РУХАНИЯТ ТӨРІНДЕГІ ТАҒЫЛЫМДЫ ТОЙ Қаламгер ғұмыры – ұлт айнасы

Қазақ даласының әр пұшпағында елдік пен ерлікті, парасат пен пайымды қатар өрген тұлғалар аз болмаған. Солардың қатарында ұлттық журналистиканың дамуына өлшеусіз үлес қосып, қаламының қуатымен тұтас бір дәуірдің шежіресін жасаған көрнекті журналист-жазушы, Қазақстанның мәдениет қайраткері, «Құрмет» орденінің иегері Жақыпжан Мұсабекұлы Нұрғожаевтың орны айрықша. Биыл ауданда 80 жылдық мерейтойының кең көлемде аталып өтуі – тек бір адамның емес, бүтін бір өңірдің рухани қуанышы, елдік сананың жаңғыруына серпін берген тағылымды оқиға болды.
Кеген – табиғаты тылсым, тарихы терең, талай тарлан тұлғаны дүниеге әкелген қасиетті өлке. Осы бір құтты мекенде дүниеге келген Жақыпжан Нұрғожаевтың ғұмыр жолы – еңбек пен ізденістің, адалдық пен азаматтықтың жарқын үлгісі. Оның қаламынан туған әрбір туынды– қоғамның тынысын дөп басқан, уақыттың үніне айналған шынайы дүние. Сондықтан да мерейтой аясында ұйымдастырылған әрбір шараның мазмұны терең, тағылымы мол болды.
Үш күнге жалғасқан мерекелік бағдарлама білім мен тәрбиеге негізделген игі бастамадан бастау алды. Өжек Жаңабаев атындағы орта мектепте жазушы есімімен аталатын оқу кабинетінің ашылуы – жас ұрпаққа бағытталған үлкен рухани инвестиция десек артық емес. Бұл кабинет – жай ғана экспозициялық бөлме емес, әдебиетке құштар шәкірттердің шығармашылық ізденісіне жол ашатын рухани орта. Мұнда қаламгердің сирек кездесетін қолжазбалары, жеке пайдаланған заттары мен бай кітапханасы жинақталып, жас буынға өнеге ретінде ұсынылды.
Мерейтой шеңберіндегі маңызды іс-шаралардың бірі – «Қарқара» шекара заставасында өткен патриоттық кездесу болды.
Ел шебін күзеткен сарбаздармен жүздесу барысында қаламгер шығармаларының кітапхана қорына табысталуы – ерекше мәнге ие оқиға. Бұл – әдебиеттің тек рухани байлық емес, елдік пен ерліктің рухани тірегі екенін айқындайтын қадам. Жас сарбаздардың жүрегіне ұлттық рух ұялатқан мұндай кездесулердің тәрбиелік маңызы зор.
Келесі күні Кеген аудандық тарихи-өлкетану музейінде жазушының өмірі мен шығармашылығына арналған арнайы экспозицияның ашылуы өтті. Бұл– өткен мен бүгінді жалғаған алтын көпір іспетті. Мұнда қойылған әрбір жәдігер қаламгердің өмір жолынан сыр шертсе, оның музей қорына тапсырылған жеке заттары ұлт мұрасына айналған құндылық ретінде бағаланды.
Мерейтойдың шарықтау шегі – аудандық Мәдениет үйінде өткен «Жаны жайсаң Жақыпжан» атты салтанатты кеш болды. Бұл кеш тек құрмет көрсету ғана емес, тұтас бір дәуірдің рухани келбетін айқындаған үлкен мәдени оқиғаға айналды. Кеш барысында жазушының жеті томдық таңдамалы шығармалар жинағының тұсауы кесіліп, оның публицистикалық еңбектері мен көркем дүниелері қайта жаңғырып, оқырманға жол тартты.
Сахнада қойылған театрландырылған көріністер арқылы қаламгердің балалық шағы, еңбек жолы мен азаматтық келбеті көркем бейнеленді. Бұл қойылымдар көрерменді тебірентіп қана қоймай, тұлғаның өмірлік ұстанымын терең түсінуге мүмкіндік берді. Сонымен қатар ғылыми-танымдық бөлімде айтылған мазмұнды баяндамалар жазушының қазақ журналистикасындағы өзіндік мектебін қалыптастырудағы рөлін жан-жақты саралады.
Кештің көркін қыздырған концерттік бағдарлама да ерекше әсер қалдырды. Фольклорлық- этнографиялық «Үшқоңыр» ансамблінің өнері мен еліміздің танымал өнерпаздарының әндері кешке ерекше әр беріп, көрермен көңілін тербеді. Мұның бәрі мерейтойдың мазмұнын байытып, рухани мәнін арттыра түсті.
Жақыпжан Нұрғожаевтың шығармашылық жолы – табандылықтың, кәсіби шеберліктің, азаматтық жауапкершіліктің жарқын үлгісі. Ол еңбек жолын «Лениншіл жас» газетінен бастап, облыстық «Жетісу» газетінің бас редакторы дәрежесіне дейін көтерілді. Қай кезеңде де ол сөздің қадірін түсініп, ұлт мүддесін қорғауды басты мұрат етті. Оның публицистикалық мақалалары қоғамдағы өзекті мәселелерді қозғап, оқырман санасына ой салды.
Қаламгердің шығармалары тек бір кезеңнің шежіресі ғана емес, ұлттық болмыстың көрінісі, халықтың рухани айнасы. Оның туындыларынан елдің өткені мен бүгіні, қуанышы мен мұңы, арманы мен үміті көрініс табады. Сондықтан да оның мұрасы – уақыт өткен сайын құндылығы арта түсетін асыл қазына.
Бұл мерейтой – ұлт руханиятына тағзым, өткенге құрмет, келешекке аманат. Осындай тағылымды шаралар арқылы біз ұлттың ұлы тұлғаларын ұлықтап қана қоймай, олардың өнегелі жолын жас ұрпаққа үлгі етеміз.
Кеген төрінде өткен Жақыпжан Нұрғожаевтың 80 жылдық мерейтойы – ел руханиятының мерейін өсірген, тағылымы мол, мазмұны терең тарихи белес. Қаламгердің ғибратты ғұмыры мен бай мұрасы ұлт жадында мәңгі сақталып, келер ұрпаққа рухани темірқазық болары анық.