Ел мен жердің ырысымен бірлігі, Ынтымақпен көгенделген тірлігі. Ақпараттың айдынында қалықтап, Жаңалықпен жетсін дәйім ізгі үні…
![](https://qarqaragazeti.kz/wp-content/uploads/2024/07/IMG_0095-905x613.jpg)
Басылымның кешегісі
Кеген ауданы 1928 жылы құрылып, Кеген аудандық комунистік партиясының бірінші хатшысы Ораз Жандосов басшылық жасағанын білеміз. Ауданға үш жыл толғанда 1931 жылы Кеген аудандық «Екпінді малшы» атты газет дүниеге келген екен. Елдіктің ұраны болған алғашқы басылым «Екпінді малшы», бертін келе «Коммунизм нұры» газеті халықпен етене араласып елдіктің еңсесін көтеру бағытында қиын кезеңдерді бастан кеше жүріп, 1941 – 1945 жылдардағы Ұлы Отан соғысы тұсында өз жұмысын аталған басылым тоқтатпаған екен. Үлкендердің айтуы бойынша сол кезеңнің алғашқы редакторлары Тағаш Байжанов, Әбдімүтәліп Иманқұлов аталарымыз басқарғаны айтылады. Кеңес үкіметі кезінде газет аптасына «Коммунизм нұры» атауымен үш рет шығарылып, жарық көрді.
Мен 1985 жылы сәуір айында Кеген ауылында орналасқан «Коммунизм нұры» газетіне фототілші қызметіне орналастым. Ол уақытта Кеген аудандық партия комитетің бірінші хатшысы Зиядин Құрбанұлы Мыңбаев екен. Газет редакторы байырғы журналист Жолшы Бікебаев ағамыз еді. Мен ол уақытта жиырма үш жаста едім. Редакция табалдырығын жүрексініп аттап екінші қабатта орналасқан редактор кеңсесінің есігін қағып рұқсатынан кейін өзім жайлы Жолшы Бікебаев ағамызға өтінішімді жеткіздім. Мән жайды естігеннен кейін газет тілшілерін шақырып алып газет жұмысының оңай еместігін түсіндірді. Сол уақытта қаламы ұшқыр ағаларды көргенде жастығым ба екен кеудемді қорқыныш билеп, біраз үн қатпай қысылғанымды әлі күні есімнен шығармаймын. Байырғы журналистер Тұрысбек Жұмабеков, Келеке Құсайынов, Мұса Жанәділов, Нұрданбек Тоққожаев, Алтынхан Шыныбекова, Төлеген Баялиев, Кәдірбек Құныпияев, Советбек Дүйсенбаев, Нәби Рысбеков, Тұрықбай Бейсебаев, Ескермес Сәрсенбаев, газет корректоры Нұржамал Елубаева, хатшы Рысгүл Дүсенбекова, бухгалтер Бағдат Бұқабевалармен етене араласып алғаш еңбек жолымды бастаған едім.
Ол кезеңде бірінші қабатта орналасқан баспахана тынымсыз еңбек көрігін қыздырып жататын. Баспахана меңгерушісі Шаюп Авахреев, линотипис Рая Лиякова, Гүлсара Оразбаева, топтаушысы (наборщитса) Нұрғаным Оңғарова, Гүлғайша Айтжанова, печатник Берік Оңғарбекұлы аға – әкпеміз бірге еңбек еткенімді қалай ұмытайын. Уақыт өткен сайын көмескі іздей ұмытыла бастағаны өтірік емес. Кейіннен Кеңес үкіметі тараған уақыттан бері атауы өзгеріп «Қарқара газеті» болды. Қырық жылдай газет басылымын басқарған Жолшы Бікебаев ағамыздың мектебінен өткенімізді ешуақытта ұмыта алмаймыз. Көптеген жастар Жолшы ағамыздың шапанының етегінен шашыраған жалынды жастар екенімізді жасырған емеспіз. Кейінгі толқын журналистер Нұрлан Қалқаев, Ұлбосын Исабекова, Нұрбол Әлдібаевтар осы басылымның шәкірттері деуге әбден болады. Қазіргі таңда республикалық басылымдарда еңбек етіп жүргенін өздеріңізде көріп біліп жүрсіздер. Барлық әріптестеріме айтарым қаламдарың мұқалмай, ел бірлігімен ынтымағын бекем ұстап, атсалысып жүре беріңдер дегім келеді. Өткен ғасырдан бастау алып ғасырға жуықтаған төл басылымның қасықтап жинаған абыройын төгіп алмай, келер ұрпаққа аманаттау жастардың борышы деп білемін. Ұлт мақтанышы елдің данагөй қаһарманы Ахмет Байтұрсынов атамыз айтқандай «Газет- халықтың көзі, құлағы һәм тілі» – деп тектен текке айтылмаса керек.
Құрметті әріптестер! Төл мерекелерің құтты болсын, қаламдарың мұқалмасын, отбасы ошақ қасы амандығын тілеймін. Қой үстінде бозторғай жұмыртқалаған дәуірде ел бірлігі мен тыныштығын сақтау әр азаматтың парызы екенін ұмытпайық дегім келеді.
Журналистік сапарға жолға шығып қысты ң суығында, жаздың аптап ыстығын елемеген ерен еңбектерін ерлік деп санауға тұрарлық. Қаншама отбасын аудан айнасына шығарып қуанта білсек, ұрпағының мақтанышы бола білген еңбек майталмандары бұл басылымды еш уақытта ұмыта алмайды деп ойлаймын.
Қазақ атамыздың «Қуана білмегенге құт қонбайды» – деген аталы сөзі осы әр шаңырақтың берекесі мен мерекесіне рухани күш бола білді деп- аудан айнасын толық қанды айта аламын. Білім ошағы, денсаулық саласы және ауылшаруашылығы мен орман шаруашылығы қызметкерлерінің еңбектері басылым бетінде көрініс тапса, бұл да бір әріптестерімнің үлесі деп білемін.
Ел аман жұрт тыныш болып, бай қуатты өмір кешуге жазсын. Тәуелсіздігіміздің көк байрағы көкте желбіреп, абыройы арта берсін деген ізгі тілекпен өз сөзімді аяқтаймын.
Н.ТАСТАНҚҰЛОВ,
Суреттер Нұрболаттың
фото мұрағатынан алынды.