«ҰРПАҚТАР САБАҚТАСТЫҒЫ» ескерткіш монументі мен «ДАҢҚ» саябағы ашылды
2025 жылдың 19 шілде күні Жалаулы ауылында ауыл тұрғындарының демеушілігімен Ұлы Жеңістің 80 жылдығы мерекесі аясында саяси қуғын-сүргін құрбандары мен Ұлы Отан Соғысының ардагерлері, тыл және еңбек ардагерлеріне арналған Жалаулы ауылынан «ҰРПАҚТАР САБАҚТАСТЫҒЫ» ескерткіш монументі мен «ДАҢҚ» саябағы ашылды.
Іс-шараға жергілікті билік өкілдері, Ұлы Отан соғысы және еңбек ардагерлері, жастар ұйымдары, қоғам қайраткерлері мен ауыл тұрғындары қатысты.
«Ұрпақтар сабақтастығы» монументі ұлттың өткені мен бүгіні арасындағы байланыс пен рухани жалғастықты бейнелейтін маңызды символ. Бұл ескерткіш арқылы ата-баба аманаты мен тәуелсіздік жолындағы ерлік ұрпақ жадында мәңгі сақталады.
Даңқ саябағы — бұл тек демалыс орны ғана емес, сонымен қатар жас буынға патриоттық тәрбие беретін, ел тарихын таныстыратын рухани орта.
Саябақ алаңы— тыныштық пен тағзым кеңістігі.
Кең әрі көркем безендірілген алаң заманауи, сәулеті мен ұлттық рухты ұштастыра отырып жасалған. Мұнда: Тегіс көмкерілген жолдар саябақты әр тұстан еркін аралауға мүмкіндік береді.
Ескерткіш монумент – тарихты сөйлетіп, өткенге ой жүгіртеді.
Жасыл желекпен көмкерілген аллеялар мен гүлзарлар саябаққа ерекше тыныштық пен көркемдік береді.
Саябақ алаңы тек демалыс орны емес, рухани тәрбиенің, ұрпақтар арасындағы байланыстың және елге деген сүйіспеншіліктің символына айналды.
Ашылу салтанатына аудандық мәслихаттың төрағасы Нұғман Алмасбек Нөкербанұлы, Кеген ауданы әкімдігінің аппарат басшысы Бектенов Қанат Әуесханұлы, Республикалық композиторлар конкурсының бірнеше дүркін лауреаты, екі мәрте ГРАН ПРИ иегері, Қазақстан композиторлар одағының мүшесі, Қазақстанның еңбек сіңірген қайраткері Ермұрат Усенов, Алматы облысының және Кеген ауданының Құрметті азаматы, аудандық ардагерлер кеңесінің төрағасы Досымбеков Сабыр, Жалаулы ауылының түлегі, ҚР-ның Құрметті азаматы Жарқынбеков Сұлтан, Ұлтуған Данашовтар қатысты. «ҰРПАҚТАР САБАҚТАСТЫҒЫ» ескерткіш монументі мен «ДАҢҚ» саябағының ашылуына ерекше өз үлестерін қосқан бірқатар азаматтарды аудан әкімінің, аудандық мәслихаттың Алғыс хаты тапсырылды. Шара соңы ауданнан шыққан өнер майталмандары Қанат, Айткүл Құдайбергеновтер, Сұлушаш Нұрмағамбетова Құлжабайқызы, Әмір Жоламан т.б. өнер жұлдыздарының концертіне ұласты.
Өз тілшіміз.
