Ұлттық қауіпсіздік комитетінің жаңа ғимараты пайдалануға берілді
Елдің тыныштығы мен қоғамның тұрақтылығы – мемлекет дамуының басты негіздерінің бірі. Тәуелсіздіктің тұғырын нығайтып, халықтың алаңсыз өмір сүруіне жағдай жасау жолында ұлттық қауіпсіздікті қамтамасыз ететін құрылымдардың орны ерекше. Осы жауапты міндетті абыроймен атқарып келе жатқан сала қызметкерлері үшін қолайлы жағдай қалыптастыру да маңызды. Осы бағыттағы игі қадамның бірі – аудан орталығындағы Қазақстан Республикасы Ұлттық қауіпсіздік комитеті Алматы облысы бойынша департаментінің Кеген аудандық бөлімінің жаңа ғимаратының салтанатты түрде ашылуы. Жаңа нысанның ашылу рәсіміне Алматы облысының әкімі Шыныс Сайранұлы Әрінов, Қазақстан Республикасы Ұлттық қауіпсіздік комитеті Алматы облысы бойынша департаментінің бастығы Рустам Жиянұлы Ибраев, ардагерлер кеңесінің төрағасы Шыңғыс Тұрсынов және шақырылған қонақтар қатысты. Салтанатты шара барысында жаңа ғимараттың кілті аудандық бөлім бастығы Ринат Уәлиханұлы Ажібаевқа табысталып, лента қию рәсімі өткізілді. Бұл – қызметтік міндеттерді сапалы орындауға қажетті жағдайларды жақсартуға бағытталған маңызды оқиға.
Жаңа ғимараттың пайдалануға берілуі ұлттық қауіпсіздік саласы қызметкерлерінің жұмысын тиімді ұйымдастыруға, қызметтік міндеттерді жүйелі атқаруға және ел қауіпсіздігін қамтамасыз ету бағытындағы жұмыстарды сапалы жүргізуге мүмкіндік береді. Заманауи талаптарға сай жабдықталған нысан қызметкерлердің күнделікті жұмысына қолайлы жағдай жасап, олардың жауапты қызметіне тың серпін бермек. Ұлттық қауіпсіздік – мемлекет тәуелсіздігінің берік тірегі. Елдің тыныштығын сақтау, қоғамдық тұрақтылықты қорғау және ұлттық мүддені қамтамасыз ету жолындағы қызмет үлкен жауапкершілікті, кәсібилікті әрі қырағылықты талап етеді. Сондықтан сала мамандарының тиімді жұмыс істеуіне жағдай жасау – ел қауіпсіздігін нығайтуға қосылған үлес.
Кеген ауданында жаңа ғимараттың ашылуы өңірдегі мемлекеттік құрылымдардың материалдық-техникалық мүмкіндіктерін жақсартуға бағытталған маңызды бастама болды. Жаңа нысан ел игілігіне қызмет етіп, қауіпсіздік саласы мамандарының жауапты жұмысына береке әкелсін!
Лаура Мұхаметқали
