Ұланға айтар алғыс мол
Кеген ауданының өз алдына қайта құрылып, бұрынғы қалпына келуі-қуанышты, тарихи оқиға болды. Оның жақсылығы жоқ емес. Ауданның орталығынан Кеген аудандық балалар мен жасөспірімдер спорт мектебі құрылып, жұмысын жүргізіп келеді. Шәкірттеріміз спорттың бірнеше түрінен жаттығып, жақсы нәтижелерге қол жеткізіп келеді. Бұл орайда біз шәкірттеріміздің облыстық, республикалық жарыстарға қатысуына демеушілік жасап жүрген азаматтардың атын атып, түсін түстегіміз келеді. Солардың бірі әрі бірегейі Ұлан Аришов. Аптал азамат биылғы жылдың қаңтар айында Алматы қаласында өткен 2007-2008 жылы туылған жасөспірімдер арасындағы республикалық жарысқа 30 жас палуанның қатысуына мүмкіндік жасады. Жолдарына, жатын орнына қаражатын жұмсады. Соның нәтижесінде ауыр салмақта күрескен Бауыржан Аманжан 2 орын, Ақжол Қуанышұлы 3 орын алды. Ұлан бауырымыз ақпан айында Қарасай ауданының 90 жылдығына орай дзюдодан өткен облыстық ашық біріншілікке 8 палуанның қатысуына демеушілік көрсетті. Нәтижесінде Бекарыс Тінәл, Ерсұлтан Бектемір, Бекзат Қайшыбек, Мерхат Жангелді, Тілек Исабек, Хасен Байкелді, Илнас Әбілжан, Айбын Тінәл 1-2-3 орындардан көрінді. Ақпан айында Іле ауданында Жәпек батыр ауылында дзюдодан республикалық ашық біріншілік болып өтті. Ұлан бауырымыз осынау жарысқа 4 жас палуан мен 1 жаттықтырушының қатысуына қолайлы мүмкіндік туғызды. Айтулы біріншілікте Мерхат Жангелдідей шәкіртіміз 35 келе салмақта 3 орынды жеңіп алды. Сондай-ақ жастарымыздың бірі Бексұлтан Әнуарұлы Алматыдағы халық аренада өткен Азия чемпионатында күміс жүлдеге, Атырау қаласында жастар арасында Қазақстан чемпионатының қола жүлдегері атанды. Ересектер арасында Ислам Тоқтасын Қазақстан чемпионатының қола жүлдегері, Қырғызстан Республикасында өткен халықаралық жарыста Кемелқожа Бауыржан күміс, ал «Дарабоз» республикалық жарыста Қашымбек Бекзат, Жангелді Мейірхат, Кемелқожа Бауыржан дарабоздың жеңімпазы атанды. Мұның бәрі спорт мектебінің, шәкірттерінің келешегін ойлап отырған Ұлан Аришевтай азаматтың арқасы, қолдаушылығы деп бағалаймыз. Орайы келгенде мектебімізге жанашыр болып, қыста көмірмен көмектесіп келген азаматтар бар. Қиын кезде көмектескен оларға алғысымыз шексіз. Біз Ерлік Үркімбаев, Қуаныш Әбділдаев, Данияр Өнербаев, Бақтияр Марибжан, Бауыржан Досымбеков, Ринат Сайлыбеков, Хамит Шілікбаев секілді жекелеген азаматтарға аудандық «Қарқара» газеті арқылы алғысымызды айтамыз. Аудандық балалар мен жасөспірімдер спорт мектебіне, оның шәкірттеріне демеу, сүйеу болған жандарға Алланың нұры жаусын!
