Ұлттық ауыл шаруашылық санағы
2025 жылдың 1 тамызынан бастап елімізде әр он жылда бір рет өткізілетін маңызды мемлекеттік шара ұлттық ауыл шаруашылығы санағы жүргізілуде. Бұл- еліміздегі ауыл шаруашылығы саласының нақты жағдайын саралап, алдағы даму стратегияларын айқындауға арналған ауқымды науқан.
Осыған орай, Кеген ауданына арнайы іссапармен Қазақстан Республикасы Стратегиялық жоспарлау және реформалар агенттігі Ұлттық статистика бюросының Алматы облысы бойынша департаментінің басшысы Каргулов Бағлан келіп, аудан активімен кездесу өткізді.
Жиын барысында ауыл шаруашылығы санағының мақсаты мен міндеттері, оның маңыздылығы, өткізу тәртібі және жергілікті деңгейдегі ұйымдастыру жұмыстары талқыланды. Іс-шараға аудандық мекеме басшылары, ауылдық округ әкімдері, БАҚ өкілдері қатысты.
Басқосу барысында аудан бойынша ауыл шаруашылығы санағын жүргізу туралы іс-шаралар жоспары бекітілгені айтылып, осы уақытқа дейін комиссия төрт рет отырыс өткізіп дайындық жұмыстарын пысықтағаны атап өтілді.
Жиында Кеген аудандық статистика басқармасының басшысы Омархалықов Қайрат сөз алып, санақ жүргізудің барысы туралы баяндама жасады. Ол тұрғындармен түсіндіру жұмыстары, ақпарат жинау тәсілдері, цифрлық жүйелердің қолданылуы және жауапты мамандардың дайындығы жөнінде нақты мәліметтер берді.
Өз сөзінде Бағлан Каргулов Кеген ауданының санаққа дайындығын жоғары бағалап, ауданның алдыңғы қатарда келе жатқанын атап өтті.
Жиын соңында аудан әкімі Нұрбақыт Теңізбаев ауыл шаруашылығы санағының маңыздылығын ескере отырып, жауапты мамандарға нақты тапсырмалар жүктеді. Әкім деректердің сапалы және шынайы жиналуына, халықпен тығыз байланыс орнатуға және уақытылы есеп беруге баса назар аударуды тапсырды.
Ұлттық ауыл шаруашылығы санағы – елдің аграрлық саясатын дәл жоспарлау үшін қажет негізгі құрал. Бұл науқан – мемлекет үшін ғана емес, әрбір ауыл тұрғыны мен шаруа қожалығының болашағына ықпал ететін маңызды шара болмақ.
Лаура Қарасартова.
