Тау самалы

МЕН КЕГЕННЕНМІН

Мен Кегенненмін,
төріме шық, төрлеткін кеменгерім,
Жырын төкті, Мұқағали Мұқатайлар,
Тасқа басты өшпестей өлеңдерін.
Мен Кегенненмін,
ізін басып келеміз көнелердің,
Мұхтар жазып қалдырған Қилы заман,
Ілияс, Иса шырқаған өлеңдерін.
Мен Кегенненмін,
бабаларым Әлмерек, Шоған абыз.
Ақылымен өрнектеген өнерлерін,
Райымбек Жетен, Шормақ батыр,
ертеңі үшін еліне елеңдеген.
Мен Кегенненмін,
ынтымақ бірлігімен көгергенмін,
Жер бетінен орнатып жер ұйықты,
Жастарға рұх берген, қайрат берген.
Кептелмін, данамын, өнерлі елмін.
Баршаның алғысына бөленгенмін,
Айналайын туған жер алтын бесік,
Бар әлемнің бақытын сеннен көрдім,
Ауылым аспан таулар аясында.
Өзіңде бақ ырысқа кенелгенмін,
Мен Кегенненмін,
елім жайлы жақсы айтса елеңдеймін,
Бораны ем, соқса желі емделемін,
Жері жәннат, сұлу өлке жоқ қой мұндай.
Жер ұйық, өр Албаным , өнерлі елім.
Мен Кегенненмін!

Шап – шап қазақ

Желіге тарт, құлыныңды көгенде,
Тұлпар шығар, жылқыны көр түгенде.
Тайында үйрет, құнанында баптағын,
Аттың басын, жібер қазақ бөгелме.
Қымыз ішіп, қазы асаған салттары,
Буырсынған сәйгүліктен аттары.
Көкпар десе делебесі қозатын,
Өзі езеуреп, тұлпары тұр баптаулы.
Кісінеген айғырыңды аяла,
Жеміңді бер, суын шөбін аяма.
Жылқыменен мінезі ұқсас, жаны бір,
Жеңіс туын желбіретер күн алда.
Топ бәйгеде, аламанда шап қазақ,
Сынап көргін тұлпар сонда бапталад.
Тұлпарыңды аяласаң аямай,
Бар еңбегің сол жарыста ақталад.
Шап -шап қазақ аттың басын жібергін,
Ұран шақыр, қолдасын, елжіресін жүрегің.
Шап – шап қазақ, тұлпарыңның тұяғын,
Қамбар ата, Қамбар ата қолдасын!
От боп жанып, жалындасын жастарым.
Желмен жарыс, арындасын аттарың.
Шап -шап қазақ, аттың басын жібергін,
Намыс туын көкке көтер қазағым.
Көк таластыр, секірт атты тартынба,
Шәкіртің бар ат баптайтын артыңда.
Бабалардан қалған көне мұраны,
Айырбастап ала алмаймыз алтынға.
Шап – шап қазақ тұлпарыңның тұяғын,
Қамбар ата, Қамбар ата қолдасын!
2015ж

А… ға

Қызықты өткен күндерге,
Қараймын жаным армандай.
Айлы түн кеште сыр шерткен,
Сарытаудың жібек самалы – ай.
Жүруші едік армансыз,
Сырымыз таңға таусылмай.
Айтушы едік қосылып,
Сағындым сол бір даусыңды-ай.
Жастық шақ неткен қызық ед,
Әзілі қоса жүретін.
Күлетін едік бірігіп,
Дүрсілі қоштап жүректің.
Көрмесек тұрдық сағынып,
Жапанда жалғыз қалғандай.
Аулаңды аңдып алқынып,
Кіруге жүрдік бата алмай.
Бұлақтан тұнық су ішіп,
Күтуші едім сені мен.
Қайдасың сол бір ару қыз,
Кеттің бе әлде теңіңмен.
1985ж

