Алматы облысында ұлттық спорт түрінен 1610 секция жұмыс істейді. Оларда 55 153 адам спортпен жүйелі түрде шұғылданады, бұл аймақтағы жалпы спортпен шұғылданушы халық санының 8,2%-ын қамтыйды,-деп мәлімдеді Алматы облысы дене шынықтыру және спорт басқармасының басшысы Нұрбақыт Теңізбаев.
Жетісу жерінде ұлттық спортты дамыту жолға қойылған. Облыстық дене шынықтыру және спорт басқармасының мұрындық болуымен дәстүрлі түрде «Жетісу бөрісі», «Райымбек батырдың жүлдесіне арналған республикалық турнирі», ұлттық ат спорты түрлерінен «Жеңіс күніне арналған жарыстар», «Жетісу жүйрігі», «ҚР Тұңғыш Президенті Елбасы Кубогы», саят ұлттық спорт түрлерінен «Сонар» республикалық жарыстары ұйымдастырылып келеді.
2021 жылы дәл осы спорт түрінен аймақта 30 облыстық, 9 республикалық, 1 халықаралық дәрежедегі жарыстар өткізілді. Биылда үрдісті жалғастыру көзделіп отыр. Айта кетейік, облыста ұлттық спортты дамытумен 4 мекеме айналысады.
Біріншісі, «Талдықорған қаласының ұлттық және ат спорты түрлерінен мамандандырылған балалар мен жасөспірімдер спорт мектебі» КММ-сі. Мұнда жастар «Көкпар», «Құсбегілік», «Аударыспақ», «Жамбы ату», «Асық», «Жекпе-жек», «Қазақ күресі», «Тоғызқұмалақ», «Бәйге» сынды ұлттық спорт түрінен жаттыға алады. Ұзын-саны 511 адамға 29 жаттықтырушы үйретеді.
Екінші кезекте, «Қапшағай қаласының ат спорты және қазіргі бессайыстан балалар мен жасөспірімдер спорт мектебі» КММ. Мектепте «Көкпар», «Жамбы ату» бойынша 207 адам дайындалады. Оларға 7 маман бағыт-бағдар беруде. «Қарасай ауданының Ұлттық ат спорты мектебі» КММ-де «Көкпар», «Жамбы ату», «Аударыспақ», «Теңге ілу», «Қазақ күресі», «Асық ату» мен «Тоғызқұмалақ» ойындарымен 333 баланың айналысуына мүмкіндік беріп отыр. Мұнда 14 тәжірибелі жан тәлім беруде. Сондай-ақ, Талғар ауданындағы «Облыстық ұлттық және ат спорт түрлері орталығында» 13 жаттықтырушы 120 адамды ұлттық спорт түрінен жаттықтырады.
Нұрбақыт Молдахметұлының айтуынша, ұлттық спортпен кәсіби айналысатын спортышыларды қолдау мақсатында облыстық бюджеттен үздік 30 спортшыға 100 000 – 180 000 тг. көлемінде ай сайынғы стипендия төленуде.
