«Кітап – білім бұлағы»,- деп жатамыз. О, заматтан білімнің қайнар көзі саналған ақылдың кені кітаптың құны әу бастан – ақ қазынаға баланған. Қазынаның берері мол, бағыты айқын екенінде дау жоқ. Бүгінгі тенологияның дамыған заманында, электорнды ақпаратқа бой алдырған қоғамда кітаптың құны қаншалықты екен? Жастарымыз бен кітап құмар жанның кітапқа деген ілтипаты мен қызығушылығы қай дәрежеде екенін білмекке, бүгінгі қарыштап дамыған қоғамда кітаптың оқырманымен байланысының аражігін, білімнің қайнар бұлағы құндылығын жоғалтпаған қазынаның белесін білмекке аудандық кітапханаға бас сұққан едік. Жастарымыз бен оқушылардың кітап атты асылды қадір тұтып, білімін осы кітап арқылы сусындатуы қаншалықты деңгейде деген сауалмен аудандық кітапхананың директоры, аудандық маслихаттың депутаты Ахметова Индира ханымнан аз-кем сұхбат алған едік.
Кітапхананың бүгінгі таңдағы хал-ақуалы жайлы айта кетсеңіз?
– Индира Ахметова: -Бүгінгі жаһандану заманында ұлттық болмысты сақтау мен ұрпақ санасына рухани байлықты сіңіру – баршамыздың міндетіміз. Осы жолда кітапхана – мәңгілік тәрбие мен білімнің қарашаңырағы ретінде айрықша маңызға ие. Кітапхана – білім мен руханияттың қайнар көзі, халыққа мәдени-ағартушылық қызмет көрсететін маңызды мекеме. Бүгінгі таңда Кеген аудандық кітапханасы өзінің дәстүрлі қызметін сақтай отырып, заман талабына сай жаңарып, ақпараттық технологияларды енгізу, оқырманмен жұмысты жандандыру, жаңа форматтағы іс-шаралар ұйымдастыру бағытында жұмыс жүргізуде. Кеген ауданы бойынша 1 аудандық, 12 ауылдық кітапхана халыққа қызмет көрсетіп келеді. Жалпы 32 штаттық бірлік жұмыс істейді. Кітапханашыларымыз өз ісінің шеберлері, оқырманмен тығыз байланыс орнатып, ауыл мен аудан тұрғындарының рухани сұранысын өтеуде белсенді еңбек етуде.
Бүгінгі технология заманында кітапханаға оқырман тарту мақсатында қандай жоспарлар мен іс-шаралар жүргізілуде?
– Индира Ахметова: Қазіргі уақытта әлеуметтік желілер – ақпарат тарату мен оқырманмен байланысты нығайтудың ең тиімді құралы. Осы бағытта Кеген аудандық кітапханасының Instagram парақшасында барлық мәдени және танымдық іс-шараларымыз тұрақты түрде жарияланып отырады. Сонымен қатар, аудандық және облыстық деңгейде өтетін қоғамдық, мәдени жиындарға арнайы кітап көрмелерін ұйымдастырып, кітапханамыздың жұмысын таныстырамыз. Бұл – кітапхана қызметін кең көлемде насихаттап, жаңа оқырмандарды тартудың тиімді тәсілі болып отыр.
Жастардың кітап оқуға қызығушылығы қандай?
– Индира Ахметова: Қазіргі таңда жастардың кітап оқуға деген қызығушылығы жақсы деңгейде. Олар заманауи әдебиетпен қатар, классикалық туындыларға да қызығушылық танытып келеді. Кітапхана тарапынан жастар үшін арнайы бағытталған түрлі танымдық, шығармашылық іс-шаралар ұйымдастырылады. Әсіресе жазғы демалыс кезінде жас оқырмандардың белсенділігі арта түседі. Бос уақытын тиімді өткізу үшін кітапханаға жиі келіп, түрлі шараларға қатысып отырады.