Босқа өтпе өмірден

Масаттанып тапқанына мақтанып,
Жатады ылғи аппақ қардай ақталып.
Өзегінде тоң жатқанын білмейді,
Ойнап жүріп қалмаңдаршы от қарып.
Тәкапарлық тоқшылықтың тамыры,
Жасқанады жылы жүрек жаны ізгі.
Менменсіген мінезділер менсінбей,
Өшіреді артындағы бар ізді.
Жалқау қулар, жамандайды заманды,
Хайуанмен шатастырып наданды.
Одан биік тұратынын білмейді,
Жүрегінің аппақ мөлдір ар дағы.
Құсасың ба, тышасың ба шаруам жоқ,
Бұл жалғаннан босқа өткен адам көп.
Ақылдыдан ақымағы асып тұр,
Құрт – құмырсқа, түлкі жылан, шаян боп.
2007ж

Келте өмір

Өлшемі келте, бұл өмір шіркін аз ғана,
Ішіне үңіл, сыртына қарап мәз бол ма.
Аққу қонған көлге, қиқу сап қазда қонады,
Сайраны бірақ, суы қатпаған жаз ғана.
Сарыға бояп далаға мынау күз келіп,
Күз келді деп, үмітті бірақ үзбейік.
Жап – жасыл әлем неге бұлай болғанын,
Сырларын бүккен сыр сандықтан іздейік.
Жасыл жаз өмір, аз ғана сәтте өзгерді,
Қасарысып қатып, екпінге төтеп төзбеді.
Уақыттан күшті, мықтыны менде көрмедім,
Өшіріп өртеп өкшелеп арттан келеді.
Қаншама жандар, сырларын кетті аша алмай,
Қимайсың қайтем, арайлап атқан әр таңдай.
Қашсаңда қуып жетеді екен сұм ажал,
Ұмытпа ойлан, тәтті екен өмір қалқамай.
2014 ж

Мазар басында

Бұл арада сәбилер жатыр,
Ернінде сүті кеппеген.
Бұл арада арулар жатыр,
Гүл іздеп қырға беттеген.
Бұл арада жігіттер жатыр,
Ажалын алдан күтпеген.
Бұл арада аналар жатыр,
Шаруасы қалып бітпеген.
Бұл арада әкелер жатыр,
Жығылып жолда жүкпенен.
Бұл арада аталар жатыр,
Айтатын сыры бітпеген.
Бұл арада бабалар жатыр,
Сөз мәйегін түптеген.
Ақындар жатыр өлеңі қалып,
Іздесе таппас итпенен.
Тоң мойын тұр, қарнын қампайтып,
Мазарды таптап Джиппенен.
Кешегі бастық кімді іздеді екен,
таппай жүр,
Мен мынадан, надандық істі күтпеп ем.
2007ж

Бауырыма

Сенімен бұл өмірім жаз болады,
Көңілдің көліне кеп қаз қонады.
Қашанда бауыр деген тәтті екен -ау,
Жыр шумақ саған мынау аз болады.
Жек көрсін аялаған кім анасын,
Әкеден көп емеспіз сен дарасың.
Бауырым бұл өмірде сен аман бол,
Көгімде жарық жұлдыз сен ғанасың.
Ұмытқын елдің өсек сандырағын,
Сазды әуен саған арнап салдырамын.
Шалғай кетсең бауырым сағынамын,
Аман жүр қайда жүрсең тау қыраным.
2014 ж

Анаңды сыйла

Анаңды сыйла анаңды,
Жұлдызың сонда жанады.
Сыйлауды егер ұмытсаң,
Көктегі күнің мұнартып
Көктеген гүлің солады.
Анаңды сыйла анаңды,
Көңілі бір сәт алаңды.
Ойлаумен жүр ғой баланы,
Сезімін әр кез сезбесең,
Жап -жарық күнің қараңғы,
Анаңды сыла анаңды,
Толтырып нұрға санаңды.
Қуансаң қуат алады.
Сенсің ғой жалғыз арманы.
Анаңды сыла анаңды!
Әкелген талай дананы.
Кімгеде болса бұл парыз,
Бұдан жоқ басқа амалы,
Анаңды сыйла анаңды!