Көкпаршы жігітке құрмет көрсетті
Тұңғыш Президентіміз-Елбасы Н. Назарбаевтың «Болашаққа бағдар: рухани жаңғыру» және «Ұлы даланың жеті қыры» атты мақаласында көнеден сүрлеу тартып келе жатқан ұлттық құндылықтарымызды сақтау, оны ұлықтау тұрғысында аз әңгіме айтылған жоқ. Шүкір, елімізде ұлттық спорт түрлері лайықты дамып келе жатыр. Оған дем беріп жүрген ауылдың қара домалақтары десек, артық айтпаймыз. Кеген ауданындағы Бөлексаз ауылынан Бақдәулет Серікжан атты көкпаршы жігіт шығып, көрген жанды тамсандырып жүрген жайы бар. Ат құлағында ойнайды. Көкпар десе, делебесі қозып кетеді. Небары 19 жастағы шағын денелі шымыр, қайратты әрі сондайлық самдағай жігіт бүгінде көкпардан Азия чемпионы. Аталған ұлттық спорт түрінен Қазақстан Республикасы құрама командасының мүшесі. Қазақстанның спорт шебері. Ол қазір Абай атындағы Қазақ Ұлттық педогоикалық университетінің спорт және туризм факультетінің 1 курсында оқып жүр. Алдағы уақытта көкпардан Монғолияда өтетін әлем біріншілігіне дайындық үстінде. Ұлтымыздың қыз қуу деп аталатын тамаша дүниесінде бір-бірімен танысып, кейін отау көтерген Серікжан мен Бағдагүлдің шаңырағынан шыққан ат сүйер, жылқыны құрметтер, ұлттық көкпарымызды жанындай жақсы көрер Бақдәулеттің шығар биігі, алар асуы алда.
Көкпаршы жігіттің өнеріне, жеткен жетістіктеріне сырттай қанық болып, риза болып жүрген Кеген ауданының әкімі Талғат Байедилов Бақдәулетті арнайы қабылдады. Жүрекжарды лебізін жеткізіп, әр аттаған қадамына сәттілік тіледі. Өңірдің мәртебесін көтеріп, ауданның мерейі болып жүрген азаматқа лайықты сый-құрметін көрсетті. Осынау ұмытылмас сәтке ортақ болған аудандық ақсақалдар кеңесінің төрағасы Сабыр Досымбеков ақ батасын берді. «Нұр Отан» партиясы Кеген аудандық филиалы төрағасының орынбасары Алмас Мұқаев, аудандық жастар ресурстары орталығының жетекшісі Тоғжан Біржансалова ізгі тілектерін жеткізді. Жүздесуде сөз алған көкпардан Азия чемпионы, Қазақстанның спорт шебері Бақдәулет Серікжан өзіне көрсетілген құрмет үшін аудан әкіміне алғысын айтты. Бұдан былай да ел сенімін ақтау үшін, Қазақстанның көкбайрағын желбірету үшін күресе беретінін алға тартты. Ұлттық додамызды ұлықтаған Бақдәулеттің жортқанда жолы болсын!
