Дәрігер дәрімен емдемейді, тілімен емдейді
Жыл он екі айдың сұлтаны саналатын Рамазан айының шуағын шашқалы қашан. Таулы өңірде жақсылықтар жоқ емес. Өрісіміз ойнақтаған қозыға, құлдыраңдаған құлын мен бұзауға тола түсті. Сәуір айы жаңбырлы болып, диқан қауымның көңілі орнына түсті. Көктем егісі сәтімен аяқталуға жақын. Ел-жұртымыз алдымызда келе жатқан Қазакқстан Республикасының Президентін сайлауға бір кісідей қатысып, өз таңдауларын жасауға ниеттеніп отыр. Міне, осындай шақта аудандағы денсаулық сақтау саласында еңбек етіп жүрген мейірбикелер қауымы өздерінің жыл айналып бір келер төл мерекелерін атап өтті. Сырқатты жандарға уақтылы ем-домын жасап, жүрегінен шыққан жылы сөзін айтып, әрдайым жыл қабағын танытып жататын мейірбикелердің жұмысы жеңіл емес. Биылғы мерекелеріне орай аудандық орталық аурухананың мейірбикелеріне арнайы бет беруді жөн көрдік.
ЖҰМЫСТАРЫ ЕЛЕУЛІ
аудандық орталық аурухана бас дәрігерінің
емдеу ісі жөніндегі орынбасары.
Міне, жылжыған айлар, зымыраған күндер аясында тағы да бір мейірбикелер күнін қарсы алдық. 1971 жылы Дүниежүзілік Медбикелер Кеңесінің ұйғарымымен бастау алған мейірбикелер күні дәстүрімізге айналып кетті. 12 мамыр – медбике ісінің негізін қалаушы ағылшын медбикесі Флоренс Найтингейлдің туылған күні. Ол Қырым соғысы кезінде тұңғыш болып медбикелер қызметін ұйымдастырған. Халықаралық Медбикелер Кеңесі осынау атақты әйелді мәңгі есте қалдыру үшін 12 мамырды Халықаралық мейірбикелер күні деп қабылдаған. Сол уақыттан бері қарай денсаулық сақтау саласында ерекше мереке ретінде тойланып келеді. Ауданымыздың мейірбикелері биылға төл қуаныштарын лайықты қарсы алды. Жалпы жағдайымыз жаман емес. Уақыт талабына орай жұмыстар жүргізілуде. Мейірбикелеріміздің еңбектері жеңіл емес. Соған қарамастан, жылдар бойы жинақтаған тәжірибелерімен өз істерін тыңғылықты, ұқыпты атқарып, көп көңілінен шығуда. Аудандық орталық аурухананың әкімшілігі тарапынан ауданымыздағы барлық мейірбикелерге жемісті еңбек, өмірдің бақытын, шаңырақтың шаттығын тілейміз!
Мерекеге мерейлі келдік
Алмана Демежанова,
аудандық орталық аурухананың бас мейірбикесі.
Халқымыздың денсаулығын жақсартуда мейірбикелердің еңбектері зор. Денсаулық сақтау саласында осы бір жылы жүзді, ізгі тілекті, әрдайым жұмыстары үшін шапқылап жүретін мейірбикелердің ерен еңбектері көрініп тұрады. Мейірбике – денсаулық сақтау ісінің қозғалтқыш күші. Қазіргі таңда «Денсаулық» мемлекеттік бағдарламасы аясында жасалынып жатқан жұмыстардың барлық белесінде мейірбикелердің адал еңбегінің жатқаны аян. Халық денсаулығын жақсарту, медициналық қызмет сапасын арттыру, халықты қолжетімді медицинамен қамтамасыз ету, медициналық алғашқы жәрдемді жетілдіру, ана мен бала денсаулығын қорғау, аурудың алдын алу бағытындағы скрингтік тексерулер тағы да басқа көптеген жұмыстардың жүзеге асырылуындағы мейірбикелердің қызметтік міндеттері олардың денсаулық сақтаудың барлық саласындағы орнын көрсетеді. Қазір ауданымыздағы денсаулық сақтау саласында 272 орта буын медицина қызметкерлері еңбек етеді. Солардың ішінде 145 мейірбике аудандық орталық ауруханада жұмыс істеп жүр. Біздің мейірбикелеріміз өз жүмыстарын жақсы біледі. Жұмысқа уақытында келіп, өз істерін мұқият жүргізіп отырады. Тұрғындарға медициналық көмек көрсетудің тиімділігі көп жағдайда мейірбикенің жұмысына тікелей байланысты. Сондықтан мейірбикелік кәсіп немесе мейірбике ісі денсаулық сақтау жүйесінің бөлінбейтін бөлшегі. Реті келгенде, ауруханамызда көп жылдардан жемісті, абыройлы әрі көпке құрметті ретінде жұмыс істеп келе жатқан Майгүл Әлдибекова, Күлиза Тұрғанбекова, Меруерт Нұрғожаева, Сейілхан Макен, Гүлнар Жетібаева, Гүлмира Исаева, Тоты Бекбатырова, Тұрсынай Қасенаева, Гүлзира Буденалиева, Бибігүл Ауталипова, Камила Жолдасова, Әлия Тастанова секілді озат, үлгілі мейірбикелердің есімдерін лайықты атай кеткім келеді. Олай болса, денсаулықтың жаршысы, адам өмірінің қорғаушысы, науқастың дертіне дауа сыйлаушы мейірбикелерді мерекелерімен құттықтаймын! Ерен еңбектеріңіздің жемісін көріп, ұлт саулығы жолында аянбай еңбек етіп, биік белестерді бағындыра беріңіздер! Жандарыңыз жамандық көрмесін!
