Жиын өтті

Жуырда аудандық мәдениет үйінде Кеген ауылының бас жоспарын талқылауға арналған маңызды жиын өтті. Жиынға ауыл тұрғындары, ардагерлер, қоғамдық кеңес мүшелері, салалық мекеме басшылары мен мамандар қатысты. Көтерілген мәселе – өңірдің болашағы мен дамуына бағытталған ауқымды жобалар кешені болды.
Ауылдың даму келешегіне арналған бас жоспар–бұл тек құрылыс картасы ғана емес, халық үшін жайлы орта қалыптастырудың, әлеуметтік инфрақұрылымды жаңартудың, экономикалық серпіліс жасаудың басты құжаты. Жобаның негізгі мақсаты – Кеген ауылының тұрмыс сапасын арттыру, туризм мен логистиканы дамыту арқылы өңірдің әлеуетін көтеру, сондай-ақ шекаралық аймақ ретінде стратегиялық маңызын күшейту.
Жиын барысында «Қолдау» ЖШС-нің жетекші архитекторлары Махсут Рүстем мен Мұқанов Қанат ауылдың бас жоспарын жан-жақты түсіндіріп берді. Жоба бойынша алдағы он жыл ішінде Кегеннің әлеуметтік-экономикалық картасы жаңаша сипат алмақ. Бұл жоспар бойынша тұрғын үй құрылысы, жол және көлік желілері, инженерлік инфрақұрылым, жасыл аймақтар, демалыс орындары және туристік нысандар орналасуы қайта қаралады.
Аудан әкімі Нұрбақыт Теңізбаев жиын соңында сөз сөйлеп, Кегеннің болашағы үшін бұл жоспардың маңыздылығына тоқталды. Ол жобаның кей тұстарын толықтырып, нақты ұсыныстар мен тапсырмалар берді. Ауылдың жылдан жылға халық саны азайып келе жатқанын ескеріп, бұл үрдісті тоқтату үшін туризм мен логистиканы дамыту – басты бағыттардың бірі екенін жиын барысында аталып өтті.
Тұрғындар да өз кезектерінде ұсыныс-пікірлерін білдіріп, қолдауларын жеткізді. Алдағы уақытта талқыланған бас жоспар бекітіліп, кезең- кезеңімен іске асырылмақ. Бұл – аудан орталығының жаңа келбетін қалыптастыруға бағытталған нақты қадам.

Лаура Қарасартова.