Сатыда бар Есбол есімді атамыз!
Саты ауылдық округы өзіндік ерекше қарқынмен дамып келеді. Туризмнің қайнар көзіне айналған бұл мекен, тұрғындардың туризм арқылы кәсіпкерліктің қыр-сырын меңгеруге толықтай мүмкіндік жасауда. Осындай «Ханбазардай» қайнап тұрған өмір ағысында адами құндылықтардың жойылып кетпеуі үшін еңбек ететін азаматтарда баршылық. Ұлтжандылық пен адами көзқарасты бірінші орынға қойған, Саты ауылының Ақсақалдар алқасының төрағасы Есбол ақсақал туралы әңгіме өрбітер болсақ, онда тек қана құндылықтарға тоқталарымыз сөзсіз. Азғантай ғана зейнетақыға қарап отырса да, ауылдың абыройын бірінші орынға қоятын ақсақалдың еңбегі орасан зор. «Отымен кіріп, күлімен шықты!» – дегендей, ауылдың мәдени шаралары да, той-томалақ, жиындары Есбол атасыз атқарылмайды. Округ әкімінің тікелей қолдаушысы да, бағыт көрсетушісі де осы қариямыз десек артық айтқандық болмайды. Ауыл халқының қыр-сырын толық білетін ақсақал ел азаматтарын дұрыс жолға бағыттауда үлкен жауапкершілікті өз мойнына арқалап жүр. Тіпті, заман талабына сай бизнеспен айналысып жатқан жұртшылықтың да адами құндылықтан аттап кетпеуін баста назарда ұстап, ел ішінде бастамашыл болып та жүр.
Өскелең ұрпақты тәрбиелеуде де атамыз орасан-зор жұмыстар атқаруда. Ауылдың тарихынан сыр шерткенде бір кісідей ұйып тыңдап қаласың. Бала күнінен бастап бір сәтте де ауылынан жырақтамаған, қарапайым жұмыстар істесе де ерекше ыждағаттылықпен атқарған атамыз бүгінде бүтін бір ауылдың ұйытқысы, ақылшысы, данасы болып отыр.
Қариялыққа қадам басқан, даналықты бойына сіңірген, жүрегі елім деп елжіреген Есбол Рысбайұлындай, жаныңда жүр жақсы адам.
Еліне жақсысын танытқан,
Алмасбек Нұғман – аудандық мәслихат төрағасы
