Семинар кеңес өтті
Мемлекеттік қызметшілердің кәсіби біліктілігін арттыру, заң талаптарын мүлтіксіз сақтау және халықпен тиімді қарым-қатынас орнату – мемлекеттік басқару жүйесінің маңызды міндеттерінің бірі. Осы бағытта Кеген ауданында мемлекеттік қызметшілердің қатысуымен семинар-кеңес өтті.
Жиын аудан әкімінің орынбасары Кенес Күнесбайұлы Қабылбековтің төрағалығымен ұйымдастырылып, оған Қазақстан Республикасы Мемлекеттік қызмет істері агенттігінің Алматы облысы бойынша департаментінің басшысы Нұрсұлтан Ақылбекұлы Сейдалиев қатысты. Семинар-кеңеске аудан әкімінің орынбасары, аудан әкімі аппаратының басшысы, ауылдық округ әкімдері, басқарма және бөлім басшылары, мемлекеттік қызметшілер, сондай-ақ бұқаралық ақпарат құралдарының өкілдері қатысты.
Жиынның негізгі мақсаты– мемлекеттік қызмет саласындағы заңнамалық талаптарды кеңінен түсіндіру, қызметшілердің құқықтары мен міндеттерін нақтылау, сыбайлас жемқорлықтың алдын алу және оған жол бермеу, сондай-ақ мемлекеттік қызметшілердің Әдеп кодексінде белгіленген талаптар мен мінез-құлық нормаларын сақтау мәселелерін жан-жақты түсіндіру.
Мемлекеттік қызмет– елдің тұрақты дамуын қамтамасыз ететін маңызды институттардың бірі. Сондықтан мемлекеттік қызметшіге жүктелетін жауапкершілік те жоғары. Ол өз қызметінде заңдылықты, адалдықты, ашықтықты және кәсібилікті басшылыққа алуы тиіс. Семинар барысында Қазақстан Республикасының «Мемлекеттік қызмет туралы», «Сыбайлас жемқорлыққа қарсы іс-қимыл туралы» заңдарының негізгі нормаларына кеңінен тоқталды. Қолданыстағы заңнаманың талаптарын сақтау, қызметтік міндеттерді сапалы орындау, мемлекеттік қызметшінің құқықтары мен міндеттері, қызметтік тәртіпті сақтау мәселелері түсіндірілді. Мемлекеттік қызметші – мемлекет пен халық арасындағы байланысты қамтамасыз ететін негізгі буын. Сондықтан оның әрбір әрекеті қоғам назарында болады. Халыққа көрсетілетін мемлекеттік қызметтің сапасы, азаматтардың өтініштеріне уақытылы жауап беру, тұрғындармен әдепті әрі мәдениетті қарым-қатынас орнату – қызметтік міндеттің ажырамас бөлігі.
Осы орайда семинарда мемлекеттік қызметшілердің кәсіби әдебі мен қызметтік тәртіпті сақтауына ерекше мән берілді. Әдеп нормаларын сақтау тек белгіленген талаптарды орындаумен шектелмей, әрбір қызметшінің күнделікті жұмысындағы негізгі қағидаға айналуы қажеттігі айтылды. Жиын барысында мемлекеттік қызметшінің қоғам алдындағы жауапкершілігіне айрықша назар аударылды. Департамент басшысы Нұрсұлтан Ақылбекұлы Сейдалиев мемлекеттік қызметшілердің заң талаптарын мүлтіксіз орындауы, қызметтік әдеп қағидаларын ұстануы және өз міндеттеріне жауапкершілікпен қарауының маңыздылығын атап өтті. Мемлекеттік қызметтегі әдеп нормалары – азаматтардың мемлекеттік органдарға деген сенімін қалыптастыратын маңызды фактор. Қызметші өзінің лауазымдық өкілеттігін жеке мүддесіне пайдаланбай, мемлекет пен қоғам игілігі үшін адал қызмет етуі керек.
Сондай-ақ сыбайлас жемқорлықтың алдын алу, мүдделер қақтығысына жол бермеу, қызметтік өкілеттікті заң шеңберінде пайдалану және мемлекеттік қызметтің беделіне нұқсан келтіретін әрекеттерден аулақ болу мәселелері кеңінен сөз болды.
Қазіргі таңда қоғам мемлекеттік қызметтен ашықтықты, әділдікті және нақты нәтижені күтеді. Сондықтан әрбір мемлекеттік қызметші өз жұмысының ел алдындағы жауапкершілігін терең сезінуі қажет. Заңды білу – талап болса, оны бұлжытпай орындау – кәсіби міндет.
Семинар барысында мемлекеттік қызметшілердің тұрғындармен қарым-қатынас мәдениетіне де ерекше тоқталды. Азаматтардың өтініштері мен талап-тілектерін мұқият тыңдау, мәселелерін заң аясында шешуге ықпал ету, мемлекеттік қызмет көрсету сапасын арттыру – халықтың билікке деген сенімін нығайтудың маңызды тетігі. Мемлекеттік органның жұмысы қаншалықты ашық әрі тиімді болса, азаматтардың да мемлекеттік институттарға деген сенімі соншалықты жоғары болады. Осы тұрғыдан алғанда мемлекеттік қызметшіге қойылатын талап күннен-күнге артып келеді.
Жиынға қатысушылар өздерін толғандырған сауалдарын қойып, мамандардан нақты жауаптар алды. Сұрақ-жауап барысында мемлекеттік қызмет саласындағы өзекті мәселелер талқыланып, заңнамалық талаптарды іс жүзінде қолдануға қатысты түсініктемелер берілді.
Семинар-кеңес мемлекеттік қызметшілердің құқықтық сауаттылығын арттырып қана қоймай, олардың кәсіби жауапкершілігін күшейтуге бағытталған маңызды басқосу болды.
Заңға адалдық, елге қызмет ету, халықпен ашық әрі әділ қарым-қатынас орнату – мемлекеттік қызметшінің басты ұстанымы. Осындай талаптарды берік қалыптастыру арқылы ғана халықтың сеніміне ие, кәсіби әрі жауапты мемлекеттік қызмет жүйесін нығайтуға болады.
Лаура Қарасартова.
