Аудан әкімі Нұрбақыт Теңізбаевтың аудан халқын 16 желтоқсан – Тәуелсіздік күнімен құттықтауы

Құрметті де, қадірменді аудан тұрғындары!

Сіздерді ұлтымыздың ең ұлық мерекесі – Тәуелсіздік күнімен шын жүректен құттықтаймын!
1991 жылы Қазақстан өз тәуелсіздігін жариялап, ғасырлар бойы ата-бабамыз армандаған азаттықтың ақ таңына қол жеткізді. Осы қасиетті күн – еліміздің жаңа дәуірінің бастауы, ел тарихындағы ең маңызды оқиға ретінде жадымызда мәңгі сақталады.
Тәуелсіздік – тек еркіндік емес, ол – үлкен жауапкершілік. Бұл – елдің ертеңі үшін еңбек ету, бірлік пен татулықты сақтау, туған жердің гүлденуіне үлес қосу. Бүгінгі күні мемлекетіміздің әрбір жетістігі – халқымыздың бірлігінің, Елбасымыз бен Президентіміз ұстанған сарабдал саясаттың, ел азаматтарының еңбегінің жемісі.
Кеген ауданы да егемен еліміздің өсіп-өркендеуіне өз үлесін қосып келеді. Биылғы жыл– ауданымыз үшін табысты, жарқын жетістіктерге толы жыл болды. Ауыл шаруашылығы, кәсіпкерлік, білім, мәдениет, спорт салаларында оң өзгерістер байқалып, ауқымды жобалар іске асты. Жолдар жөнделіп, жаңа нысандар бой көтеріп, тұрғындардың әл-ауқаты артуда. Бұл – Сіздердің ортақ еңбектеріңіздің нәтижесі!
Алда да осы бірлігімізді, елге деген жанашырлығымызды сақтай отырып, Кегеннің келешегі үшін жұмыла еңбек етеміз деп сенемін. Тәуелсіздік күні – өткенге тағзым, болашаққа сенім ұялататын күн. Ендеше, елдік мүдде жолында бір болайық!
Баршаңызға мықты денсаулық, отбасыларыңызға амандық, шаңырақтарыңызға шаттық, өңірімізге береке мен өркендеу тілеймін!
Тәуелсіздігіміз тұғырлы, бірлігіміз берік болсын!