Кеген ауданында жазғы маусымда қауіпсіздік шаралары күшейтілді
Жазғы маусымның басталуымен бірге өрт қауіпсіздігі мен судағы қауіпсіздік мәселелерінің өзектілігі арта түседі. Осыған байланысты Кеген ауданының төтенше жағдайлар бөлімі тарапынан тұрғындардың қауіпсіздігін қамтамасыз ету және төтенше жағдайлардың алдын алу бағытында профилактикалық жұмыстар жүйелі түрде жүргізілуде.
Өрт қауіпсіздігі кезеңінде аудан аумағында 51 профилактикалық іс-шара ұйымдастырылып, тұрғындарға өрттің алдын алу, қауіпсіздік талаптарын сақтау жөнінде түсіндіру жұмыстары жүргізілді. Мамандар елді мекендердегі тұрғындармен кездесіп, өрт қауіпсіздігі ережелерін сақтаудың маңыздылығын түсіндірді.
Сонымен қатар, суға шомылу маусымында азаматтардың қауіпсіздігін қамтамасыз етуге ерекше көңіл бөлінуде. Осы бағытта 34 профилактикалық іс-шара өткізіліп, тұрғындарға, әсіресе балаларға судағы қауіпсіздік талаптарын сақтау қажеттігі ескертілді.
Қазіргі таңда аудан аумағында егін ору, егін жинау және шөп шабу жұмыстары қызу жүргізілуде. Бұл кезеңде өрт қауіпсіздігі талаптарын сақтау аса маңызды. Себебі құрғақ шөп пен егін қалдықтары, сондай-ақ ауыл шаруашылығы техникалары өрт қаупін арттыруы мүмкін.
Осыған байланысты төтенше жағдайлар бөлімінің қызметкерлері шаруа қожалықтары мен тұрғындар арасында түсіндіру жұмыстарын жалғастыруда. Егін жинау техникасының техникалық жарамды болуы, қажетті өрт сөндіру құралдарымен қамтамасыз етілуі, құрғақ шөп пен егін қалдықтарының қараусыз қалдырылмауы басты талаптардың бірі ретінде түсіндірілуде. Сондай-ақ дала жұмыстарын жүргізу кезінде отты абайлап пайдалану және өрт қауіпсіздігі ережелерін қатаң сақтау қажеттігі ескертіледі.
Өрттің немесе басқа да төтенше жағдайлардың алдын алу – тек арнайы қызметтердің ғана емес, әр азаматтың ортақ жауапкершілігі. Қарапайым қауіпсіздік талаптарын сақтау арқылы үлкен қауіптің алдын алуға болады.
Кеген ауданының төтенше жағдайлар бөлімі тұрғындар мен шаруа қожалықтарын қауіпсіздік ережелеріне жауапкершілікпен қарауға, сақтық шараларын күшейтуге және төтенше жағдайларға жол бермеуге шақырады.
Қауіпсіздікке немқұрайлы қарамайық. Сақтық – төтенше жағдайдың алдын алудың ең тиімді жолы.
Кеген аудандық ТЖБ.
