Кереге таулы Кеген өңірі таланттарға кенде болмаған, солардың бірі һәм бірегейі жетпіс жасқа толып отырған арынды ақын Шеризат Мекебаев.
Осыған орай, «Кітапхананың рухани әлемі» жобасы аясында Тасашы ауылдық кітапханасында ақынмен кездесу өттi. Мақсаты ақын Шеризат Мекебаевтың өмір жолы, еңбектерімен таныстыру. Жас ұрпақтарды еңбекті сүюге, кітапқа деген қызығушылықты арттыру. Өмірі өнегелі қаламгер Шеризат Сәрсенбайұлының өмір жолы мен еңбектерін дәріптеу.
Кездесуге ақынның жақын достары мен ақын өнерiн үлгi тұтатын оқырмандары қатысты. Басқосуда оқырмандар ақын Шеризат Сәрсенбайұлы шығармашылығы турасында әңгiме қозғады.
Ақын Шеризат Мекебаев өлең өлкесіне мектеп қабырғасында жүрген кезінен қалам тартып, оқырмандар көңілінен шыққан. Ол Қасиетті Қарасаз ауылында туып, өсті. Ақиық ақын Мұқағали Мақатаевтың жалынды жырларынан қуат алып, поэзия есігін айқара ашты. Шеризат Мекебаев поэзиясы таусылмас күш-қуатпен сарқырай ағар серпінді ырғаққа негізделген. Ақын шығармашылығы өзіндік ерекшелігімен, қаламгерлік шеберлігінің кемелдігімен таңдандырады. Қарасаздан түлеп ұшқан Шер ағамыз ақындық жолында оқырман қауымға жүректен шыққан жалынды жырларын ұсынды. «Жүрегімнің көзінен жас ағады», «Ол күндер оралмайды», «Қоңыр қаз», «Өмір деген…» сынды туындыларын атауға болады.
Мекебаев Шеризат Сәрсенбайұлы 1954 жылы 30 мамырда Алматы облысы, Райымбек (бұрын Нарынқол) ауданы, Қарасаз ауылында дүниеге келген. Сол кездегі Ф.Энгельс атындағы орта мектепте білім алды. 1972-1974 жылдарда Ресейдің Свердловск қаласында әскерлік борышын өтеді. Осы жылдарда орыстардан самбо күресін үйреніп, рота, полк, дивизия көлеміндегі жарыстарға қатысып, жүлделі орындарды иеленді. Естен кетпес ең бір бақытты күні, Новосибирск, Омск, Пенза қалаларындағы жарыстардан жүлделі орындарға ие болып, 1973 жылдың көктемінде Свердловск қаласында өткен дивизия біріншілігінде (57 кг) жеңімпаз болғаны үшін, қысқа мерзімді демалысқа жіберілген. Бұл орыс жерінде, көп ұлттың арасында жүрген ауыл баласы үшін үлкен қуаныш еді. Оның бойындағы күрескерлік қасиеттер оянып, қызығушылығы осы жылдардан басталды. 1974 жылы ауылда (ПМК) жұмыс істеді. 1975-1977 жылдары Алматы қаласында құрылысшы бола жүріп, Қазақтың дене шынықтыру және спорт институтының бапкерлері Металбек Болғанбаевпен Бақытжан Сырымбетовтың жетекшілігінде болды. 1976 жылы Циолковский қаласында өткен студенттердің Бүкіл Одақтық жарысында самбо күресінен спорт шеберлігіне кандидат нормасын орындады. 1978 жылы Нарынқол аудандық Балалар мен жас өспірімдер спорт мектебінде бапкер, 1979 жылы Қарасаз орта мектебінде мұғалім, 1980-1998 жылдары Кеген аудандық Балалар және жас өспірімдер спорт мектебінде тренер, 1998-2017 жылдары Кеген ауылындағы Өзек Жаңабаев атындағы орта мектебінде дене мәдениеті сабағынан мұғалім болды. Осы жылдарда дайындаған шәкірттері облыс, Республика, Азия және біреуі Әлем чемпионы атанып, ел мерейін үстем етті. Қазір зейнеткер.
Еркін форматта өткен кездесуде қаламгердің өмірі, шығармашылығы, руханият, қоғамдағы өзгерістер туралы көзқарасы, оқшау ойлары туралы сөз болды. Өткір тілмен кесіп айтатын ақынның дара мінезі, кейінгі буын жастарға деген берген бағасы қызықтырды. Кітапханашы болса, ақынның көпшілік біле бермейтін қырларын, шығармалары туралы әңгімеледі.
Әдебиет пен өнерге сусындаған мектеп оқушылары ақын өлеңдерінен үзінділерін оқып, өздерінің көкейкесті сұрақтарын қойып, пікір алмасты.
Кездесу соңында ұйымдастырушылар тарапынан ақынға құрмет көрсетіліп, Алғыс хат табысталды.
-Бүгін оқырмандармен бір тамаша кеш болды. Керемет әсердемін! Жан-жақты тыңғылықты дайындалған екен. Азғантай уақытқа созылған шара да шығармашылығымның басым бөлігін қамтыды. Әдебиетке уақыт бөліп жатқан жандарды қалай осыдан соң сыйламайсың?- деген Шеризат Мекебаев «Өмір деген» өлеңін оқып, көпшілікке ақ батасын берді.
Дәурен ЕРМЕКБАЙ,
Кеген ауылы.
