Ет өңдеу комбинаты ашылды
Кеген өңірі – төрт түлігін түлетіп, мал шаруашылығын тіршілігінің тірегіне айналдырған берекелі өлке. Кең жайлауы мен шұрайлы жері, мал өсіруге қолайлы табиғаты ауданның ауыл шаруашылығы саласын дамытуға мол мүмкіндік береді. Осындай табиғи әлеуетті тиімді пайдаланып, ел игілігіне жарату жолында қолға алынған маңызды жобалардың бірі – «КегенМясПром» жауапкершілігі шектеулі серіктестігінің ет өңдеу комбинаты. Аудандағы жаңа өндіріс орнының салтанатты түрде ашылуы өңірдің экономикалық дамуына серпін беріп, жергілікті кәсіпкерліктің көкжиегін кеңейте түсетін елеулі оқиға болды.
Жаңа нысанның ашылу салтанатына Алматы облысының әкімі Шыныс Сайранұлы Әрінов, Кеген ауданының әкімі Танат Есенкелдіұлы Айдарбеков, Райымбек және Ұйғыр аудандарының әкімдері, «КегенМясПром» ЖШС директоры Светлана Владимировна Козубакова, сондай-ақ мекеме басшылары, кәсіпкерлер, шаруа қожалықтарының жетекшілері мен бұқаралық ақпарат құралдарының өкілдері қатысты.
Салтанатты жиында облыс әкімі Шыныс Сайранұлы Әрінов құттықтау сөз сөйлеп, жаңа өндіріс орнының аймақ экономикасын дамытудағы маңызына тоқталды. Мұндай кәсіпорындардың іске қосылуы ауыл шаруашылығы өнімдерін терең өңдеуге, өндірістік әлеуетті арттыруға және жергілікті жерлерде жаңа жұмыс орындарын ашуға мүмкіндік беретінін атап өтті.
Рәсімнің маңызды сәтінде құрметті қонақтардың қатысуымен комбинаттың ашылу лентасы қиылып, жаңа өндіріс орнының жұмысына ресми түрде жол ашылды. Бұл – ауданның өндірістік тынысына жаңа леп әкеліп, мал шаруашылығымен айналысатын шаруалардың еңбегіне тың мүмкіндік сыйлайтын қуанышты жаңалық.
Ет өңдеу комбинатының іске қосылуы, ең алдымен, ауыл шаруашылығы мен өндіріс арасындағы байланысты нығайтуға ықпал етеді. Мал өсірумен айналысатын шаруашылықтар үшін өнімді өткізу, оны өңдеу және нарыққа сапалы тауар ұсыну мәселесінің маңызы зор. Ал заманауи өндіріс орны осы бағыттағы жұмыстарды жүйелі жолға қоюға мүмкіндік береді. Өйткені мал шаруашылығының өркендеуі тек төрт түліктің санымен емес, одан алынатын өнімнің сапасы мен оны тиімді өңдеу ісімен де өлшенеді.
Ауылдың берекесі – еңбекте. Ал сол еңбектің нәтижесін еселеп, өнімді ел игілігіне жарату – уақыт талабы. Осы тұрғыдан алғанда, «КегенМясПром» комбинатының ашылуы жергілікті шаруашылықтардың дамуына, кәсіпкерлік бастамалардың жандануына және ауданның экономикалық мүмкіндіктерінің кеңеюіне жол ашатын маңызды қадам болып саналады.
Жаңа кәсіпорынның тағы бір маңызды қыры – халықты жұмыспен қамтуға ықпал етуі. Өндіріс орнының тұрақты жұмыс істеуі жаңа мамандарға сұраныс қалыптастырып, жергілікті тұрғындардың еңбек етуіне мүмкіндік береді. Сонымен қатар кәсіпорынның айналасында тасымалдау, өнім жеткізу және өзге де қызмет көрсету бағыттарының дамуына алғышарт жасалады. Мұның бәрі аудан экономикасының жандануына оң әсерін тигізері анық.
Кегеннің табиғи байлығы мен ауыл шаруашылығындағы әлеуетін тиімді пайдалану – өңірдің тұрақты дамуының маңызды шарты. Ендеше, жаңа өндіріс орнының жұмысы жолға қойылып, жергілікті шаруалардың өнімін өңдеу ісі кеңейе түссе, оның игілігін тұтас аудан халқы көрмек. Өнім өндіру мен оны өңдеуді қатар дамыту – ауыл экономикасын нығайтудың, еңбек адамдарының табысын арттырудың және отандық өндірісті өркендетудің тиімді жолы.
Туған жердің дамуына қызмет ететін әрбір игі бастаманың орны бөлек. «КегенМясПром» ет өңдеу комбинатының ашылуы да – ауданның өндірістік әлеуетін арттыруға бағытталған осындай маңызды жобалардың бірі. Жаңа кәсіпорынның жұмысы берекелі болып, өңірдің өркендеуіне, ауыл шаруашылығының дамуына және тұрғындардың әл-ауқатының артуына үлес қоса берсін!
Лаура Мұхаметқали
