Жалпы ұлттық диктант алынды

Алматы облысының «Тіл» оқу- әдістемелік орталығы коммуналдық мемлекеттік мекемесінің Кеген аудандық филиалының ұйымдастыруымен Кеген ауылында ұлт ұстазы Ахмет Байтұрсынұлының туған күні мен Қазақстан халқы тілдері күніне арналған қоғамда сауатты жазу мәдениетін қалыптастыру және тіл арқылы ұлттық бірегейлікті нығайту мақсатында жалпыұлттық диктант шарасы өтті. Шараға Кеген аудандық кітапханасы, Кеген аудандық тарихи- өлкетану музейі, «Алматы облысының мемлекеттік архиві» коммуналдық мемлекеттік мекемесінің Кеген аудандық филиалы, «Алматы облысы Білім басқармасының Кеген ауданы бойынша білім бөлімі» мемлекеттік мекемесінің қызметкерлері қатысты. Қатысушылар бір мезгілде, бір мәтін негізінде диктант жазып, өз білімдерін сынап қана қоймай, ұлттық тілге деген шынайы құрметтерін білдірді.
Аталған шара – ұлт ұстазы Ахмет Байтұрсынұлының «Тілі жоғалған жұрттың өзі де жоғалады» деген өсиетіне негізделген идеяның жалғасы іспетті. Ахмет атамыз тек ағартушы емес, қазақ тіл білімінің негізін қалаушы, алғашқы әліпби реформаторы ретінде тіл мерекесінің мәнін терең түсіндіріп кеткен. Осы шара – сол ұлы мұраттың бір көрінісі. Тіл – ұлттың рухани өзегі, мәңгілік мұрасы. Бұл диктант – тек емле мен пунктуацияны тексеру ғана емес, тіл алдындағы азаматтық жауапкершілікті сезінудің нақты көрінісі болды.
«Ана тілін ардақтамайтын адам – ана сүтін ақтамаған ұлмен тең», «Қазақ тілі – халықтың жаны, рухы, жүрегі» деген Бауыржан Момышұлы мен Мұхтар Әуезовтың сөздері– тілдің тек қатынас құралы ғана емес, ұлттық болмыстың тірегі екенін тағы бір дәлелдеді.

Дариға ЖАЛЫНҚЫЗЫ,
Алматы облысының «Тіл» оқу- әдістемелік орталығы коммуналдық мемлекеттік мекемесінің Кеген аудандық
филиалының меңгерушісі.