Сонымен қатар, біз жас ақындар мен жас жазушыларды қолдауға ерекше мән береміз. Олармен тұрақты түрде жұмыс жүргізіліп, шығармашылығын дамытуға бағытталған үйірмелер мен кездесулер ұйымдастырылады. Жас таланттарды аудандық, облыстық және республикалық деңгейдегі байқауларға қатыстырып отырамыз. Атап айтсақ, облыстық «Мақал – сөздің мәйегі», «Тез оқиық» атты байқауларына Тасашы, Ұзынбұлақ, Саты және Қарабұлақ ауылдық кітапханаларынан оқырмандар қатысып, жүлделі орындарға ие болды. Бұл – ауыл жастарының кітап оқуға деген құлшынысы мен дарындылығының нақты көрінісі. Сонымен қоса жас кітапханашымыз «Рухани Қазына-2025» республикалық байқауына қатысып, Алғыс хатпен лайықты марапатталды және «Жас Серпін-2025» республикалық форумына қатысып, облысымыздың жобаларын республикалық деңігейде таныстырды.
Кітапхана цифрландыру бағытында қандай жұмыстар жүргізілуде?
– Индира Ахметова: Бүгінгі технологиялық даму кезеңінде кітапхананың цифрландыру бағытына үлкен көңіл бөлінуде. Кеген аудандық кітапханасы ИРБИС электронды кітапхана бағдарламасымен жұмыс істейді. Бұл бағдарлама арқылы кітап қорын толық электрондық форматқа көшіру, оқырмандар базасын жүргізу, ізденіс пен кітап беру процесін жеңілдету сияқты функциялар іске асады. Қазіргі таңда кітапхана қорындағы әдебиеттердің 70 пайызы электронды жүйеде тіркеліп, жүйеленіп отыр.Цифрландыру – кітапхана қызметінің заманауи, ыңғайлы әрі қолжетімді болуына жол ашып отыр.
Кітапханада онлайн кітапхана немесе мобильді қосымша бар ма?
– Индира Ахметова: Иә, қазіргі уақытта онлайн оқуға мүмкіндік беретін тиімді платформалардың бірі – KazNEB (Қазақстанның Ұлттық электронды кітапханасы). Бұл платформада еліміздегі барлық негізгі басылымдар мен әдебиеттер қамтылып, оқырмандарға кез келген уақытта, кез келген жерде кітаптарды және өңірімізден шыққан ақын-жазушылардың еңбектерін онлайн оқу мүмкіндігі жасалған. Яғни, цифрлық ресурстарды пайдалану арқылы кітапхананың қызмет ауқымы кеңейіп, оқырман мен ақпарат арасындағы қашықтық қысқаруда.
Бұл жүйе арқылы:
– Кітаптарды жүктемей-ақ тікелей желіде оқуға болады;
– Авторлар мен жанрлар бойынша оңай іздеуге мүмкіндік бар;
– Қазақстандық ақын-жазушылардың, зерттеушілердің еңбектері еркін қолжетімді.
Кеген аудандық кітапханасы оқырмандарға осы платформамен жұмыс істеуді үйретіп, сандық ресурстарды тиімді пайдалануға бағыт-бағдар береді. Болашақта да мобильді қосымшалар мен электронды жүйелермен жұмысты жандандыра түсу жоспарымызда бар.
Кітапхана — тек кітап сақталатын орын ғана емес, ол – рухани тынығу мекені, зерде мен ізденістің ордасы. Бұл жерде әрбір оқырман өзін еркін сезініп, білім мен шабыттың жаңа әлеміне енеді.
Кітапханашының жұмысы – жанға жайлы, көңілге қуаныш сыйлайтын ерекше мамандық. Себебі біз кітап арқылы адам санасын байытып, рухын биіктетеміз. Күн сайын түрлі жастағы оқырмандармен жүздесіп, олардың сұранысына сай кітап ұсыну – үлкен жауапкершілік пен ләззат сыйлайтын іс.
Бүгінде кітапхана – заманауи ақпарат орталығы, шығармашылық пен жаңашылдық алаңы. Цифрлық жүйелермен жұмыс істеу, түрлі әдеби жобалар ұйымдастыру, креативті іс-шаралар өткізу арқылы біз оқырманмен жаңа деңгейде байланыс орнатып келеміз.
Қорытындылай келе, кітапхана саласында жұмыс істеу – адам жанын тәрбиелеуге, қоғамды рухани байытуға қосылатын үлкен үлес. Бұл – жанға жайлы, жүрекке жылы, мәні мен мағынасы зор мамандық.
Сұхбатыңызға рахмет! Еңбектеріңіз жемісті болсын! Оқырмандарыңыз арта берсін!
Лаура Мұхаметқали.
