Желтоқсан оқиғасына қатысушылармен кездесу өтті

16 желтоқсан – Тәуелсіздік күніне орай Кеген ауданында ерекше тағылымға толы кездесу өтті. Аудан әкімі Нұрбақыт Теңізбаев 1986 жылғы Желтоқсан оқиғасына қатысып, елдің егемендігін аңсап алаңға шыққан ардақты азаматтармен жүздесті. Бұл жүздесу – тарихпен тілдесу, тағзым мен тағылым сәті болды.

Аудан басшысы Нұрбақыт Молдахметұлы өз сөзінде:
– Қазақ халқының тәуелсіздікке жетуі – ғасырлар бойғы күрестің, қанмен жазылған шежіренің жемісі. Ал Желтоқсан оқиғасы – сол күрестің соңғы, бірақ ең жарқын беттерінің бірі. Сіздердің сол кездегі өр рухты ерліктеріңіз – бүгінгі бейбіт күннің бастауы, – деп Желтоқсаншыларға зор алғысын білдіріп, шынайы құрмет көрсетті.
Жиында Кеген ауданының Құрметті азаматы, аудандық ардагерлер кеңесінің төрағасы Сабыр Досымбеков ақсақал тағылымды ой айтып, қатысушыларға ақ батасын берді. Аудан прокуроры Алмат Данилов пен аудандық мәслихат төрағасы Алмасбек Нұғман ел тарихындағы бұл күннің маңызын атап өтті.
Желтоқсан оқиғасына тікелей қатысқан азамат, “Желтоқсан ақиқаты” республикалық қоғамдық бірлестігінің Кеген аудандық филиалының төрағасы, аудандық мәслихат депутаты Ерғали Талипов еркіндік үшін күрескен ұрпақтың аманатын жеткізді. Ал аудандық мәслихаттың депутаты Нұргүл Қызайбекова жүрек тебірентер естеліктерімен бөлісіп, сол күндердің жан жарасын өлеңге айналдырған сәттерін тебірене оқып берді.
Иә, Желтоқсан- тек қанды оқиға емес, ол – ұлттық рухтың алауы, азаттықтың алғышарты. Сол күндері қаһармандық көрсеткен қазақ жастары – бүгінгі ұрпаққа тәуелсіздіктің жарық сәулесін шашып кеткені ақиқат.
Кездесу соңында аудан әкімдігі тарапынан Желтоқсан оқиғасының ардагерлеріне құрмет көрсетіліп, естелік сый-сияпаттар табысталды.

Лаура Қарасартова.