Мен әлемді бояймын

Бүгінгі күні тарихи және мәдени мұраны сақтауға, болашақ ұрпаққа насихаттау тұрғысында өзінің әлеуметтік миссиясын орындай келе маңызды мәдени білім беру және ашық қоғамдық институтқа айналған музейдің рөлі айтарлықтай өзгерді. Соңғы кезде музей тарихи және көркемдік құндылығы бар музей артефактілері мен жәдігерлерін толықтырып, сақтап қана қоймай, сонымен қатар әлеуметтік маңызды оқиғалардың белсенді нысанына, мектеп жасына дейінгі балалардан бастап аға буын тұлғаларға дейінгі түрлі санаттағы адамдардың түрлі іс – шараларда жүздесетін мәдени орталығына айналып отыр.

Кеген аудандық тарихи – өлкетану музейі келушілермен өзара әрекеттесудің түрлі нысандары мен тәсілдерін пайдалана отырып, өскелең ұрпақ арасында еліміздің тарихи мұрасын таныстыру, насихаттау бойынша жұмыстар жасап келеді. Музей өзінің тақырыптық мазмұны жағынан бірегей тарихи кезеңдер мен оқиғаларды қамти отырып, Қазақстанның ежелгі дәуірден қазіргі уақытқа дейінгі тарихы мен мәдениетін көрсетеді. Музей келушілерді тарихпен, археологиямен, этнографиямен танысуға, ауданымыздан шыққан ірі тұлғалар мен әртүрлі сала майталмандарының өмірі мен шығармашылығынан сыр шертетін экспозицияларды тамашалауға, экскурсия, көрме, лекция, әртүрлі қайырымдылық акцияларына қатысушы болуға мүмкіндіктер береді. Әлеуметтік қайырымдылық жобалар – музейдің келушілермен өзара іс-қимылының және ел мұрасы мен мәдени дәстүрлерді дәріптеудің бір түрі, музейдің түрлі әлеуметтік орталармен ынтымақтастық орнатудың жолы болып табылады. Әр адам қайталанбас тұлға болғандықтан қоршаған ортамен адамгершілік қарым- қатынас құру арқылы қоғамға бейімделуге құқылы. Осы жай ерекше күтімді қажет ететін балаларда жеткіліксіз болуы мүмкін. Мұндай кемшіліктердің алдын-алу мақсатында баланы білім беру ұйымдарына бейімдеудің, әлеуметтік ортаға үйретудің маңызы зор.
Кеген аудандық тарихи-өлкетану музейі мүмкіндігі шектеулі балаларды, аудандық әлеуметтік мекемелер – балаларды оңалту орталықтарының тәрбиеленушілерін қолдау мақсатында қайырымдылық іс-шараларын өткізуді дәстүрге айналдырған.
Жылдағы дәстүр бойынша Кеген аудандық тарихи – өлкетану музейінде мүмкіндігі шектеулі балаларға арналған «Мен әлемді бояймын» атты мәдени шара ұйымдастырылды. Балалар шара барысында музейдің экспозициялық залдарымен танысып, суреттер салып, түрлі түске бояу арқылы шығармашылық қабілеттерін көрсетті.

Индира Рамазанова,
Кеген аудандық тарихи-
өлкетану музейінің қызметкері.