Таза бейсенбі – тазалыққа ортақ қадам

«Таза Қазақстан» республикалық экологиялық акциясы аясында Кеген ауданында кезекті тазалық жұмыстары ұйымдастырылды. Қоршаған ортаны қорғау, туған өлкенің табиғи тазалығын сақтау және тұрғындардың экологиялық мәдениетін арттыруға бағытталған игі бастамаға аудан жұртшылығы белсене атсалысты.
Жалпыаудандық сенбілікке аудан әкімі Нұрбақыт Молдахметұлы, аудан әкімінің орынбасары Кеңес Күнесбайұлы, аудан әкімі аппаратының басшысы Қанат Әуесханұлы, мекеме басшылары, мемлекеттік қызметкерлер мен еріктілер қатысып, ортақ іске өз үлестерін қосты.
Сенбілік барысында Жастар саябағында тазалық жұмыстары жүргізіліп, демалыс орнының аумағы күл-қоқыстан тазартылды. Айналаны абаттандыру, қоғамдық орындардың тазалығын сақтау бағытында жүйелі жұмыстар атқарылды.
Тазалық – тек арнайы мекемелердің ғана міндеті емес, ол – әрбір азаматтың туған жер алдындағы перзенттік парызы. Айналаның таза болуы – қоғам мәдениетінің, елдің бірлігі мен тұрғындардың қоршаған ортаға деген жанашырлығының айқын көрінісі.
Осы бағыттағы жұмыстар ауданымызда тұрақты түрде жалғасуда. Әр бейсенбі сайын «Таза бейсенбі» аясында жалпыаудандық сенбіліктер ұйымдастырылып, елді мекендердің көркеюі мен тазалығын қамтамасыз етуге тұрғындар жұмыла қатысуда.
Туған жердің табиғатын аялау, оның тазалығын сақтау – бүгінгі ұрпақтың ғана емес, келер буын алдындағы да үлкен жауапкершілік. Сондықтан ортақ үйіміз – туған өлкеміздің тазалығы жолындағы әрбір игі іс көпшілік қолдауымен жалғаса бермек.