Оспанжан Ақниет
Конституциялық реформа жөніндегі комиссияның кезекті отырысында айтылған ұсыныстарды еліміздің жастары зор қызығушылықпен әрі үлкен үмітпен қабылдады. Өйткені Конституцияда қабылданатын әрбір өзгеріс – бүгінгі ғана емес, ертеңгі ұрпақтың тағдырына тікелей әсер ететін маңызды шешім. Жастар үшін әділдікке негізделген, ашық әрі жауапты мемлекеттік басқару жүйесі – тұрақты дамудың басты кепілі.
Комиссия отырысында көтерілген адам құқықтары мен бостандықтарын кеңейту, заң үстемдігін күшейту, азаматтардың қоғамдық және саяси өмірге қатысу мүмкіндігін арттыру жөніндегі бастамалар жастардың негізгі сұранысына толық жауап береді. Қазіргі жастар өз пікірін ашық білдіре алатын, шешім қабылдау процесіне қатысатын, мүмкіндігі мен еңбегіне қарай бағаланатын қоғамда өмір сүргісі келеді.
Әсіресе, билік пен халық арасындағы кері байланысты күшейту, мемлекеттік органдардың ашықтығы мен есептілігін арттыру жөніндегі ұсыныстар жастардың сенімін нығайтады. Бұл – немқұрайлы емес, ел болашағына жауапкершілікпен қарайтын жаңа буынды қалыптастырудың маңызды алғышарты. Жастар үшін мемлекет тарапынан әділ талап пен тең мүмкіндік болуы – басты құндылық.
Конституциялық реформа жөніндегі комиссияның кезекті отырысында айтылған ұсыныстар еліміздің демократиялық дамуын жаңа деңгейге көтеруге бағытталған деп есептейміз. Бұл реформалар жастардың әлеуетін толық іске асыруға, олардың ел дамуына белсенді қатысуына мүмкіндік береді.
Оспанжан Ақниет
