ОБЛЫСТЫҚ ТУРНИР ӨТТІ

1387

Кеген аудандық спорттық-сауықтыру кешенінде қазақ күресінен Қазақ спорт және туризм академиясының аға оқытушысы, білікті бапкер, Алматы қаласындағы қазақ күресі федерациясының вице-президенті Рысов Мақсат Айтпанбетұлын еске түсіруге арналған 2011-2012 жылы туылған жасөсіпірімдер арасында Алматы облысының ашық біріншілігі болып өтті. Жарысқа Жетісу облысынан, Алматы, Талдықорған қаласынан және облыстың аудандарынан жалпы 13 команда, 200-ден аса жасөспірім палуандар қатысты. Салтанатты ашылысында Кеген ауданы әкімінің орынбасары Мұхтар Батырханұлы жас палуандарға сәттілік тіледі. Спорт ардагері, ұлағатты ұстаз, ақын Шеризат Мекебаев арнау өлеңін оқыды.

Рысов Мақсат Айтпанбетұлы Кеген ауылының 1970 жылғы түлегі. Кеген қазақ орта мектебін, Алматы қаласындағы спорт және дене шынықтыру институтын үздік бітірді. Жастайынан спортпен айналысқан, Отан алдындағы борышын абыройлы өтеген, білімді, білікті, қағылез, талапты, зерек әрі еңбекқор азамат институттан кейін сол жоғары оқу ордасында қазақ күресі кафедрасына оқытушы болып қалдырылды. Қазіргі Қазақ спорт және туризм академиясының аға оқытушысы бола жүріп Алматы қаласының қазақ күресінен федерациясының ашылуына ұйытқы болды. Оның негізін қалады. Тынбай еңбектен жүріп қазақ күресінің жаңа форматта жасалуына, әлемдік деңгейде біріншілік болып өтуіне белсене араласқан бірден-бір спортшы маман ретінде танылды. Жаңашыл, бастамашыл, іскер азамат спорт академиясының аға оқытушысы ретінде, білікті бапкер ретінде артына ізін қалдырды. Көптеген шәкірттерін тәрбиеледі. Еліміздің мақтанышына айналған спорт саңлақтарына боз кілемде белдесуді үйреткен ұлағатты ұстазы болып қалды.

Екі күнге созылған жарыстың қортындысымен әр түрлі салмақ дәрежесінде Қ. Ақбар, А. Азатбай, Н. Сұлтан, А. Болат, Х. Көлдібаев, Ә. Рыскелді, А. Айтпанбет, А. Азат, Н. Қойшыбай чемпион атанды. З. Сейітқазы, Ә. Сәкен, Н. Айқын, А. Жойберген, О. Ғалым, Е. Жұман, Е. Тілеш, Б. Нұрмұханов, А. Серік, Б. Бекмұханбет, Б. Кенжебек, А. Төлеуов, Ж. Марат, Ұ. Болтанов, Б. Көлібаев, Е. Серікұлы, Ж. Аман, Д. Дүйсен 2 – 3 орыннан көрінді. Жеңімпаздарға облыстық спорт және денен шынықтыру басқармасының медалдары, дипломдары табыс етілді.

                                                                     Қанат Біржансал,

                                                                          Кеген ауданы.