кеген аудандық жұмыспен қамту және әлеуметтік бағдарламалар бөлімі» мемлекеттік мекемесінің «Отбасын қолдау орталығы» коммуналдық мемлекеттік мекемесі тұрғындардың әлеуметтік әл-ауқатын арттыруға бағытталған маңызды жұмыстарды жүйелі жүзеге асырып келеді. Орталыққа басшылық етіп отырған директор Біләл Әукенұлы Мәсімбаев әлеуметтік саланың жауапкершілігі мол қызметін кәсіби біліктілікпен ұштастырып, халықпен тығыз байланыс орнатуға басымдық беріп келеді. Оның жетекшілігімен орталықта отбасы құндылықтарын нығайту, әлеуметтік осал топтарды қолдау, құқықтық және психологиялық көмек көрсету, азаматтарды қоғамға бейімдеу бағытында кешенді жұмыстар атқарылуда. Әрбір тұрғынның мәселесіне бейжай қарамай, нақты нәтижеге қол жеткізуді мақсат еткен ұжым аудан тұрғындарының сеніміне ие болуда.
2025 жылдың 20 қаңтарында ресми түрде ашылған орталық аз уақыт ішінде халыққа әлеуметтік қолдау көрсетудің тиімді моделін қалыптастырып, қиын жағдайға тап болған азаматтарға жан-жақты көмек беретін маңызды мекемеге айналды. Бүгінде мұнда 13 штаттық қызметкер еңбек етіп, аудан тұрғындарының игілігі жолында аянбай қызмет атқаруда.
Адамзат өркениетінің алтын арқауы – отбасы. Ұлттың ұстыны, қоғамның іргетасы саналатын отбасының берекесі мен бірлігі– елдің ертеңіне деген сенімнің кепілі. Сондықтан мемлекет тарапынан отбасы институтын нығайтуға, әлеуметтік осал топтарға қолдау көрсетуге, қиын жағдайға тап болған азаматтарға жан-жақты көмек ұйымдастыруға ерекше көңіл бөлініп келеді. Осы бағыттағы маңызды бастамалардың бірі – ауданда 2025 жылдың 20 қаңтарында өз жұмысын бастаған «Отбасын қолдау орталығы» коммуналдық мемлекеттік мекемесі. Аз ғана уақыт ішінде орталық халықтың әлеуметтік әл-ауқатын арттыруға, азаматтардың құқықтық сауатын көтеруге және қиын өмірлік жағдайдағы отбасыларға нақты қолдау көрсетуге бағытталған кешенді жұмыстарымен көпшіліктің сеніміне ие болды. Орталықтың басты мақсаты – отбасы құндылықтарын дәріптеу, қоғамдағы татулық пен тұрақтылықты нығайту, әлеуметтік тәуекелдердің алдын алу және әрбір азаматтың өмір сапасын жақсартуға ықпал ету. Осы мақсатта мекеме тек кеңес берумен ғана шектелмей, нақты нәтижеге бағытталған жұмыстарды жүйелі түрде жүргізіп келеді.
Әлеуметтік мәселелердің алдын алу мақсатында аудан көлемінде 221 адамнан құралған мобильді топ жұмыс істейді. Оның құрамына құқық қорғау органдарының қызметкерлері, денсаулық сақтау және білім беру саласының мамандары, ауылдық округ әкімдіктерінің өкілдері енгізілген. Мұндай ведомствоаралық ынтымақтастық қиын жағдайдағы азаматтарға дер кезінде көмек көрсетіп, олардың мәселесін жан-жақты шешуге мүмкіндік береді.
Қазіргі цифрлық дәуірде әлеуметтік қызмет көрсету де жаңа деңгейге көтерілуде. Осы орайда «FSM Social» мобильді қосымшасы арқылы азаматтардың өтініштері қабылданып, қажетті қолдау көрсетілуде. 2025 жылы жүйеде жүзден астам өтініш тіркеліп, олардың басым бөлігі бойынша психологиялық, құқықтық және медициналық көмек ұйымдастырылды. Ал 2026 жылдың алғашқы жарты жылдығында да бұл жұмыс жалғасып, ондаған азаматтың мәселесі оң шешімін тапты.
