ҚЫЗЫРЛЫ ӨЛКЕ – КЕГЕНІМ! Ұлттық рух пен рухани жаңғыруды тоғыстырған тағылымды шара

Лаура Мұхаметқали, Суреттерді түсірген: Мира МУРАТАЛИЕВА, «Қарқара» газеті.

Халқымыздың рухани өмірінде айрықша орын алатын дәстүрлі мәдени күндер – ұрпақты ұлттың өткеніне үңілдіріп, болашағына бағдар болар ұлағатты мектеп іспетті. Осындай тағылымды мақсатты көздеген, ұлттық сананы жаңғыртып, төл мәдениетімізді ұлықтауға бағытталған “Қызырлы өлке – Кегенім!” атты мәдени күндерге арналған кең көлемді іс-шара аудандық мәдениет үйінде жоғары деңгейде ұйымдастырылып өтті.

Мерекелік күннің шымылдығы Кеген ауылының кіреберіс жазығында тігілген ақ шаңқай киіз үйлермен ашылды. Жайылған ақ дастарханнан дәм ауыз тиген көпшілікке ақ баталар беріліп, ізгі тілектер айтылды. Қасиетті қазақ даласының бойтұмары іспетті ұлттық ойындар – көкпар, қыз қуу, теңге ілу, асық ату, қазақ күресі, ашамайға мінгізу сынды ата-бабадан қалған асыл мұралар елдің ықыласына бөленді.
Бұл – ата салтты ұлықтау ғана емес, ұлттық болмысымызды ұрпақ санасына сіңірудің өнегелі жолы.
Ауылдың ақ жаулықты әжелері мен өнерлі қыз-келіншектері мәдениет үйі алдындағы алаңда ұлттық тағамдар көрмесін ұйымдастырып, қолөнер бұйымдарын көпшілік назарына ұсынды. Құрт, ірімшік, бауырсақ секілді дәмдермен келген қонақтарды сыйлаған ақ әжелердің мейірімді жүзінен қазақы қонақжайлылықтың шынайы белгісі сезілді. Сабау сабап отырған әже мен оған жәрдемдескен немеренің жарасымды бейнесі- ұрпақ сабақтастығының жарқын көрінісіне айналды.

Кейінгі шара аудандық мәдениет үйінің ішінде жалғасын тапты. «Ауылым алтын бесігім» атты байқауына келген қонақтар мен қазылар алқасы төмендегідей болды. Ғұмаров Төлеужан- ақын, жазушылар Одағының мүшесі, Алматы облысының мәдениет, архивтер және құжаттама басқармасының бөлім басшысы, Даулет Дәркембайұлы – мәдениет саласының үздігі, ҚР суретшілер Одағының мүшесі, ҚР дизайнерлер Одағының мүшесі, ҚР қолөнершілер Одағының мүшесі, Ұста Дәркембай атындағы қолөнер музейінің директоры. Абдиева Ғазиза – «Құрмет» орденінің иегері, Қазақстанның Еңбек Сіңірген әртісі, «Алтынай» мемлекеттік халық би ансамбілінің бас балетмеистері, Ержан Тоқтар – ақын, Қазақстан жазушылар Одағының мүшесі, Қазақстан жазушылар Одағының Алматы облыстық филиалының төрағасы, Нұғманов Алмас – домбырашы, халықаралық, республикалық байқаулардың лауреаты, Сүйінбай атындағы Алматы облыстық филармониясы директорының орынбасары.

Салтанатты жиынға ұласқан басқосуда Кеген ауданының әкімі Нұрбақыт Молдахметұлы Теңізбаев құттықтау сөз сөйлеп, аудан көлемінде атқарылып жатқан игі істерге тоқталды. Алматы облыстық халық шығарма-шылығы орталығының директоры Үмбеталиев Әнуар, ақын Қазақстан жазушылар Одағының мүшесі, Алматы облысының мәдениет, архивтер және құжаттама басқармасының бөлім басшысы Ғұмаров Төлеужан сөз сөйлеп, ізгі ниетін білдірді.

Шара соңы аудандық мәдениет үйінің талантты өнерпаздарының концерттік бағдарламасына жалғасып, ән мен жырдан шашу шашылды.
Бұл — ел бірлігін, рухани тұтастығын, ұлттың қадір-қасиетін насихаттаған мазмұнды да мәнді мереке болды. «Мәдениет – елдің жаны, рухы» десек, осындай шаралар – сол рухтың тірегі.