Кеген ауданы әкімінің міндетін атқарушы Кеңес Қабылбековтың Жеңіс күні мерекесіне орай аудан тұрғындарын құттықтауы

1953

Құрметті аудан тұрғындары!

Сіздерді Жеңіс күні мерекесімен шын жүрегіммен құттықтаймын!

Міне, жылжыған жылдар аясында екінші дүниежүзілік соғыстағы Жеңіс жалауының желбірегеніне 78 жыл толып отыр. Ел мен жерді қайғы, қасіретке душар еткен сол бір соғыстың аяқталғанына ғасырға жуық уақыт болыпты. Рас, 1418 күн мен түнге созылған сұрапыл соғыс ел тарихына жазылып қалды. Сын сағатта, ел мен жердің тағдыры таразы басына түскен шақта ер азаматтарымыз, жауынгер жерлестеріміз оқ пен оттың ортасында болды. Кеген өңірінен 3 мыңнан аса жерлестеріміз майданға аттанса, солардың жартысынан астамы туған жерлеріне қайта оралған жоқ. Хабар-ошарсыз кеткендері қаншама?!

Өздеріңіз жақсы білесіздер, неміс фашистері Кеңес Одағына шабуыл жасап, бұл соғыс төрт жылға созылып Жеңіспен аяқталды. Биыл Жеңістің 78 жылдығы. Осынау сұрапыл соғысқа Қазақстаннан 1 миллион 200 мың адам қатысты. Соның ішінде алты жүз мың жауынгер туған жеріне қайтып оралмады. Біреу баласынан, біреу жарынан, енді біреулер әкесінен, бауырынан айырылды. Бұл соғыстың жанымызға түсірген жарасы аз болған жоқ. Ежелден елі мен жеріне қорған болып, намысын ту етіп, сыртқы жауларымен күресіп келген қайсар халқымыз бұл соғыста та айтарлықтай ерліктің үлгісін көрсетті. Жүзлен аса жерлестеріміз Кеңес Одағының Батыры атанды. Қазақстандық 142 жауынгер майдандағы ерен ерлігі үшін Даңқ орденінің толық иегері болды. Мұндай даңққа ауданымыздағы Кіші Жалаңаш ауылынан соғысқа қатысқан батыр жерлесіміз Ыбырайым Қалдыбаев бөленді. Әйгілі 8-ші гвардиялық Панфилов атындағы двизияның құрамында Кегендік жауынгерлер аз болған жоқ. Кеңес Одағының Батыры Мәлік Ғабдуллин өзінің «Отты жылдар» атты кітабында майдангер жерлесіміз, бүгінде мектепке аты берілген Сәдуақас Серкебаевтың ерен ерліктері туралы «Кегендік жігіт» атты очеркінде ерекше атап айтты.

Біз ІІІ дәрежелі «Даңқ» орденінің иесі, батыр ұшқыш Байділда Шамбыловты, соғыс жылдары двизияның саяси жетекшісі болған Ақай Нүсіпбековті, ерен ерліктері үшін «Қызыл жұлдыз» орденімен, өзге де медалдармен марапатталған Қазтай Ұлтарақовты, Дәурен Серікбаевты, Әбілжан Оспановты, Нұрғали Тұрғанбековты, Аният Боранғазыұлын өзге де көптеген жауынгер жерлестеріміздің, соғыс ардагерлерінің жарқын жүздерін мәңгілік жүрегімізде сақтаймыз. Сұрапыл соғыс жылдары ауылдағы шаруашылықтардың бар ауыртпалығын көтерген тыл ардагерлеріне де үлкен құрметпен қараймыз. Өкінішке орай тыл ардагерлерінің де қатарлары сиреп барады. Ең бастысы, екінші дүниежүзілік соғысқа қатысқан, ұрыста қаза тапқан, туған жерлеріне аман-есен оралып, кейін дүниеден өткен соғыс ардагерлерінің және тылдың жүгін көтерген ардагерлердің есімдері жазылған ескерткіштер әр ауылда бар. Даңқты жерлестеріміз Ақай Нүсіпбековтың, Жамал Ермегияевтың, Садуақас Серкебаевтың есімдері мектепке берілген. Ауылдарымыздағы көптеген көшелер соғыс және тыл ардагерлерінің есімдерімен аталады. Мұның бәрі жанымызға медеу. Арада қанша жылдар өтсе де сол бірі сұрапыл соғыстағы ерлік пен елдік ешқашан ұмытылмайды. Ер есімі – ел есінде. Ерлік – ұрпаққа ұран!

    Құрметті көпшілік!

    Батыр жерлестерміздің, соғыс және тыл ардагерлерінің рухы бізді мәңгі қолдай берсін! Артында қалған ұрпақтары өсіп-өне берсін! Ортамызда жүрген тыл және еңбек ардагерлерінің денсаулықтары мықты болып, ғасырлық ғұмыр сүрсін! Басымыз аман, бауырымыз бүтін, заманымыз бейбіт болып, үлкен – үлкен жақсылықтарға, толайым қуаныштарға жете берейік! Мереке құтты болсын! Шаңырақтарыңызға шаттық толсын!