АЛАМАН ДЕСЕ, ҚАН ҚЫЗАР
Кеген ауданының әкімдігі мен аудандық ат спорты федерациясының ұйымдастыруымен ат бәйгесінен жазғы маусымның ашылуына байланысты Кеген ауданының біріншілігі туын желбіретті. Осы күні ат бәйгесінен бөлек қыз қуу, теңге ілу сияқты ұлттық ат спортының ойындары өрнек тапты. Жарысқа бірнеше аудандардан жүзге тарта жүйріктердің қатысқанын орнымен айтуға болады. Бұл ат бәйгесі десе, елеңдемейтін қазақ жоқ. Аламан десе, қана қызбай тұрмайтын қазақ тағы да жоқ. Содан да болар, өңірде жалауын желбіреткен ат бәйгесін тамашалауға көп адам жиналды. Жарыстың салтанатты ашылысында Кеген ауданы әкімінің міндетін атқарушы Кеңес Қабылбеков баптаулы жүйріктеріне мініп, шешуші сәтті асыға күткен шабандоз балаларға, олардың иелері атбегілерге сәттілік тіледі.
Ең алғашқы тай жарысының қортындысы бойынша Райымбек ауданына қарасты Сарыбастау, Шәлкөде, Сарыжаз ауылынан қатысқан Айбек Батырбайдың, Ғалым Жусанбайдың, Марат Нұрмұхаммеддің тайлары алғашқы орындардан көрінді. Құнан жарысында Сарыжаз ауылынан келген Бақдәулет Сартаубай мен Миятбек Сұлтанбаевтың құнандары бірінші және екінші келді. Сарыбастау ауылынан қатысқан Олжас Жексенбаевтың құнаны 3 орынға ие болды. Жорға жарысында Сарыжаз ауылынан Қонысбай Рамазановтың, Шырғанақ ауылынан Алтай Әтікеевтің, Бөлексаз ауылынан Қажи Исайдың жорғалары алғашқы орындарды бөлісті. Топ бәйгеде Сарыжаз ауылынан Сәбит Қалимолдаевтың, Талас ауылынан Ералы Ғалымжанның, Сарыбастау ауылынан Жандос Асанұлының аттары жеңімпаз атанды. Көпшілікті елеңдеткен аламан бәйгенің қортындысы бойынша Кеген ауылының тұрғыны Самат Есбосынұлының жүйрігі бірінші болып келді. Оған 500 мың теңге қаржылай сыйлық берілді. Сарыжаз ауылынан Марат Ерліктің жүйрігі екінші болып мәре сызығын кесіп өтті. Жараулы тұлпар иесі 400 мың теңгенің сыйлығына ие болды. Бөлексаз ауылынан Ақаш Оңалбектің жүйрігі үшінші орынға ие болып, 300 мың теңге берілді. Кеген ауылынан Самат Есбосынұлының жүйрігі 4 орыннан, Кеген ауылының тұрғыны Сырым Сағымбековтың аты 5 орыннан көрінді. Оларға да қаржылай сыйлықтар тапсырылды. Теңге ілуде Ахмет Жасұлан, Ерсұлтан Әшімхан, қыз қууда Айбар Тобажан мен Аружан Ержанқызы, Зарина Ниязова мен Бақытжан Зұлқайнар мерейлі болды. Бәйге жеңімпаздары мен жүлдегерлері облыстық бұқаралық спорттық іс-шараларды өткізу орталығының арнайы кубоктары, медалдары, дипломдарымен марапатталды. Жекелеген бәйге жеңімпаздары Кеген аудандық бұқаралық спорттық іс-шараларды өткізу орталығының сыйлықтарына ие болды. Марапаттау рәсімін Кеген ауданы әкімінің орынбасары Мұхтар Батырханұлы, аудандық бұқаралық спорттық іс-шараларды өткізу орталығының директоры Гайдар Мұқанғожаев және Кеген ауданы ат спорты федерациясының президенті Әміре Қапабаев, Кеген ауданы көкпар командасының жетекшісі Аслан Әшімов жүргізді.
