Еңбегі ерен ұстаз
Елдің еңбекпен көркейетінін ескерсек, еңбек адамының қоғамда қашанда орны ерекше, абыройы биік. «Елімізде еңбекқор адам, кәсіби маман ең сыйлы адам болуға тиіс. Осындай азаматтар мемлекетімізді дамытады. Біз қарапайым еңбек адамына құрмет көрсетуіміз керек», – деп Президентіміз Қасым-Жомарт Тоқаев атап өткендей, әрбір еңбек иесі мақтау мен құрметке лайықты жандар. Сондай құрметке лайықты жанның бірі – Әбділбаева Бинұр Меркібайқызы.
Зейнет жасқа жетіп қалыпсыз зымырап,
Бірақ қимыл әлі жастар шымыр — ақ.
Еңбегіңіз зейнет болсын ендігі,
Күндеріңіз мұң салмасын қырындап.
Талай күндер төккен термен өткен күн,
Қуаныштың нәрі көктен сепкен күн.
Талай жылдар тағылымы толысып,
Еңбектен соң зейнет келіп жеткен күн.
Еленді еңбек қуанышты бәріміз,
Зейнет жаспен құлпырады сәніңіз.
Жалынды жас кейпін әлі сақтапсыз,
Қуанышты ортақ кіші – кәріміз.
Осы жасқа жеткен де бар, жетпеген…
Жаратқанның нұры сізде көктеген.
Зейнет жастың бар қызығын көрсетсін,
Көңіл деген көркем кейіп көк дөнен.
Зейнет жас та құтты болсын ұстазым,
Мына өмірде көрдіңіз ғой талайын.
Қиын белдер артта қалып бақ келсін,
Шашыңыз ақ шалмасын самайын,- дей келе Кеген ауылының тұрғыны, Кеңес Нұрпейісов атындағы мектеп- лицейінде мектеп директорының оқу ісі жөніндегі орынбасары болып ұзақ жылдар бойы қызмет істеген, білікті ұстаз Әбділбаева Бинұр Меркібайқызын зейнеткерлік жасымен құттықтай отырып, ізгі тілек ниетімізді жеткіземіз.
Еңбегіңіз еленіп құрметті демалысқа шыққан күніңіз құтты болсын! Еткен еңбегіңізбен төккен теріңіз аз емес. Ендігі сол еңбектің зейнетін көріп, ауырмай – сырқамай немере, шөберенің ортасында аяулы әже деген атты иеленіп жүре беріңіз! Құрметті демалысыңыз 100 жасқа дейін ұлассын!
Еткен еңбектің еленгені кімге де болса қуаныш, көңілге үлкен медет! Қуанышыңыз құтты болсын! Еңбек демалысыңыздың әр күні шалқыған шаттыққа, отбасы – Отанда, балаларыңыздың ортасында балқыған бақытқа толсын! Өмір жолыңыз ұзақ болып, көрген бейнетіңіздің зейнеті жүз есе, мың есе болып денсаулық, бақыт, байлық алып келсін! Жапырағын жайған мәуелі бәйтеректей ғұмыр тілейміз!
Қызмет деген бір белестен өтіп, құрметті демалыс деген кезеңге жеттіңіз! Қуанышыңыз ұзағынан болсын! Ағайын – туыстың құрметіне, қосағыңыздың үлдесі мен мүлдесіне, немерелеріңіздің шу – күлкісіне, балапандарыңыздың жеңісті шақтарын көрген шаттықтың бақытты сәттеріне бөленген әдемі ғұмыр кешіңіз!
Әбділбаева Бинұр Меркібайқызы Алматы облысының білім басқармасы мемлекеттік мекемесінің Кеген ауданы «К.Нұрпейісұлы атындағы мектеп- лицей мектепке дейінгі шағын орталығымен және Түменбай бастауыш мектебімен» коммуналдық мемлекеттік мекемесінің мектеп директорының оқу ісі жөніндегі орынбасары, тарих және қоғамтану пәндерінің мұғалімі.
20.02.1963 жыл Алматы облысы, Кеген ауданы, Ұзынбұлақ ауылында дүниеге келген. Алматы қаласы Қазақтың С. М. Киров атындағы Мемлекеттік Университеті, тарих және қоғамтану пәндерін тәмамдаған.
Еңбек жолын 1985 жылы Алматы облысы, Кеген ауданы, Жылысай ауылындағы М.Горький атындағы орта мектебінің тарих және қоғамтану пәндерінің мұғалімі болып бастады. 1987- 1991 жылдар аралығында Кеген ауданының комсомол комитетінде мектеп бөлімінің нұсқаушысы, есеп сектор және ұйымдастыру бөлімінің меңгерушісі, аудандық косомол комитетінің ІІ хатшысы болып қызмет атқарды.
