Жуырда 24 қазан– Кітапханашылар күніне орай Кеген ауданының әкімі Нұрбақыт Теңізбаев аудан кітапханашыларын арнайы қабылдап, кәсіби мерекелерімен құттықтады. Бұл күн – елдің рухани өміріне өлшеусіз үлес қосып жүрген, ұлт мәдениетінің шырақшылары саналатын кітапханашылардың еңбегі еленетін ерекше күн.
Аудан басшысы өз сөзінде кітапхана – тек білім ордасы ғана емес, ұлттың рухани қазынасы сақталған қасиетті мекен екенін атап өтті. Сонымен қатар Кеген ауданындағы кітапхана саласының тарихына, бүгінгі жетістіктеріне тоқтала келе, цифрландыру дәуірінде кітапханашылардың жаңа міндеттерге бейімделіп, оқырманмен жұмыс тәсілдерін жетілдіріп отырғанын да тілге тиек етті.
Мерекелік қабылдау барысында саланың үздіктері лайықты марапаттарға ие болды. Атап айтқанда, мәдениет саласының дамуына қосқан үлесі мен тынымсыз еңбегі үшін аудандық кітапхананың әдіскері Молдасанова Жібек ҚР Мәдениет және ақпарат министрлігінің “Құрмет” грамотасымен, аудандық кітапхана қызметкері Мырзахметова Магия – Қазақстандық салалық мәдениет, спорт, туризм және ақпарат қызметкерлерінің кәсіптік одағының “Еңбек даңқы” төсбелгісімен, Шырғанақ ауылдық кітапханасының кітапханашысы Кусайнова Дариға – ҚР Ұттық кітапханасының “Кітапхана ісінің үздігі”, Кеген ауылдық кітапханасының кітапханашысы Қуныпияева Айдана – ҚР Кітапханалар Одағының “Қазақстанның Құрметті кітапханашысы” төсбелгісімен марапатталды. Аудандық кітапхананың библиографы Дәулетбай Жаңылай, Қарқара ауылдық кітапханасының кітапханашысы Тұрсын Ақмарал “Алғыс хатпен” марапатталды.
Сондай-ақ, Ұзынбұлақ ауылдық кітапханасының кітапханашысы Күнесбай Зинагүлге, Саты ауылдық кітпханашы Нұржаубаева Лиза аудан әкімінің “Құрмет” грамотасы табысталды.
Мерекелік жиында сөз алған ардагер кітапханашы Гүлнар Бекбосынова әріптестерін кәсіби мерекемен құттықтап, рухани салада қызмет ету – үлкен жауапкершілік пен табандылықты талап ететін абыройлы іс екенін атап өтті.
Ең алғаш аудандық кітапхана 1928 жылы “Қарқара” аудандық кітапхана болып ашылған. 1979 жылы Кеген аудандық орталықтандырылған кітапхана жүйелі жолға қойылып, қайта құрылды. Бүгінгі таңда 97 жылдық тарихы бар кітапхана жетістіктерді еңсеріп келеді. Жалпы аудан бойынша 32 штаттық бірлікте 13 кітапхана аудан халқы үшін жұмыс істеуде. Үстіміздегі жыл бойынша кітапханаға 6862 оқырман тартылып, кітап қоры – 128 649 дананы құрайды. Қазақ тіліндегісі – 92 669.
Мерекелік қабылдау – кітапхана саласында еңбек етіп жүрген жандардың қоғамдағы мәртебесін арттырып, оларға деген құрметтің көрінісі болды. Бұл – руханият майданында еңбек етіп жүрген жандарға көрсетілген лайықты құрмет екенінде дау жоқ.
Лаура МҰХАМЕТҚАЛИ.
