«Ауыл аманаты» жобасы жаңа мүмкіндіктерге жол ашады

52

Биыл Кеген ауданында «Ауыл аманаты» жобасы сәтті жүзеге асырылуда. Халықтың ауылда еңбек етіп, тұрақтауына, сондай-ақ жұмыссыздар санының азайып, тұрғындар табысының артуына зор серпін берген бұл бағдарлама өңірде ауыл шаруашылығы саласының дамуына да өз үлесін қосып келеді.
Өздеріңізге белгілі, «Ауыл аманаты» пилоттық жобасы алғаш рет 2019 жылы Жамбыл облысында пилоттық жоба түрінде бастау алған еді. Жобаның тиімді тұстары мен оны жүзеге асырудағы артықшылықтар, аудандағы көрсеткіштер орасан зор. «Ауыл аманаты» жобасын таныстыру үшін ауданда біраз жұмыстар жүргізілді. Тұрғындармен кездесулер өткізіліп, бағдарлама туралы түсіндірме жұмыстары жүргізілуде. Соның нәтижесі болар қазірдің өзінде жобаға қатысамын деушілердің саны күннен күнге артып келеді.
Жалпы, биыл республика бойынша ауылдарды дамытуға, оның ішінде осы «Ауыл аманаты» жобасын іске асыруға 100 миллиард теңге қаржы бөлінді. Соның есебінен ауылдарда кәсіпкерлік бастамаларды да іске асыру жоспарланды. Қазір «Ауыл Аманаты» бағдарламасы бойынша 212 жобаның құжаттары аудандық комиссияда қаралып, (1 млрд 498 млн. теңге) «Қонаев» әлеуметтік кәсіпкерлік корпорациясына жолданды. 40 кәсіпкер 320 млн 344 мың 500 теңге несиелерін алды, 37 жоба 361 млн 016,602 оң қорытынды алып, 135 жобалардың құжаттар пакеттері облыстық комиссияда қаралуда тұр. Бүгінде Кеген ауданында «Ауыл аманаты» бағдарламасына Кеген, Қарқара, Қарабұлақ, Тасашы, Жалаңаш, Шырғанақ ауылдық округтары қатысып жатыр.
Жалпы «Ауыл аманаты» жобасының ережелері мен тиімді тұстарына тоқталсақ, жалпы бұл бағдарламаға зейнеткерлер мен мемлекеттік қызметкерлерден басқа барлық ауыл тұрғындары қатыса алады. Жобаға қатысушыларға несие 2,5 пайыз жеңілдікпен беріледі. Бағдарлама шартына сәйкес бір тұрғынға берілетін несиенің мөлшері – 8 миллион 625 мың теңге. Бағдарламаға қатысатын кез келген тұрғын жеңілдікпен несие алу үшін жеке мүлкін кепілге қоюға тиіс. Қазір ауыл халқы тұрып жатқан үйлерін, техникаларын кепілге қойып, кәсіп ашу үшін несие алып жатыр. Бұл орайда жобаға қатысушыларға ешқандай шектеу жоқ. Сонымен қатар аталған несие ауылға қажетті шағын бизнестің түрлерін дамытуға берілуде. Атап айтсақ, жоба аясында тұрғындар 2,5 пайыз жеңілдікпен берілетін несиені шағын бизнестің 14 түріне рәсімдеп жатыр. Мысалы, олардың қатарында монша, тігін цехы, наубайхана, шаштараз және тағы басқа нысандар бар. Бағдарлама шартына сәйкес, несие азық-түлік дүкені мен такси қызметінен басқалардың бәріне беріледі. Сол себепті бұл бағдарламаның тиімділігі мол. Сөз соңында айта кетсек, Кеген ауданында ауылдардың жағдайын жақсарту, ауыл шаруашылығы, кәсіпкерлік салаларын дамыту бағытындағы жұмыстар жолға қойылған. 2023 жылдың желтоқсан айында «Кеген Мяспром» ЖШС-ін іске қосу жоспарланып отыр, сондай-ақ жоспарда 50 адамды жұмыспен қамтамасыз ету көзделуде. Сондай-ақ «Great Steppe Heritage» КТ- Бестөбе су қоймасында форель шаруашылығын құру бойынша жұмыстар жүргізілуде. Аталған шаруашылық 2023 жылдың қазан айында толықтай іске қосылады деп жоспарлануда. Бұл халықтың табысының артып жатқанын, тұрғындардың әлеуметтік жағдайы, тұрмысы түзелгенін көрсетеді. Жалпы, бүгінде ауданымызда тірлігі жарасқан, бірлігі берік, қаймағы бұзылмаған ауылдар көп. Оларда өте еңбекқор, ауызбіршілігі мықты азаматтар тұрады. Лайым, халқымыздың бірлігі мәңгі, еңбекке деген құлшынысы зор болсын! Еліміз аман болсын!

Шырын Мусақызы,
«Аманат» партиясы Кеген аудандық филиалының кеңесшісі.