Біздің таңдауымыз – жемқорлықсыз қоғам

23 маусым – Мемлекеттік қызметшілер күні қарсаңында Алматы облысында «Заң мен тәртіп» қағидасы аясында мемлекеттік қызметшілер арасында «Біздің таңдауымыз – жемқорлықсыз қоғам» атты шағын футболдан облыстық турнир ұйымдастырылды. Бұл спорттық дода тек жарыс алаңындағы тартыс қана емес, мемлекеттік қызметтің басты құндылықтары– адалдық, ашықтық, әділдік және қоғам алдындағы жауапкершілікті дәріптеген тағылымды іс-шара болды.
Мемлекет басшысы атап өткендей, Әділетті Қазақстан құру жолындағы басты міндеттердің бірі – заң үстемдігін қамтамасыз ету және жемқорлыққа қарсы мәдениетті қалыптастыру. Осы мақсатта өткізілген спорттық шара мемлекеттік қызметшілер арасында салауатты өмір салтын насихаттап қана қоймай, әріптестік байланысты нығайтуға, командалық рухты қалыптастыруға және ортақ құндылықтарды дәріптеуге бағытталды.

Жарыстың салтанатты ашылу рәсіміне Кеген ауданы әкімінің орынбасары Қабылбеков Кеңес Күнесбайұлы қатысып, қатысушыларды мерекемен құттықтап, сайысқа қатысушы командаларға сәттілік тіледі. Өз сөзінде ол мемлекеттік қызметтің мәртебесін арттыруда адал еңбек пен жоғары жауапкершіліктің маңызын атап өтті.
Спорт алаңында бас қосқан мемлекеттік қызметшілер бұл күні күнделікті қызметтік міндеттерінен бір сәт алыстап, өзара бақ сынасты. Турнир барысында әр команда жеңіске деген жігерін, ұйымшылдығы мен шеберлігін көрсетті. Әр кездесуде тартыс пен бәсеке қатар өріліп, көрермендерге әсерлі ойын сыйлады.
Футбол – тек спорт емес, ол тәртіптің, төзімділіктің, ұйымшылдықтың мектебі. Алаңдағы әрбір ойыншы өз командасының намысын қорғап қана қоймай, мемлекеттік қызметшінің қоғам алдындағы жауапкершілігін де паш етті. Осындай жарыстар қызметкерлердің денсаулығын нығайтып, ұжым арасындағы ынтымақ пен өзара сыйластықты арттыруға ықпал етеді.
Тартысқа толы өткен жарыстың қорытындысы бойынша жүлделі орындар төмендегідей анықталды:
І орын – Еңбекшіқазақ ауданының командасы. Жеңімпаз команда жоғары ойын өрнегін көрсетіп, 500 000 теңге көлеміндегі жүлдені иеленді.

ІІ орын – Жамбыл ауданының командасына бұйырды. Олар табандылық пен ұйымшылдықтың үлгісін танытып, 300 000 теңгелік сыйақымен марапатталды.
ІІІ орын – Кеген ауданының командасы. Жерлестеріміз намысты қолдан бермей, жүлделі үшінші орынды иеленіп, 200 000 теңге көлеміндегі марапатқа қол жеткізді.
Мұндай спорттық іс-шаралардың маңызы жыл сайын артып келеді. Өйткені дені сау, рухы мықты, бірлігі бекем мемлекеттік қызметшілер ғана қоғам игілігі жолында нәтижелі еңбек ете алады. Сонымен қатар жемқорлыққа қарсы мәдениетті қалыптастыру тек заң талаптарын орындаумен шектелмейді. Ол әр азаматтың санасындағы адалдық пен әділдік қағидаттарын нығайтудан басталады.
«Біздің таңдауымыз – жемқорлықсыз қоғам» атты турнир осы ұстанымның жарқын көрінісіне айналды. Спорт пен салауатты өмір салтын насихаттау арқылы мемлекеттік қызметшілер қоғамға үлгі көрсетіп, заң мен тәртіпке негізделген әділетті қоғам құру жолындағы ортақ мақсатқа өз үлестерін қосты.
Адалдық – мемлекеттік қызметтің айнымас қағидасы, ал бірлік пен спорт – сол қағиданы нығайтатын сенімді құрал.
Осындай тағылымды шаралар ел болашағына қызмет ететін жауапты мамандардың кәсіби әрі рухани тұрғыдан шыңдала түсуіне жол аша беретіні сөзсіз.