Ғасыр жасаған әже

Дала елінің өшпес мұрасын сақтап, ұрпағына дұрыс жолды меңзеп, рухани бай болуына әкесімен бірге септігін тигізетін жанның бірі- Ана. Ана -дүниедегі алақаны аялы, балаға деген мейірімі ерекше жан. Адамзат ел келешегін ойлауға міндетті десе, отбасының түтінін түтетер ұл мен қызға елін сүйетін, еліне қызмет ететіндей ұлттық құндылықтармен сусындатып өсіруді ата-ана міндетіне алған. «Көп білген кемеңгер емес, еліне пайда келтірер кемеңгер» – дегендей, бала тәрбиесінің салмағы ауыр болған.

Адам тәрбиесі бір отбасының емес, қоғамның міндеті, ендеше ұрпаққа рухани адамгершілік тәрбие беру мақсатында ауданның «Ішкі саясат бөлімі» мемлекеттік мекемесі мен аудандық Аналар кеңесінің ұйымдастыруымен республикалық «Мәдениетті ана- мәдениетті ұлт» жобасының «Еліне азамат тәрбиелеген отбасы» бағыты бойынша, Ұзынбұлақ ауылының «Ақ-Бастау» Мәдениет үйінде  «Өнегелі отбасының ұрпаққа айтары бар» атты 102 жасқа келген, жеті ұл, бес қызды өмірге әкеліп, тәрбиелеп, ұлын-ұяға, қызын-қияға қондырып, өсіп-өніп отырған  Шортанова Күлпара Жуашқызымен кездесу кеші болып өтті.

Айтулы шараға Кеген ауданының әкімі Теңізбаев Нұрбақыт Молдахметұлы, Алматы облысының аналар кеңесінің төрайымы Жошыбаева  Гүлнар Сағатқызы, аудандық ардагерлер кеңесінің төрағасы Сабыр Досымбеков, аудандық аналар кеңесінің төрайымы Көнеева Бақытгүл Демежанқызы,  Кеген ауданының «Ішкі саясат бөлімі» ММ-нің басшысы Қалқаев Еркінбек Нұрахметұлы, сонымен қатар, ауылдық округ аналар кеңесінің төрайымдарымен ауыл тұрғындары қатысты.

Аталған кеште ауылдық Мəдениет үйінің ішіне Күлпара әженің ұрпақтарының қолөнер көрмесі ұйымдастырылып, «Ғасыр жасаған әже» атты деректі фильмі көпшілік назарына ұсынылды. Жүргізушіліктің тізгінін белгілі ақын Аршын Нұрбақыт қолына алды. Алғашқы сөз кезегін алған аудан әкімі Нұрбақыт Теңізбаев:

-Қайырлы күн! Қадырменді қауым! Құрметті қонақтар! Қулық таудың бөктерінде орналасқан табиғаты әсем, таулы өлкеміз Ұзынбұлақ ауылына қош келдіңіздер! Бүгінгі ұйымдастырылып отырған «Өнегелі отбасының ұрпаққа айтары бар» атты 102 жасқа шыққан Күлпара апамызбен кездесу кешіміз құтты болсын! Мемлекет басшысы атап көрсеткендей «Өнегелі тәрбие беру- бәріміздің ортақ міндетіміз»- демекші арамыздағы қарияларымыз, апаларымыз жүзден асса да, ұрпақ алдындағы міндетінен жаңылған емес. Өмірден көріп-білген тәжірибелерін жас жеткіншектердің жүрегіне жеткізбек ниетте бір сәтке тыным таппай, әрбір жас ұрпақты имандылыққа, мейірім мен жауапкершілікке, отансүйгіштік, еңбекқорлық қасиеттерді дарытуға бар күш-қуаттарын аямауда. Еліміз салт-дәстүріміз бен жоралғымызды, тарихымызды тасқа қашап жазып, келер ұрпаққа аманаттап отырған.  «Өткеніңді білмей, болашаққа қол соза алмайсың!» демекші, бүгінгі «Өнегелі отбасының ұрпаққа айтары бар» шара аясында әжеміздің өнегелі өмірі сөз болмақ. Күлпара апамыз 12 баланы өмірге әкелген ардақты ана, 1958 жылы «Ана даңқы» орденімен, 1965 жылы «Батыр ана» медалдарымен марапатталған. Осы өмір жолында балаларын тәрбиелеумен бірге, жастарды да тәрбиелеуге белсене араласты. Ендеше, ұлт руханиятын дамытудағы осындай игі шараларымыз көптеп өтіп, өскелең ұрпақтың бойына сіңірудегі еңбектеріңіз еселене берсін! Күлпара апа, сізге деніңізге саулық, отбасыңызға амандық, бақ-береке тілеймін! Баршаңызға шаңырақтарыңызға шаттық, еңбектеріңізге жеміс, баянды бақыт тілеймін!-дей келе, Күлпара әженің иығына камзол жауып, сый-сияпат көрсетті.

Өз кезегінде сөз алған Алматы облысының аналар кеңесінің төрайымы Жошыбаева Гүлнар Сағатқызы  әжеміздің өнегелі өмірінен жастар ғибарат алу керек екендігін айтып, Күлпара Жуашқызына деніне саулық, отбасына амандық тіледі.

Аудандық ардагерлер кеңесінің төрағасы Сабыр Досымбековпен
Күлпара әженің көп жылдан бері араласқан көршісі Нұрипа Нұрғалиева әжеміз жайлы ойларымен бөлісті. Күлпара әженің шөбересі Исатай Шортанов ақын Қасым Аманжоловтың  «Дариға, сол қыз!» әнін орындаса, шөберелері: Кәусар, Інжу, Мұрагер, Іңкәр, Нартай, Жанайымдар «Шеше, сен бақыттысың!», «Біздің әже», «Өлеңмен өрнектеймін!», «Әже мен шөбере», «Қос ана» атты әжелеріне арнаған өлеңдерін оқып берді.

Күлпара әженің ұл-қыздары Марат Тақабаевпен Майданхан Тақабаева тәрбиелік құндылықтар, әже мен әке-шешенің тәрбиесін алған ұрпақтар сабақтастығы туралы сөз қозғап, көпшілікке жылы лебіздерін білдірді.

Шараны аудандық аналар кеңесінің төрайымы Бақытгүл Көнеева қорытындылап, жиын соңы ақын Ғафу Қайырбековтың «Ана туралы жыр» өлеңімен ұрпақтары Күлпара әжені ортаға алып ән шырқады.

Бүгінгі таңда алтын құрсақты әжеміз 39 немере, 73 шөбере, 7 шөпшек сүйіп отыр. Сонымен қатар, әжеміз «Азамат атын асқақтату- әйелдің ғана қолында» деген қағидадан бір сәтке де айнымапты. Ұрпақтары ақ әжелерінің тәрбиелеп өсірудегі еңбегін үнемі мақтан етіп айтып отырады. Осы ұл-қыздарынан тараған ұрпақтар еліміздің әр саласында қызмет етуде: 10- ұстаздық жолында, 7-мемлекеттік қызметте, 4-экономика саласында, 4-дәрігер, 2-инженер, 4-архитектор, 5-жеке кәсіпкер, 1-журналист, 1-ғылым кандидаты, енді бірі қорғаныс саласында қызмет жасауда.

Дәурен ЕРМЕКБАЙ