Облысы әкімі Марат Сұлтанғазиев іс – сапармен келді
Лаура Мұхаметқали, Суреттерді түсірген: Мира МУРАТАЛИЕВА, «Қарқара» газеті.
Жуырда Алматы облысының әкімі Марат Сұлтанғазиев жұмыс сапарымен Кеген ауданына келді. Іс-сапар аясында өңір басшысы бірқатар маңызды нысандарды аралап, жергілікті халықпен кездесті.
Президен Қасым Жомарт Тоқаев “Табиғатты қорғау – баршамыздың ортақ парызымыз. Орман- еліміздің ең қымбат қазынасы, ол- халқымыздың байлығы”, – деген болатын. Осы орайда облыс әкімінің қолдауымен 414 милл теңге қаражат бөлініп, аудан көлемі 440,1 шаршы метр құрайтын екі қабатты кеңсе бой көтеріп, ел игілігіне пайдалануға берілмек.
Сапар барысында әкім жаңа бой көтерген Кеген орман шаруашылығы мекемесінің ашылу салтанатына қатысты. Нысанның лентасын қиып, салтанатты шарада сөз сөйлеген Марат Сұлтанғазиев барша ұжымды жаңа ғимараттың ашылуымен құттықтап, экологияны сақтау жолындағы жұмыстарына сәттілік тіледі. Сондай-ақ, Қарқара орманшылығының орманшысы Алпысбаев Ренат, орман шаруашылығының ардагері, Тоғызбұлақ ауылының тұрғыны Досайбеков Кенжебек ақсақал сөз сөйлеп, ізгі тілектерін білдірді.
Жаңа мекеме — орман қорын сақтау, экологияны қорғау және жасыл желектерді көбейту бағытында маңызды рөл атқаратын стратегиялық нысан. Ашылу барысында Марат Сұлтанғазиев орман шаруашылығы саласының маңыздылығына тоқталып, табиғатты қорғау- болашақ ұрпақ алдындағы жауапкершілік екенін атап өтті.
Табиғатты сақтау – тек бір саланың емес, барша қоғамның міндеті. Жаңа мекеме орман қорын тиімді басқаруға, өрт қауіпсіздігін күшейтуге және жасыл аймақ көлемін арттыруға үлкен үлес қосады, – деді облыс әкімі.
Салтанатты рәсімнен кейін әкім мекеме ішін аралап, қызметкерлермен тілдесті. Жергілікті тұрғындар мен сала мамандары да жаңа нысанның ашылуына ризашылықтарын білдіріп, бұл қадам экология мен жергілікті экономикаға оң әсер ететінін айтты.
Келесі бағыт – әлеуметтік осал топтағы отбасыларға арналған тұрғын үй құрылысы болды. Облыс әкімі құрылыс алаңын аралап, жұмыс барысын тексерді. Ол жауапты мердігерлерге үйлерді белгіленген мерзімде, сапалы әрі талапқа сай етіп тапсыруды міндеттеді.
Бұл үйлер – көмекке мұқтаж азаматтар үшін үлкен мүмкіндік. Үкімет тарапынан көрсетіліп жатқан қолдау халыққа дер кезінде жетуі керек. Сондықтан үйлердің сапасы мен уақытында тапсырылуы – басты назарда, – деді әкім.
Сапар аясында облыс әкімі Қазақстан мен Қырғызстан шекарасындағы өткізу бекетіне барып, ондағы жұмыс жағдайымен және жоспарлармен танысты. Бұл нысан шекаралық қауіпсіздік пен экономикалық қатынасты нығайтуда маңызды рөл атқарады.
Кейін Қарақара ауылындағы мәдениет үйінде облыс әкімі аудан тұрғындарымен кездесу өткізді. Кездесу барысында Марат Сұлтанғазиев өңірдің даму барысы жөнінде атқарылған жұмыстар және алдағы жоспарлар жайында баяндама жасап, халықтың сұрақтарына жауап берді.