Келбет (Мейірімді мейірбике)
Аудандық орталық ауруханада жүрек қалаған мамандығы бойынша еңбек етіп, көп құрметіне бөленіп, алғыс арқалап келе жатқан мейірбикелер аз емес. Рас, өмірге сән беріп, тіршілікке нәр беріп, қалтқысыз қызметін ұсынып, мейірімділік пен жылулықтың символына айналып, игілікті мамандықтың иесі атанған мейірбике ісі – әрдайым сый-құрметке лайық. Аудандық орталық аурухананың хирургия бөлімінде мейірбике болып жұмыс істейтін Майгүл Әділбекова өз жұмысын жақсы біледі. Ұйғыр ауданының бір перзенті. Талғар қаласындағы медициналық училищені бітірген 1982 жылдан бері аталған бөлімде жұмыс істеп келеді. Еңбек өтілі биыл 37 жылға аяқ басыпты. Аз уақыт емес. Хирургия бөлімі ауыртпалығы жетіп-артылып жататын ең қиын, күрделі бөлім. Мұнда түрлі жағдайлармен кенеттен келіп түскен ауыр науқастарға жедел ота жасалып жатады. Сағаттарға созылған ота кезінде хирургтердің қасында болып, айтқанын орындап отырасың. Жұмыстың қиындығын көтересің. Сырқатты жандардың да жағдайына алаң болып, қолыңнан келгенше көмегіңді жасап, амандығын тілеп жүресің. Майгүлдей мейірбике ортасының құрметтісі. Білікті мейірбике. Оның жаңадан келген мейірбикелерге үйретері көп. Әрдайым әкпелік ақыл-кеңесін айтып жүреді.
Майгүл Әділбековадай мейірбике Кеген ауылындағы үлгілі отбасының отанасы. Аудандық телекоммуникация торабында жұмыс істеген Мұрат Жанұзақовтай өмірлік жарымен 4 ұлдарын өсірді. Олардың үш келін түсірген жайлары бар. Қазір жеті немерелерін аялап, жандарын жадырата түседі.
Ол бүгінде жұмысына уақтылы келген. Бөлмелерді аралап сырқаттармен амандасып, жағдайларын біліп қояды. Хирургия бөліміне түскен жандардың тезірек сауығып кеткенін тілеп жүретін Майгүлге әркім-ақ жүрекжарды лебізін білдіріп, алғысын айтып жатады. Ақ халаты бойына жарасқан мейірбике үшін ел алғысынан артық ештеңе жоқ.
Жақсының жақсылығын айт…
Аудандық орталық ауруханада ел алғысына, ұжымның сый-құрметіне бөленген мейірбикелер аз емес. Солардың қатарында Күлиза Тұрғанбекова бар. Өз ісінің білгірі саналатын мейірбике ұзақ жылдардан бері еңбек етіп келеді. Абыройлы, ақ жүзді. Күлиза учаскелік балалар мейірбикесі. Кеген ауылындағы балалардың жайы назарында. Олардың уақтылы ем-дом алып отыруына септігін тигізеді. Күлиза үшін биылғы жыл қуанышты жыл. Ұзақ жылғы бейнетті еңбегінің зейнетін көретін күні таяу. Дәлірек айтқанда зейнеткерлік демалысына шығады. Бұл да адам өміріндегі айтулы жақсылық.
Аудандық орталық аурухананың ем-дом кабинетінің мейірбикесі Айгүл Қыстықбаеваның да атына жылы лебіз білдірген артық емес. Айгүл де ұзақ жылдардан еңбек етіп келеді. Өз жұмысын жақсы меңгерген. Алдына келген сырқатты жандардың алғысын арқалап жүр. Қос мейірбике де ұрпақтарын өсіріп, келін алып, немере сүйіп отыр. Өмірдің бақыты деген осы.
Аудандық орталық аурухананың бас мейірбикелері.
