Жүлделі 3 орынды қанжығалады
Кешегінің сарқыншағы, бүгінге үлгі болып отырған ата – әжелеріміз берекенің бастауы, шаңырақты ұйытқысы болып отыр. Шаңырақтың ғана емес елдің бірлігін бекемдеп, тілеуін тілеп, ақ батасымен елімізді өркендетіп отырған жайы бар. Ел болашағына алаңдап, перзентінің қамын жеп, отбасының бақытын үстем етіп отырған аналарымыз жетерлік. Ақ ниеті ақ қардай әппақ ақ жаулықты әжелеріміз ақ пейілін асқақтатып, ел керегесін кемелдендіріп, бақыттың баспалдағын бағамдап, шаңырақтың шаттығын кіргізіп, шамын жарқыратып отырғаны бүгінгі бейбіт күннің шуағы. Иә, бейбіт таң ақ тілеумен атып, батар күн бақытын төгуде. Әр шаңырақта бақыттың бесігін тербеткен ақ әжелеріміз көненің көзі, өткеннің сарқыншағындай. Сондай ақ жаулығын желбіретіп, жүрегімен елге бақыт тілеп жүрген әженің бірі Оразбаева Майра 1949 жылы Нарынқол ауданы, Шәлкөде ауылында дүниеге келген. 1956 жылы 1 сыныпқа қабылданып, мектеп қабырғасында оқып жүргенде ақиық ақын Мұқағали Мақатаевтан ән сабағынан дәріс алған. Оқушы кезінде-ақ көркемөнерпаздар үйірмесіне қатысып, талай байқауға қатысқан. Жастайынан өнерге бейім болған. 1966 жылы мектепті аяқтағаннан кейін, колхоз жұмысына белсене араласты. Жұмыс істей жүріп отағасы Оразов Дихан атамен отау құрып, екеуі 3 ұл 5 қыз өсіріп, тәрбиелеген. Ұл-қыздары бүгінгі күні әр салада қызмет істеп, еңбек етіп жүр. Дихан атамыз 2018 жылы өмірден өтті. Майра апамыз ұл қыздарынан көрген 20 немере 15 шөберенің қызығына батып, айналып-толғануда.
Атқарған еңбегінің арқасында «Еңбек ардагері» медалінің иегері болды. Көптеген Құрмет грамоталар мен Алғыс хаттармен марапатталған.
Еңбек демалысына шыққаннан бері, қоғамдық жұмысқа белсене араласып келеді. Қарқара ауылында «Ақ әжелер» ансамбльнің және аналар кеңесінің белсенді мүшесі. Ауылдық береке-бірлігінің сақталуына, жас отбасылардың некесінің берік болуына өзіндік үлесін қосуда. Ауылдық аналар кеңесі мен «Ақ әжелер» ансанбілі үнемі ауылдың берекесін ұйытып, ынтымағын нығайтып келеді. Жас отбасылар мен жастарға, жас келіндерге ақыл-кеңесін беріп, жол көрсетіп отырады.
Майра Оразбайқызы 2023 жылы аудандық «Асыл әжем» байқауынаң бас жүлде иегері болды.Үстіміздегі жылы обылыста өткен Қазақстан Халқы ассамблеясы жанындағы аналар кеңесінің «Мәдниетті ана – мәдениетті ұлт» жобасы аясында өткен «Жылылық күннің көзінде – тәрбие әженің сөзінде» атты байқауда жүлделі 3 орынға ие болып, ауданымыздың мәртебесін көтерді. Бойына салт-дәстүр мен қазақилықты жиған әже Майра Оразбайқызының отбасына амандық, деніне саулық, тек жақсылық тілейміз. Ауыл халқының беріктігін сақтап, ақ жаулығынан әр кетпей, жас өскінге батасын беріп, ұрпағыңызбен мың жасаңыз демекпіз.
Л. Мұхаметқали.
