Ел қорғаны – ер азамат
Бөлімнің негізгі міндеттері мен бағыттары жайлы атап өтсеңіз?
Әлібек Серікқалиұлы: Бөлімнің негізгі міндеті– азаматтарды әскери есепке алу, әскерге шақыру жұмыстарын ұйымдастыру, әскерге дейінгі және әскерден кейінгі жастармен тәрбие жұмысын жүргізу. Сонымен қатар, әскери-патриоттық тәрбие, қорғаныс саласындағы мемлекеттік саясатты іске асыру, әскери міндеттілердің деректер базасын жаңарту және жергілікті қорғаныс іс-шараларын қамтамасыз ету бағытында қызмет атқарылады.
Аудан бойынша әскери есепке алу жұмыстары қалай жүргізіледі?
Әлібек Серікқалиұлы: Әскери есепке алу жұмыстары жыл сайын белгіленген жоспарға сәйкес жүргізіледі. Азаматтардың жеке деректері жаңартылып, тұрғылықты жері бойынша есепке қою және есептен шығару рәсімдері автоматтандырылған жүйе арқылы жүзеге асады. Бұл бағытта жергілікті әкімдік, білім беру ұйымдары және ішкі істер органдарымен өзара тығыз байланыс орнатылған.
Биылғы жылы әскерге қанша жас шақырылуда?
Әлібек Серікқалиұлы: 2025 жылы көктемгі және күзгі әскерге шақыру науқандары аясында аудан бойынша шамамен 218 жас азамат әскер қатарына шақырылуы жоспарланған. Қазақстан Республикасының Ұлттық Қауіпсіздік Комитеті Шекара қызметіне, Қарулы Күштердің құрлық әскерлері, Қазақстан Респуликасының Мемлекеттік күзет кызметі, Қазақстан Республикасының Төтенше жағдайлар Министірлігі, Қазақстан Республикасының Ұлттық Ұлан гвардия әскери бөлімдеріне жіберіледі.
Мектеп оқушылары арасында патриоттық тәрбие қалай жүргізілуде?
Әлібек Серікқалиұлы: Алғашқы әскери және технологиялық дайындық пәні бойынша практикалық сабақтар өткізіліп, оқушылардың әскери білімге деген қызығушылығы арттырылуда.
Жастарды Отан қорғауға ынталандыру бағытында қандай шаралар өтуде?
Әлібек Серікқалиұлы: Әскерде борышын өтеген азаматтардың табысты өмір жолдарын насихаттау арқылы жастарды ынталандыру шаралары жүйелі түрде жүргізілуде.
Қазіргі жастардың әскерге деген көзқарасы қандай?
Әлібек Серікқалиұлы: Соңғы жылдары жастардың әскерге деген көзқарасы айтарлықтай оң өзгерістерге ие болды. Көптеген жігіттер әскери борышын өтеуді азаматтық міндет және абырой деп санайды. Әскер қатарында болу– ерлік пен тәртіп мектебі екенін түсінетіндер саны артуда. Бұл бағыттағы ақпараттық-түсіндіру жұмыстары да өз әсерін тигізіп отыр.
Сіз басқарып отырған бөлімнің болашақтағы жоспарларына тоқталып өтсеңіз?
Әлібек Серікқалиұлы: Алдағы уақытта бөлім қызметін цифрландыру, әскерге шақыру және әскери есепке алу процесін жеңілдету жұмыстарын істеу көзделген. Сондай-ақ, патриоттық тәрбиені жаңа форматта – жастар фестивальдері, әскери ойындар және аймақтық сайыстар арқылы дамыту жоспарлануда.
