Қымыз фестивалі

85

Кеген ауданы, Қарқара ауылына қарасты Қарқара жайлауында «Қымыз фестивалі» өтті. Әманда, қымызмұрындық бие байлап, алғашқы қымыз ішу рәсімі болса, аталған фестивалге аудан жұртшылығы ғана емес, облыс, республикада, тіпті шет елден де тамашалауға арнайы туристер келді. Жалпы аталған шара кең көлемді қамтыды. Ұлылығымызды ұлықтап, салт-сананы жаңғыртып, бойымызға рух пен күш-қуат беретін осы бір мерекеде, сан алуан өнер майталмандары ән шырқады. Ел мен жері үшін қызмет көрсетіп жүрген ел азаматтары арнайы мадақтамалармен марапатталды. Фестивалді тамашалауға келген әрбір көрермен ұлттық нақыштағы киім киюі шарт болды. Қазақ үй тігіліп, қазақы тағамдар дастархан төрінен орын алды. Қымыз сауым уақытта бие де сауылды, саумал да ішілді. Қазанда бауырсақ пісіріліп, көмбенің наны жабылды. Ұлттық ойындардан сайыстар өткізілді. Қошқар көтеру, гір көтеру, теңге ілу, қыз қуу, сондай-ақ елді елдең еткізетін дүбірлі дода бәйгені де жиылған жұрт тамсана тамашалады. Жалпы саны 2 500-ге жуық көрермен көрген дүбірлді додаға құнан бәйге бойынша 40, аламан бәйге бойынша 60 сәйгүлік бақ сынады. Жайлауда жалпы 40-қа жуық киіз үй тігілді. Оның жартысында салт-дәстүр мен ұлттық нақышымызды бейнелейтін көрме қойылғанын көз көрді. Тілге тиек ететін тағы бір жайт, аталған шара Алматы облысында алғаш рет ұйымдастырылды. Қарқара жайлауы молшылыққа кенелді. Бұдан бөлек «Агро тех сила» серіктестік мамандары, нақтырақ айтқанда инвесторлар өз өнімдерін таныстырды. Түйені шөгеріп, тең артудың амалдары да көрсетілді. Жалпы шараның басты мақсаты түрлі ұлт өкілдерінің бірлігін нығайту болып саналады. Аталған шара жыл сайын түрленіп, шетелдіктерді тартатын, кең ауқымды қамтитын шараға айналады деп сенеміз.
Әділет Чукенов,
Қарқара жайлауы.