1991 жылдан аталған мектепте тарих пәнінің мұғалімі және 1995 жылдан директордың оқу жұмысы жөніндегі орынбасары қызметін атқарады. Алғыстар мен марапаттары 2013 жылы ҚР Білім және ғылым министрлігінің Құрмет грамотасы. 2017 жыл «PIaton» Халықаралық білім дамыту орталығы өткізген «Үздік тарих пәнінің мұғалімі», «Ұстаз мерейі төсбелгісімен» марапатталған. 2017 жылы Қазақстан педагогтар қауымдастығы «Білім беру ісіне қосқан үлесі үшін» төсбелгісі, 2018 жылы «Демеу» Алматы жергілікті кәсіподағы қоғамдық бірлестігінің білім беру жүйесіндегі еңбегі Құрмет грамотасы, 2020 жылы «Ұстаз тілегі» ғылыми-әдістемелік орталығының І дәрежелі дипломы және алғыс хаты, 2021 жылы ҚР ғылым комитетімен Ш.Уалиханов атындағы тарих және этнология институтының «Тарих ғылымының дамуына қосқан зор үлесі үшін» Алғыс хаты, 2021 жылы ҚР ғылым комитетімен Ш.Уалиханов атындағы тарих және этнология институтында өткен «Ж.Жабаев мұрасы және тарихи дәуір» тақырыбындағы республикалық дөңгелек үстелге қатысты, Сертификатқа ие болған.
2022 жылы ҚР Ақпарат және қоғамдық даму министрлігінің Алғыс хаты, 2022 жылы ҚР Оқу – ағарту министрлігі «Хабар» агенттігі «DARYN» теле-жобасының Алғыс хаты, 2023 жылы ҚР Оқу –ағарту министрлігі «Тарих ата» қашықтық олимпиадасының Алғыс хаты, 2023 жылы Дарын республикалық ғылыми педагогикалық орталығының Алғыс хаты, 2020 жылы Қазақ тарихы ғылыми- әдістемелік журналында «Ласко үңгірінің қабырғаларына адамдар неге сурет салды», 2020 жылы Педагогика әлемі журналында «К.Нұрпейіс» тақырыбында мақаласы жарық көрді, 2021 жылы «Ұстаз тілегі» сайтында «С.Датұлы ұлт- азаттық қозғалыс» тақырыбындағы мақалалары жарық көрген.
Алматы облысының білім басқармасы мемлекеттік мекемесінің Кеген ауданы «К.Нұрпейісұлы атындағы мектеп- лицей мектепке дейінгі шағын орталығымен және Түменбай бастауыш мектебімен» коммуналдық мемлекеттік мекемесі 2023 жылғы 21.06 № 9 хаттамасымен Оқу- ағарту министрінің «Орта білім беру iсiнiң үздiгi» Құрмет дипломымен марапатталды.
Адамның қоғам алдындағы азаматтық борышын атқарумен бірге, өзіне жүктелген жауапкершілікті орындап шығуы оның кісілік беделін қалыптастырып, іскерлігін шыңдайды десек, Бинұр Меркібайқызы өз қызметін адалдықпен, үлкен жауапкершілікпен атқарған кішіпейіл де қарапайым, ақкөңіл де көпшіл, адамгершілігі мол жанның бірі болған. Әріптестеріне сыйлы, шәкірттеріне үлгі боларлық жан.
39 жыл жемісті қызмет жасаған Бинұр Меркібайқызы К.Нұрпейісов атындағы мектеп- лицейінде талай шәкірттерді тәрбиелеп, білім нәрімен сусындатты.
Шынында да, мұғалімнің басты жетістігі – шәкірттерінің жеңісі. Әр ұстаз шәкірттерімен мақтанады. Жақсы ұстаз – бұл қай кезде де ең алдымен кәсіби деңгейі жоғары, шығармашылық қабілеті мол тұлға. Сондықтан ұстаздық жолына енді қадам басып жатқан жас ұстаздарға, шәкірттеріне шыдамды, төзімді, сабырлы болуға шақырады. Әсіресе мейірімді болу керек. Себебі қазіргі уақытта бала тұрмақ үлкендердің өзі мейірімге мұқтаж. Осы жолды таңдаған екенсіздер, өз ісіңізді шын жақсы көріңіз. Сонда ғана сізден тәлім-тәрбие алған шәкірттер – ұлтжанды, әділ, адал, еліміздің дамуына зор үлес қосатын мықты, таудай тұлғаға айналады,- деп ыстық ықыласын арнады Бинұр Меркібайқызы.
Ізгі тілекпен 2003 жылғы шәкірттері.
