Шырғанақтың шырайын кіргізіп жүрген Ерлан аға!

Шырғанақта туып, мектеп табалдырығын сол ауылда аттап, үлкен өмірге де осы ауылдан қанат қаққан Саламатов Ерлан Дәукенұлы туралы айтар болсақ, біраз сырды ақтаруға болады екен. Барша достары мен сыныптастары қала жағалап кеткенде, «Алтын бесігі» ауылынынан бір сәтте де жырақтамай, кәсібін нәсіп қылып жүрген Ерлан аға бүгінде ауыл тынысының бір парасы деуге болады. Өз еңбегімен ауылшаруашылығының биігін бағындыра білген азамат, несібенің барлығы қайырымдылықта екендігін толықтай мойындаған. Ауыл азаматтарына көмек көрсетуде келіншегі Айна жеңгеймен бірлесіп, көрсеткен ықыластарын жария қылмауға тырысады. Балалардың мектепке даярлығына да ерекше мән беріп, мектептен арнайы тізім алып, қамқорлықтар жасайды. Аз қамтылған ауыл тұрғындарын азық-түлікпен толықтай қамтамасыз етіп отырады. Ұлттық құндылықтарды, тарихи мұраны насихаттау барысында да Бабалардың ұрпаққа үлгі болуын қамтамасыз ету мақсатында, Тоқан ата кешенді комплексін жасау үшін өзінің қожалығындағы жерден телімдеп бөліп беріп, игі бастамалардың басында жүрген жайы да бар. Жақын уақытта Кіші Қарқара елді мекенінің маңынан өзінің қаражатына саябақ салуды да жоспарлап отыр. Жомарттығы әр кез басымдықпен байқалатын абзал жан, отбасының ұйытқысы, ұлды-қызды ұрпақ тәрбиелеп отырған қамқоршы әке Ерлан ағамыз туралы қысқаша осылай әңгіме өрбітуге болады.

Байыппен еңбек етіп, Елінен қамқорлығын аямаған Ерлан Дәукенұлындай, жаныңда жүр жақсы адам.

Еліне жақсысын танытқан,

 Алмасбек Нұғман – аудандық мәслихат төрағасы