Ел мен жердің ырысымен бірлігі, Ынтымақпен көгенделген тірлігі. Ақпараттың айдынында қалықтап, Жаңалықпен жетсін дәйім ізгі үні…

23

Басылымның бүгіні

Мектеп қабырғасында оқып жүргеннен қаламды жанына серік етіп, қара қылды қақ жарған журналист болуды арман еткем. Мектеп қабырғасында жүріп, редколльегия мүшесі болып, мектептік шағын газет жүргізіп, әзілі-шыны аралас өлең жолдарын өрбітіп, түрлі шараларды өрнектей жазып, газет бетіне түсіретінмін. Солай-солай шағын материалдарым аудандық, облыстық газеттердің бетінен көріне бастады. Сонда төбем көкке бірелі жетпей қалғаны. Сөйте жүріп ол кезде облыстық газет «Жетісу» газеті болатын. Мектепте оқи жүріп, «Жетісу» газетінің жас тілшісі атандым. Әр саны келген сайын дүйім ауыл газеттен жазған мақаламды оқи отырып, талабыңа нұр жаусын дейтін. Сол ізгі тілеудің, көптің батысы дарыды ма бүгінде журналистика саласында қанатымды кеңге жайып, ел мен жердің сырына қанығып қалам тартып келемін.

Анам марқұм математик еді. 40 жылдан аса математика пәнінен шәкірттеріне дәріс беріп, білім саласында  өзіндік орнын ойып тұрып қалдырған жан. Математика ғылымы тереңдікті, дәлдікті, шығармашылдықты меңзейтін үлкен ғылым. Анам ақынжанды болған еді. Сол бала күнімнен менің шыңдағысы келді ма, анам екеуіміз отыра қалып, қағаз бен қаламды қолымызға алып айтыс өнерін сахналап шумақтап өлең өретен едік. Мұғалімдіктің сара жолымен мені шыңдай отырып, анам қаламымды ұштаған алғашқы жанның бірі  болды. Жүрек тебіреніп, қалам ұшына ширатыла жазылған ойтолғамдарым мен түрлі тақырыпта тарқатылған мақалаларым газет бетінен түспеді. Кітап-журнал дегенді жата-жастана оқитынмын. Тіпті, оқыған кітаптарымды бастан аяқ әпке-сіңілілеріме бүкпесіз үтір-нүктесіне дейін баяндап беретінмін.  Алғаш оқуға қадам басқанымда да осы арманым адастырмай журналистика факультетіне оқуға түстім. Онда да қалам тарта жү ріп, өз білімімді мамандығым бойынша жетілдіре бердім. Оқи жүріп, 2008 жылы республикалық «Әділ қалам» байқауына қатысып, жүлделі бас жүлдені жеңіп алдым. Аталған университетте өзім сүйіп оқыған журналистика мамандығын қызыл дипломмен аяқтап, туған ауданым ол кезде Райымбек ауданына жол тарттым. Аудандық «Хантәңірі» газетіне келіп, 2010 жылы жұмысқа тілші болып орналастым.

Алғаш редакцияның табылдырығын аттап жұмысқа қабылданған кезім әлі есімде. Сол тұста бас редактор Шыңғыс Тұрысынов жылы шырай танытып, «Редакцияны жасартамын»,- деп жұмысқа қабылдады. Ол кезде редакция алқасы кілең үлкен кісілер болған еді. Жастарды жұмысқа тартып, шығармашылық ортаны жаңа буынмен толықтап, жастық леппен жаңартсам деген ниетте екен. Сонымен алғашқы жұмысым басталып кетті. Ол тұста редактордың орынбасары Нұрданбек Тоққожаев, жауапты хатшы Келеке Құсайынов, бөлім меңгерушісі Төлеген Баялиев, меншікті тілші Дүйсен Досымбаев, тілші Қанат Біржансал, фототілші Ғани Бейқұтбай, дизайнер Рыскүл Дүйсенбекова, теруші Гүлжан Ермекбаева, есепші Биғайша Ақшалова болатын. Осы кісілердің қатарына қосылып, шығармашыл ортаға еніп, жұмысқа кірісіп кеттім. Ауданның тыныс-тіршілігін газет бетіне түсіріп, елмен біте қайнасып, шығармашылық жолында еңбек еттік.

Еңбек ете жүріп, 2012-2013 жылдары редактор Шыңғыс Тұрсынұлының бастамасымен ұзақ жылдар жөндеу көрмеген қара шағырақтың ғимаратын мекеме қызметкерлерінің өз күшімен күрделі жөндеуден өткізіп, заман талабына сай жасақтадық. Шыңғыс Тұрсынұлының қолдауымен, ұйымдастыруымен шығармашыл редакция ұжымының туындыларын топтастыра отырып, «Аспантаулар аясында», «Айналайын, Атамекен ақ мекен!», «Қайран ерлер қаһарман ардагерлер» атты жыр жинақтары мен туындыларынан құралған басылым жарық көріп, өз оқырмандарына жол тартты.