«Отбасының цифрлық картасы» жобасы аясында аудан тұрғындарының әлеуметтік жағдайына тұрақты мониторинг жүргізілуде. Бұл бастама нақты көмекке мұқтаж азаматтарды анықтап, олардың тұрмысын жақсартуға бағытталған мемлекеттік қолдауды тиімді ұйымдастыруға жол ашып отыр. Әрбір отбасының жағдайын зерделеу арқылы әлеуметтік тәуекелдердің алдын алу және қолдау шараларын дер кезінде көрсету жүзеге асырылуда. Орталық қызметінің маңызды бағыттарының бірі – құқықтық көмек көрсету. «Қарызсыз қоғам» жобасы аясында арнайы даярлықтан өткен заңгер тұрғындарға қаржылық сауаттылық пен заң мәселелері бойынша тегін кеңес береді. Бүгінде бұл қызмет Битрикс байланыс жүйесі арқылы жүргізіліп, азаматтардың өтініштерін жедел қабылдау мен өңдеуге мүмкіндік жасап отыр. Қайырымдылық – қоғамның мейірімділік келбеті. Осы қағиданы ұстанған орталық демеушілермен бірлесіп көптеген игі істерді жүзеге асырды. Әлеуметтік осал отбасыларға азық-түлік себеттері, мектеп оқушыларына оқу құралдары мен аяқ киімдер, балаларға мерекелік сыйлықтар табысталып келеді. Халықаралық балаларды қорғау күні қарсаңында ұйымдастырылған қайырымдылық акциялары ерекше балалар мен тұрмысы төмен отбасылардың бүлдіршіндеріне қуаныш сыйлады. Әсіресе өмірлік қиын жағдайға тап болған азаматтарға көрсетілген нақты көмектердің әлеуметтік маңызы зор. Ішімдікке тәуелді ана мен оның қараусыз қалған балаларына дер кезінде психологиялық көмек көрсетіліп, арнайы емдеу мекемесіне орналастырылуы– әлеуметтік қызметтің адам тағдырын өзгерте алатындығының жарқын көрінісі. Сол сияқты жалғызбасты зейнеткердің тұрғын үй мәселесінің оң шешімін тауып, баспаналы болуы мемлекет қамқорлығының нақты нәтижесі екенін көрсетеді.
Психикалық ауытқуы бар азаматтың қоғамға қауіп төндіруінің алдын алып, арнайы медициналық мекемеге орналастырылуы да мобильді топ жұмысының тиімділігін дәлелдейді. Мұндай кешенді жұмыстар қоғамдағы қауіпсіздікті қамтамасыз етумен қатар, азаматтардың денсаулығы мен өмір сапасын жақсартуға бағытталған.
Бүгінде «Отбасын қолдау орталығы» тек әлеуметтік мекеме ғана емес, халықтың сенімді серігіне айналып келеді. Әрбір отбасының бақыты мен берекесі үшін атқарылып жатқан жүйелі жұмыстар аудан тұрғындарының мемлекетке деген сенімін нығайтып, әлеуметтік тұрақтылықтың сақталуына өз үлесін қосуда. Қазақ халқы «Отан – отбасынан басталады» дейді. Расында да, әрбір шаңырақтың шаттығы – тұтас елдің қуаты. Сондықтан отбасы институтын нығайтуға бағытталған мұндай игі бастамалар қоғамның рухани тұтастығын қалыптастырып, келешек ұрпақтың жарқын болашағына қызмет етеді.
Берекелі отбасы – баянды мемлекет. Ал сол берекені сақтап, қиын сәтте сүйеніш болып жүрген әлеуметтік қызметкерлердің еңбегі әрдайым құрметке лайық. Халық игілігі жолындағы осындай ізгі істер алдағы уақытта да жалғасын тауып, әр шаңыраққа шаттық пен сенім сыйлай беретініне күмән жоқ.
