Райымбек ауданының әкімі болып Дастан Құдабаев сайланды
Алматы облысының әкімі Марат Сұлтанғазиев Райымбек ауданының активіне жаңадан сайланған аудан әкімі Дастан Сұлтанмұратұлы Құдабаевты таныстырды.
Аталған тағайындау 2025 жылғы 3 тамызда өткен сайлаудың қорытындысы негізінде жүзеге асты. Сайлау күні аудан аумағындағы 24 сайлау учаскесінде дауыс беру ұйымдастырылып, ол сағат 20:00-де аяқталды. Барлығы 19 707 сайлаушының 70,3 пайызы (13 854 адам) қатысып, өз таңдауын жасады. Үміткерлер ретінде бір кандидат «AMANAT» партиясынан, екеуі өзін-өзі ұсынған азаматтар болды. Дауыс беру нәтижесінде «AMANAT» партиясынан ұсынылған кандидат Дастан Сұлтанмұратұлы Құдабаев 9626 дауыс (69,5%) жинап, жеңіске жетті. Бұл туралы Райымбек аудандық аумақтық сайлау комиссиясының төрағасы Айдын Бексұлтанов мәлімдеді.
Дастан Құдабаев 1971 жылы дүниеге келген. 1993 жылы Алматы зооветеринарлық институтын «зоотехния» мамандығы бойынша тәмамдаған. Еңбек жолын сол жылы «Шалкөде» шаруа қожалығында зоотехник болып бастаған. Мемлекеттік қызметке 2008 жылы Шалкөде ауылдық округі әкімі аппаратының бас маманы ретінде қабылданған.
Әр жылдары Қарасаз және Шалкөде ауылдық округтерінің әкімі, Райымбек пен Кеген аудандары әкімдерінің орынбасары, сондай-ақ облыстық ауыл шаруашылығы басқармасының басшысы қызметтерін атқарған. 2023 жылдан бастап Ұйғыр ауданы әкімінің орынбасары лауазымын атқарып келді.
Облыс әкімі Марат Сұлтанғазиев жаңа әкімнің мол тәжірибесі мен өңірдің мәселелеріне терең бойлай алатын қабілетіне назар аударып, оның ауданның әлеуметтік-экономикалық дамуына сүбелі үлес қосатынына сенім білдірді.
