АУЫЛ халқы ГАЗЕТ ОҚИДЫ

Қазіргі толассыз ақпарат ғасырында бұқаралық ақпарат құралдарының рөлі ерекше. Жаңалық атаулыны жылдам жариялайтын сайттар көбейген кезде «қағаз газет құриды» дегенді де естігенбіз. Бірақ әзірге республикалық, облыстық және аудандық деңгейдегі газеттер үзіліссіз шығып жатыр. Бұл да болса мемлекеттің қамқорлығы арқасында. Халықтың рухани азығына айналған мерзімді басылым, оның ішінде аудандық газеттердің тыныс- тіршілігі қандай? Аудан тұрғындарының газетке деген ықыласы қаншалықты?
Мен өзім алғаш аудандық газетке мектеп бітіргеннен кейін фототілші болып орналастым. Осы ортада пісіп- жетіліп, журналистік жоғары білім алып, газеттің тыныс- тіршілігіне етене араластым. Бүгінде осы басылымның бас редакторымын. Осы аралықта аудандық газет қаншама қиындықтан өтті. Еліміздегі барлық аудандағы басылымдардың жағдайы бір- бірімен шамалас. Басылым бүгінде рухани шығармашылық орта, қаламгерлердің алғашқы шыңдалу мектебі. Аудан тұрмыс- тіршілігінің шынайы айнасы бола білді. Қ оғамда коммуникация мен технология күнде өзгергенімен, рухани азық беретін құндылықтар өзгермейді. Ғаламтор пайда болғалы ақпараттық жүйе заманауи техника мен технологияға көшті.
Қазір ақпарат деген әлеуметтік желі мен теледидарда ағылып жатыр. Еліміздегі біраз басылымдар сайт түріндегі нұсқаға көшті. Десек те, газет- журнал, кітапты қағаз түрінде шығарудың маңызы зор.
Бізді әлем деңгейіндегі өркениет өріне сүйреп шығаратын – рухани құндылықтарымыз. Рухани құндылық дегеніміз – кітап, газет, журнал. Қала туралы айтпайын, бірақ ауыл жұртының әлі де газет оқуға кұштарлығы азайған жоқ. Қағаз газетті сақтауға болады. Оның өзінің ерекшелігі бар.
Газет тек қана ақпарат беруші емес, рухани азық. Газет оқыған адам өзіне керегін алады. Сондықтан газетке қазірден бастап көңіл бөліп, оны әрі қарай дамуына үлес қосуымыз керек. Енді аудандық газеттің жай- күйіне тоқталатын болсам, интернет желісі күшейгелі бері басылымға жазылу саны да азайды. Бұрын 14- 15 адам жұмыс істейтін басылымдағы қызметкерлер саны екі- үш есеге дейін қысқарды. «Қарқара» газетін ауданының тынысы десе де болады.
Бүгінде аудандық басылымның ахуалы түзеліп, өмір ағысымен қатар жылжып келеді. Дегенмен шешілуі тиіс біраз түйткілді мәселелердің бар екені де рас. Газет жеке меншікке өткеннен кейін біраз қиындықтармен бетпе- бет келдік. Осы орайда аудандық газеттерге берілетін мемлекеттік тапсырыс мәселесін бір жүйеге келтірсе деген ұсынысымыз бар. Өйткені басылым аудан әкімінің жұмысынан бөлек, Президенттің, Үкіметтің де жұмысын насихаттайды. Сондықтан аудандық газетке қолдау көрсетілсе дейміз.
Баяғыда «Гүлденсе ауыл – гүлденеміз бәріміз» деп жырлаушы едік. Сол сөз әлі де мәнін жоғалтқан жоқ. Ауылдың гүлденуіне аудандық басылымдардың қосар үлесі мол. Құрметті оқырмандар 2025 жылға жазылу жүргізіліп жатыр. Аудан айнасы «Қарқара» газетіне жазылуға асығыңыздар, сіздердің қолдаударыңыз бізге ауадай қажет. Ауданымыздағы барлық білім- ошақтарына, мектеп кітапханашыларына, денсаулық сақтау мекемелеріне, ауыл әкімдеріне, мекеме басшыларына алғыс айта отырып, газетіміз үйлерініңіздің төрінен табылсын деген ниеттеміз. Ендеше, ауылдың рухани азығы болған – аудан баспасөзіне жазылуға асығайық ағайын.
Ғани БЕЙҚҰТБАЙ,
«Қарқара» газетінің
директор – бас редакторы.