Өмірі өнеге
Аталмыш айтар ой үлгі тұтарлықтай азамат Қыдыров Жақсылық Нұрмұханбетұлына арналады. Қыдыров Жақсылық Нұрмұханбетұлы 1954 жылдың мамыр айының 17 жұлдызында дүниеге келген. 1962 жылы Қарқара орта мектебінің бірінші сынып табалдырығын аттап, қатарластарынан қалмай оқып бітіреді. 1971 жылы 8 сыныпты тәмамдап, мектептен түлеп ұшып, Алматы қаласына оқуға түседі. Атап айтқанда, “Есеп-кредит” техникумының студенті атанады. 1973 жылы осы мамандықты ойдағыдай аяқтап, жас маман иесіне айналып, өзінің кіндік қаны тамған жеріне оралып, сол жылдың жүзінде “Қарқара ауыл советінде” есепші болып еңбек жолын бастайды.
1973 жылдың мамыр айында Кеңес Армиясы қатарына алынады. Отан алдындағы міндетті борышын өтеп, 1975 жылы елге қайта оралады.
Еңбек жолын әрмен қарай жалғап, 1975-1980 жылдары Кеген аудандық әлеуметтік-қамсыздандыру бөлімінің инспекторы, бас есепшісі болып қызмет атқарады. Бұл жерде қыруар жұмыс атқарып, елдің елеулісі, көптің үлгісіне айналады. “Еңбек түбі — береке” тәмсілін ұстанған Қыдыров Жақсылық 1980-1990 жылдары Ереуіл сүт кешенінің есепшісі, шаруашылық меңгерушісі болып жұмыс атқарады. Сүт кешенінің жалпы шығыны, пайдасы, есебімен айналысып, өз еліне пайдасын тигізу жолында өзінің дара жолын қалыптастырады.
Нар тұлғалы азаматтың сүйіп қосылған жары Қонақбаева Жұмабике Хасенқызы. Еңбек жолында табысқан қос тұлға 1978 жылдың шілде айында шаңырақ көтереді. Жұбайы жайлы айтар болсақ, 1955 жылы 18 қазанда дүниеге келген. Алғашқы еңбек жолын Қарқара ауылында сауыншы болып бастаған-ды. Ауыл шаруашылығының дамуына, тұрақты жұмыс істеуіне себепкер болған Жұмабике Хасенқызы 1982 жылдан Совхоз тарағанға дейінгі уақытта Ереуіл сүт кешеніндегі алдыңғы қатарлы сауыншы болған.
Қазіргі таңда, бес ұл, бес келіні бар, он тоғыз немеренің сүйікті ата-әжесі. Жәйма шуақты күндерін бір көріп, еңбегінің жемістерін жеп, жеке шаруашылығы бар алып зейнеткерлер.
Ұлдарын қанаттыға қақтырмай, тұмсықтыға шоқтырмай, үлгі-өнегемен тәрбиелеп, өз ортасына қосады. Қазіргі таңда, өз әкелеріндей Алматы қаласында жеке кәсіптерімен айналысады. Туған өлкесіне жиі көмектесіп, туған ауылынан ішкен суын әрдайым дәріптеп жүретін үлкен азаматтарға айналған. Көпке үлгі болған, азаматтардың еңбегі ел аузында! Атап айтқанда, ауыл мазарын қоршауға бір бас ірі қара беріп, былтырғы жылы Қарқара ауылдық мешітінде жылу батереяларын әкелген. Әлеуметтік жұмысқа белсенді қатысқан ұлдары ауыл азаматтарына үлгі болған, халықтың батасын алған ұлы азаматтар.
2022 жылдың жаз айында ұлдары мен келіндері әкесі мен анасына бес парыздың бірі болған — қажылық сапарына бару жолын қамтамасыз етіп, бар жағдайларын жасаған. Алланың назары түскен бұл әулет бес уақыт намазын оқып, асылдың сынығы, көптің көзі, халықтың сыйлысына айналған екі тұлғаның өмір жолынан алатын өнегеміз бөлек. Еңбек жолында жанкештілікке барып, өз өмір жолын елге қызмет етуге арнаған. Тәрбиелі ұл өсіріп, өнегелі келінді қызындай көріп, өз жетегіне қосқан. Шуақты күндерін бір көріп, немеренің балдай тәтті қылығына тоймай отырған екі кемелді тұлғаның өмірі баянды, ғұмырлы болсын!
Күләшхан ӘЛДІБАЕВА,
Қарқара ауылы.