Бертін келе редактордың сөзінің желісінде редакция жасара түсіп редакцияға тілші болып Серікжан Мурасилов, кейіннен корректор болып Нұргүл Мусаева, фототілші Қуаныш Нұрболатұлы жұмысқа қалданды. 2016 жылы Ғани Бейқұтбай редактор болып тағайындалып, редактордың орынбасары  Иемберді Тастанов, мен сол кезде жауапты хатшысы болып, жемісті қызмет атқардық. Тілші болып Жұмабек Тұрдиев, қоғамдық тілші Шеризат Мекебаев қызмет етті.  Сол тұстағы «Хантәңірі» газетіне есепші болып Айдана Құлманова, тілші Нұрболат Тастанқұлов, Дариға Жұмағалиева, хатшы кейіннен дизайнер болып Назира Балабек еңбек етті.

2018 жылы аудан екіге бөлініп, екі аудан өз кезегінде ақпарат құралдарын тарих қойнауынан зерделей келе қалпына келтірді. Сол тұста Кеген ауданына тиесілі «Қарқара» газеті қайта түледі.  «Қарқара» газетінің редакторы болып Нұрболат Тастанқұлов тағайындалды. Мен редактордың орынбасары, жауапты хатшы болдым. Меншікті тілші Қанат Біржансал, фототілші Ерғанат Әбдіреш болды. Жаңа құрылған аудан, өзіндік құрылымын әлі қалыптастырмаған кезең, біз үшін өте ауыр тиді. Себебі, редакция аты ғана қалып, іште газет құрылғылары тіпті, компьютердің жоқтығы жұмысымызды жалғастыруға қиындығын тудырды. Көршілес Райымбек ауданына барып, сол кезеңде әріптестеріміздің көмегіне жүгініп, газетімізді түнімен беттеп қайтатын едік. Редакцияға келісімен, өңдеп, редакциялап, беттелген газет беттерін баспаға дайындап, жөнелтетінбіз.

21 жыл бойы екі аудан бірігіп, бір аудан болған тұста өзіндік тарихын үзіп алған Кеген аудандық «Қарқара» газеті қайта түлеп, тұғырға қонды. Сөйтіп тарих бетінен қайта көрініс тапқан аудан айнасының алғашқы құрылымы тарихқа еніп, бүгінгі күнге дейін жұмысын жандандыру үстінде. Жаңа аяққа тұрған аудандық басылымның әр бетін әрлеп, жаңа талапқа сай көркемдеп дизайнер Назира Балабек екеуіміз күні-түні компьютердің бетіне үңіле отырып, жанымызды салатынбыз. Тіпті басылымның ел үшін жақсы дәрежеге көтеріліп, жарыққа шығу үшін де қызу талқыға түсіп, өз оймызды ортаға салып, үнемі  әр санын талапқа сай жаңартуға күш салатынбыз. Барынша еткен еңбегіміздің жемісін көрмекке, әр саны келген мезетте талқылайтынбыз. Тіпті жарты жылдан аса уақыт еңбекақы алмай, жанымызды шүберекке түйе отырып, еңбек еттік. Күн-түн демей барымызды газетке арнадық. 2019 жылы өз кезегінде жаңа ауданның жаңа басылымының 1 жылдығын атап өтіп, аудандық мәдениет үйінде үлкен көлемде салтанатты шара өткіздік. Деседе 1931 жылдан іргесі қаланған басылымның жаңа заманға 21 жылды артқа тастап түлегенін атап өтпекке бел байлап, жас тілшіден бастап кешегі тарихқа енген басылым қызметкерлері түгелімен дерлік шақыртылып, шығармашылық ортаның жаңа лебімен мерекелік шарамыз салтанат құрды. Тек ғимарат қана қалған аудан айнасының қайта түлеуі үшін де сол тұста аудан әкімдігі, ішкі саясат қол ұшын берді. Осы кезеңде бөлім меңгеруші Қанат Біржансал, тілші  Дариға Жұмағалиева, Әділет Чукенов, есепші Айдана Құлманова, фототілші Ерғанат Әбдіреш, офис менеджері Мира Мұраталиева еңбек етті. Ұйымшыл, талапшыл ұжымның әр күні ізденіспен, болашаққа деген үлкен сеніммен өтетін еді. 2020 жылы Мира Мұраталиева дизайнер болып, бүгінгі күнге дейін жұмысын жалғастыруда. 2021 жылы «Қарқара» газетіне редактор болып Ғани Бейқұтбай тағайындалды. 2018 жылдан бері бүгінгі күнге дейін «Қарқара» газетінде редактордың орынбасары, жауапты хатшы болып жемісті еңбек етіп келемін.

Ғасырды алқымдаған басылымның еліміз Тәуелсіздік алғаннан бері, өзім алғаш қара шаңыраққа аяқ басқаннан бүгінгі күнге дейін жүріп өткен өткелі осы. Десе де, өткеннің қойнауына сын сағаттап еніп жатқан аудандық басылымның әр сәті мен баспа басылымы қатталған тарих.

 

 

Лаура Мұхаметқали,

«Қарқара» газеті.