Облыс әкімі Марат Елеусізұлы ең алдымен ел Президанті Қасым Жомар Тоқаевтың халыққа арнаған Жолдауына тоқталып өтті. Онда стратегиялық құжат еліміздің дамуын жасанды интеллектке негізделген жаңа кезеңге шығаруға бағытталған.
Президент бұл технологияны тек цифрландыру саласында ғана емес, ауыл шаруашылығында өнімділікті арттыру, өнеркәсіпте тиімділікті жоғарылату, медицина мен білім беруде сапаны жақсарту, мемлекеттік басқаруда ашықтықты қамтамасыз ету үшін қолдану қажеттігін атап өтті. Жалпы Жолдауда экономиканы әртараптандыру, кәсіпкерлікті қолдау, әлеуметтік әділеттілік, экология және өңірлерді теңгерімді мәселелері қамтылды, – деді.
Жалғасы 2-бетте.
Жалғасы. Басы 1-бетте.
Жиын барысында Кеген ауданының әкімі Нұрбақыт Теңізбаев 2025 жылдың алғашқы 7 айында атқарылған жұмыстар туралы есеп беріп, негізгі көрсеткіштерге тоқталды.
Тұрғындар тарапынан ауыз су мәселесі мен басқа да әлеуметтік сұрақтар көтеріліп, нақты жауаптар берілді. Облыс басшысы көтерілген мәселелердің назардан тыс қалмайтынын айтып, тиісті шешімдер қабылданатынын жеткізді.
Облыс әкімі іс сапар барысында Жалағаш ауылдық округіне ат басын бұрып, мәдениет үйінің жаңа ғимаратының ашылу салтанатына қатысты.
Жалағаш жерінде облыс әкімінің қолдауымен жаңа мәдениет үйі салынып, ел игілігіне пайдалануға берілді.
Салтанатты шараға Алматы облысының әкімі Сұлтанғазиев Марат Елеусізұлы, Алматы облысы мәслихатының төрағасы Байғожаев Қуат Сұлтанұлы, аудан әкімі Теңізбаев Нұрбақыт Молдахметұлы, облыстық басқарма басшылары, қоғамдық ұйым төрағалары мен БАҚ өкілдері, ардагерлер қатысты.
Алматы облысының әкімі Сұлтанғазиев Марат Елеусізұлы жаңа ғимараттың ашылу салтанатымен құттықтап, ғимараттың лентасын қиды.
Қазақстан Республикасының “Құрметті құрылысшысы, мұнайшысы”, Райымбек ауданының Құрметті азаматы, Жалағаш ауылының ақсақалы Жақашев Нұраш Бейсенбайұлына және Райымбек, Кеген ауданының Құрметті азаматы, Жалағаш ауылының ардагері Сыбанбаев Әріп ақсақал сөз сөйлеп, ақ батасын берді.
Сонымен қатар облыс әкімі Жалағаш орман шаруашылығына барып, тұқым бағын аралады.
Тұқымбақтың негізгі мақсаты орманды өсіру және молықтыру ,елді мекендерді көгалдандыру үшін екпе көшеттерін өсіруді көздейді.
Бүгінгі таңда Жалағаш ауылында орналасқан Жалаңаш орманшылығында базалық 54,0 гектар және Тұйық ауылында орналасқан Темірлік орманшылығында уақытша 5,4 гектар тұқымбақ бар.
Бұл тұқымбақтарда Шренк шыршасы мен басқа да ағаш тұқымдарының тұқымы себілген сеппелер өсіріліп күтіп баптау жұмыстары жүргізіп, 4 жылдан соң орманды алқаптардың орман көлемін көбейтуге жұмсалады.
Тұқымбақ екпе көшеттерін 5-6 реттік күтіп баптау жұмыстарында 18 маусымдық жұмыскер жұмыс істейді. Облыстық бюджеттен қаржыландыруға 18 млн 538 мың теңге қаражат бөлінген.
