Мектебіміздегі игі дәстүр
Әр жылдың соңы біздің мектеп үшін тек қана қорытынды емтихандар мен соңғы қоңырау салтанатымен шектелмейді. Бұл мезгіл – оқушылардың еңбегі еленіп, үздіктердің аты айқындалатын ерекше шақ. Әсіресе, жыл сайын дәстүрге айналған «үздік оқушыларға смартфон сыйлау» шарасы барша шәкірт үшін үлкен қуанышқа айналған.
Биыл да бұл дәстүр өз жалғасын тапты. Үздік атанған үш оқушыға смартфон табысталды. Оның үстіне осы жылы алғаш рет “Жылдың үздік мұғалімі” де арнайы сыйлыққа ие болды. Бұл – дәстүрдің жыл өткен сайын жаңа мазмұнға толығып, өркендеп келе жатқанын көрсетеді.
Бұл игі істің бастамашысы – ауылымыздың беделді азаматы, қайырымды демеушіміз Ермек Нұрқасымов ағайымыз. Жас ұрпақтың оқу- білімге деген ынтасын арттыруға сүбелі үлес қосып жүрген ағайымыздың бұл қамқорлығы – тек сыйлық табыстау емес, ол – болашаққа сенім ұялату, жастардың арман- мақсаттарына жол ашу.
Үздіктер қалай анықталады?
Бұл – көпшіліктің көкейінде жүретін сұрақ. Себебі үздіктің үздігін таңдау оңай емес. Мектебімізде әділеттілікті басты орынға қоятын дәстүр бар. Жыл соңында оқу ісі жөніндегі орынбасар Қыдырбеков Қайырғали ағайымыздың бастамасымен арнайы олимпиада өткізіледі. Олимпиада үш кезеңнен тұрады. Оған 5–11 сынып арасындағы ең алғыр оқушылар қатысады. Бірінші кезеңнен сүрінбей өткендер екінші кезеңге жолдама алып, ақтық сынға өтеді. Әр кезеңде білімді, жан-жақты дайындалған балалар ғана дараланып шығады.
Ұстаздар үшін де әділ сын бар. “Жыл пән мұғалімі” атты байқау ұйымдастырылып, үздік педагог айқындалады. Бұл байқауда мұғалімнің тәжірибесі, кәсібилігі, шәкірт жетістігі ескеріледі.
2025 жылдың үздіктері
Биылғы марапат иегерлері де мақтануға тұрарлық.
• Бас жүлде – “Үздіктердің үздігі” атағын 8-сыныпқа өткен зерек оқушы Нұрсапа Нұрәділ жеңіп алды.
• II орын – мектеп түлегі, “Алтын белгі” иегері, еңбекқорлығымен танылған Әлімсейт Инабатқа бұйырды.
• Сонымен қатар, мектеп президенті қызметін екі жыл қатарынан абыроймен атқарған, қоғамдық жұмыстарға белсенді атсалысқан Ербол Шұғыла да смартфонға ие болды.
• Ұстаздар арасындағы “Жыл пән мұғалімі” номинациясын қазақ тілі мен әдебиеті пәнінің білікті ұстазы Бекбатырова Бекзат апайымыз иеленді.
Бұл сәт – тек жеңімпаздардың қуанышы емес, бүкіл мектеп ұжымының мерейі. Үздіктер сахнаға шығып, сыйлықтарын қабылдағандағы шаттыққа толы жүздері бәріміз үшін үлкен шабыт көзі болды.
Смартфон – жай ғана заманауи байланыс құралы емес, ол еңбектің еленуі, табандылықтың жемісі, білімге деген құштарлықтың белгісі. Әр оқушы “келесі жылы мен де үздіктер қатарында болсам ғой” деп арман қояды. Бұл мақсат балаларды ынталандырып қана қоймай, мектептің де жалпы деңгейін көтеруге ықпал етеді.
Ауыл мектебінің білім сапасы жоғары екендігін дәлелдеудің бір жолы – осындай әділетті байқаулар мен марапаттар. Біз үшін бұл дәстүр – ауылдың ғана емес, тұтас білім ордасының абыройын асқақтататын үлкен шара.
Мұндай дәстүрдің жалғасып келе жатқаны– ең алдымен демеушіміздің еңбегі. Ермек ағайымыздың әрбір шәкіртке жасаған қамқорлығы – үлкен жүректің ісі. Ол кісі үшін басты мақсат – ауылдың жастары білімді, бәсекеге қабілетті болып өссе деген тілек. Сол үшін жыл сайын уақытын да, қаржысын да аямай, дәстүрдің үзілмеуіне атсалысып келеді.
Сыйлықтар дәл жылдың соңында ғана емес, 1 қыркүйек – Білім күні мерекесінде де табысталып, оқушыларға ізгі тілектер айтылды. Бұл жаңа оқу жылын бастауға ерекше шабыт сыйлады.
“Үздіктерді анықтау” олимпиадасы енді біздің мектептің айрықша брендіне айналды. Келер жылы тағы да кім оза шауып, үздік атанарын біз қазірден-ақ асыға күтеміз.
Бір нәрсе анық: білімге құштар, алға ұмтылған шәкірт пен еңбегі еленген ұстаз барда, ауыл мектебінің болашағы да жарқын болмақ!
Айзат Бақберген.
