Профессор Нұрша Алжанбайқызы атындағы кабинет ашылды

Облыстық Білім басқармасы, «Облыстық әдістемелік орталығы» және аудандық Білім бөлімінің ұйымдастыруымен Бөлексаз ауылдық Мәдениет үйінде «Сатылай кешенді оқыту технологиясы» бойынша «Ұлттық құндылықтың қайнар көзі- ұрпақтар сабақтастығында» атты халықаралық ғылыми-тәжірбиелік семинар өтті.
Ұлттық құндылықтар- ел рухының тірегі. Әр ұлттың өзіндік болмысы, дүниетанымы мен рухани байлығы болатындығына ғылыми-тәжірбиелік семинардағы іс-шаралар арқылы көз жеткізуді мақсат еткен жиынға аудан әкімі Нұрбақыт Теңізбаев, Қырғыз мемлекетінен келген келген құрметті қонақтар Кыялбек Акматов, Жеңишбек Абдиназаров, Нурбек Жоошбаев, Астана қаласы «Әдістемелік орталығының» әдіскері Нұржамал Кәрімбердіқызы, облыстық «Әдістемелік орталығы» директорының орынбасары Гулина Оразәліқызы, «Өлке тынысы» ЖШС-нің директоры, ақын Кәдірбек Құныпияұлы, аудандық Білім бөлімінің басшысы Мұратжан Қожанұлы, Астана, Алматы, Қонаев қалаларынан және Алматы облысынан мектеп басшылары мен ұстаздар, сонымен қатар облыс аудандарындағы Әдістемелік кабинет меңгерушілері мен әдіскерлері қатысып, «Сатылай оқыту технологиясының» тиімділігіне айрықша тоқталды.
Оразақынова Нұрша Алжанбайқызы өзінің «Сатылай кешенді оқыту технологиясы» арқылы отандық педагогика ғылымын дамытуға өлшеусіз үлес қосқан тұлға. Өйткені, осыдан 30 жыл бұрын қолға алынып, еліміздегі жекелеген мектептерде эксперимент ретінде жүзеге аса бастаған бұл технология осы уақытқа дейін өзінің тиімділігін һәм өміршеңдігін дәлелдей білді.
-Бұл кішкентай ауыл болғанымен мұнда талантты балалар өте көп, сол талантты балалардың ары қарай сол білімін, ғылымын ұштау мақсатында жасалып жатқан үлкен шара,- дейді осы бастаманың негізінде тұрған тұлға қазақтың төл технологиясының авторы, ұлағатты ұстаз, ғалым, әдіскер Нұрша Алжанбайқызы.
Ол Алаш зиялыларының ағартушылық идеяларын негізге ала отырып, отыз жыл бұрын «Сатылай кешенді оқыту технологиясысын» ғылыми жүйеге түсіріп, еліміздің білім кеңістігіне енгізді. Бұл әдістеме бүгінде Қазақстанмен қатар, Қырғызстан мен Моңғолия мектептерінде де табысты қолданылып келеді. Алматы облысы бұл технологияны алғашқылардың бірі болып тәжірибеге енгізді. 2004 жылдан бастап бастауыш және қазақ тілі мұғалімдерімен бірлескен жүйелі жұмыс жүргізіліп, 2 мыңнан сатам педагог арнайы курстардан өтіп, сертификат алды. 2024 жылы ғана 113 мұғалім екінші деңгейлі біліктілікті арттыру курсын аяқтады.
Алғашқы құттықтау сөз кезегін алған аудан әкімі Нұрбақыт Теңізбаев:
-Мемлекет басшысы Қасымжомарт Кемелұлы өз сөзінде: «Ұлттық бірегейлікті сақтау- елдігіміздің өзегі» деп атап көрсеткен болатын. Сол себепті, біз дәстүрмен жаңашылдықты ұштастыра отырып, жас буынды елжандылыққа, еңбек сүйгіштікке, жауапкершілікке тәрбиелеуіміз қажет. Құрметті көпшілік! Педагогика ғылымдарының докторы, профессор, жерлесіміз Нұрша Алжанбайқызы бастамасымен туған жерімізге ұйымдастырып отырған үлкен шараға аудан халқы атынан баршаңызға алғысымды білдіремін,- дей келе ұлағаты ұстаз Нұрша Алжанбайқызына Алғыс хат табыстап, иығына камзол жауып, сый құрмет көрсетті.
Мұнан соң, Нұрша Алжанбайқызының ғылыми еңбек жолы туралы бейнебаян көпшілік назарына ұсынылды.
Облыстық «Әдістемелік орталығы» директорының орынбасары Гулина Оразәліқызы:
-Нұрша Алжанбайқызының «Сатылай оқыту технологиясы» көршілес Қырғызстан, Моңғолия жерінде ауқымды таралып, бүгінгі таңда кереметтей белестерді бағындырып жатқанына тағы да бір куә болып отырмыз. Ұрпаққа сапалы біліммен саналы тәрбие берудегі зор үлесіңіз, сондай-ақ педагогика ғылымының дамуына қосқан елеулі еңбегіңіз үшін алғыс білдіремін. Сіздің кәсіби біліктілігіңізбен ғылыми ізденістеріңіз, ұстаздық парасатыңыз және жастарды тәрбиелеуде жауапкершілігіңіз білім беру саласының дамуына зор үлес қосып келеді. Өз ісіңізге адалдығыңызбен қоғам алдындағы қызметіңіз әріптестеріңізге және шәкірттеріңізге үлгі болары сөзсіз- деді ол.
Тілші, ғалым бірнеше жылдан бері көршілес Қырғыз елімен Моңғолия және Өзбекстан мемлекетінің ғалымдарымен тығыз байланыста жұмыс істеп келеді.
-Нұрша апай қазақ еліне ғана емес, қырғыз еліне шексіз құрметі бар, біз сыйлаған, оқымысты апайымыз. 3-4 жылдың жүзі болды, «Сатылай оқыту технологиясы» Қырғызстандағы қырғыз тілімен әдебиетінің оқытуға, осы технологияны пайдалану бойынша «Жетіген» мектеп-лицейінде бір топ жұмыстарды жасап жатырмыз. Алдағы уақытта Қырғызстанның барлық мектептерінде технологияны енгізсек деген жоспарымыз бар,- деген педагогика ғылымдарының докторы, профессор Кыялбек Акматов Нұрша Алжанбайқызының иығына орамал жауып, алғысын білдірді. Қырғызстандық ғалымдар алдағы жылы мамыр айында Бішкекте Сатылай оқыту технологиясы бойынша Халықаралық олимпиада өтетінін айтып сүйіншіледі.
-Осы бастаманың баянды болуына тілектес болып келе жатқан азаматтармыз. Туған ауылымызда арнайы кабинет ашқалы жатыр дегенді естіп, қуандық. Кыялбек байкеміз бастап келіп отырған қырғыз бауырларымызға қош келдіңіздер деймін!- деген ақын Кәдірбек Құныпияұлы ұстаздардың газет оқу үрдісінен тежеліп қалғандығын тілге тиек етіп, газет-журналдан қол үзбеуді шақырды.
Мұнан кейін сөз алған аудандық «Қамқор-2» кәсіподақ ұйымының төрағасы Көпжасар Нұрлыбай ұлттық тәрбиені жақсарту, білім сапасын көтеру туралы ойларын айтып, көпшілікке ақ батасын берді. Кәсіподақ ұйымының атынан ұйымдастырушыларға 50 мың теңге қаржылай сыйлықты табыстады.
Білім сапасын арттыруға арналған іс-шара барысында Бөлексаз орта мектебінде белгілі тілші, ғалым, «Сатылай оқыту технологиясының» авторы, педагогика ғылымдарының докторы, профессор Нұрша Алжанбайқызы Оразахынова атындағы кабинет ашылды.
Тұсаукесер рәсімін профессор Нұрша Алжанбайқызы, қырғызстандық ғалым Кыялбек Акматов, ақын Кәдірбек Құныпияұлы, «Қамқор-2» кәсіподақ ұйымының төрағасы Көпжасар Нұрлыбайлар жасап, құтты болсын десті. Ақ жаулықты аналар шашу шашты.
Шарада ұлағатты ұстаздың әріптестері, аудандық Білім бөлімінің басшысы Мұратжан Қожанұлы, Ақтасты орта мектебінің директоры Қымбат Қамбарбекова естеліктермен бөлісті. Мектеп шәкірттері өнерлерін көрсетіп, ән шырқады.
Ғылыми-тәжірбиелік семинардың екінші кезеңі профессор Нұрша Алжанбайқызы атындағы кабинетте жалғасын тапты.
«Сатылай кешенді оқыту» технологиясының республика бойынша үйлестірушісі, модератор Айжамал Қожайханқызы семинарды ашып, жүргізіп отырды.
Астана қаласынан келген «Әдістемелік орталығының» әдіскері Нұржамал Кәрімбердіқызы «Профессор сабағы-сапалы білімнің көрсеткіші» тақырыбында сөз қозғаса, Алматы қаласы №174 мектеп-гимназиясының бастауыш сынып мұғалімі Зейнепхан Тұрсынбекқызы орыс тілді балалармен жұмыс, қала балаларының тілін жаттықтыру бойынша өз ойымен бөлісті. Облыстық әдістемелік орталығының бөлім басшысы Аян Сарсенбаева халықтың ең негізгі үштаған қасиеттері, балаларды үйретуге талпындыру жайында кеңесін берді. Астана қаласындағы Б.Майлин атындағы №52 мектеп-гимназиясының директоры Жәудір Бахтиярқызы, Жамбыл облысындағы Шайқорық орта мектебінің қазақ тілі мен әдебиеті пәнінің мұғалімі Алма Қалдарбекқызы «Сатылай кешенді оқыту» технологиясының мектеп тәжірбиесінде қалай жүзеге асып жатқандығы туралы өз ойларын ойталқыға салып, ақыл-кеңестерімен бөлісті.
-Білім шаңырағының төрінде осындай картина ілініп тұрса ,-деген қырғызстандық профессор Кыялбек Акматов Бөлексаз орта мектебінің директоры Әлия Халелқызына картина сыйға тарту етті.
Сондай-ақ бұл күні мұғалімдердің шеберлік сағаттарымен «Сатылай кешенді оқыту» технологиясының «Тілім менің-тірлігімнің айғағы» атты аймақтық ауызша командалық олимпиадасы өтті.
Өзінің жарты ғасырға жуық уақытын ұстаздық етуге арнаған профессор Нұрша Алжанбайқызының бастамасымен өткен ауызша командалық олимпиада оқушылармен мұғалімдердің кәсіби өсуіне үлкен серпін берді.
Халықаралық семинарда іс-тәжірбиесімен бөліскен бірқатар ұстаздар облыстық Білім басқармасының Алғыс хаттарымен марапатталса, білім алушылар бойына ұлттық құндылықтарды дарытып, шығармашылық идеялармен тәжірбие алмасуға белсене қатысқаны үшін барлық қатысушыларға «Облыстық әдістемелік орталығының» сертификаттары табысталды.
Технологияны тәжірбиеге енгізу бағытында өткізілген бұл халықаралық ғылыми-тәжірбиелік семинардың алыс-жақыннан келген ұлағатты ұстаздарға берері мол болды.

Дәурен ЕРМЕКБАЙ,
Кеген ауылы.