Мен Құрылтай сайлауын елдің болашағына қатысты маңызды мәселе деп ойлаймын

Мен Құрылтай сайлауын елдің болашағына қатысты маңызды мәселе деп ойлаймын. Қоғамда болып жатқан өзгерістерге жастар да қызығушылық танытып, өз пікірін білдіріп отырғаны дұрыс. Себебі ертеңгі күннің қандай болатыны бүгінгі таңда жасалып жатқан жұмыстарға байланысты.

Жастар үшін ең бастысы – өз қабілетін көрсетуге мүмкіндік. Білім алып, еңбек ету, тұрақты жұмысқа орналасу, кәсіп бастау және туған жерде өз болашағын қалыптастыруға жағдай болғанын қалаймыз. Осындай мәселелерге назар аударылып, нақты жұмыстар жүргізілсе, жастардың елге деген сенімі де арта түседі.

Құрылтайда халықтың әртүрлі ұсыныстары ескеріліп, қоғамға пайдалы бастамалар жүзеге асады деп сенемін. Біз де өз кезегімізде тек талап етуші емес, елдің дамуына үлес қосатын азамат болуға тырысуымыз керек.

Мен үшін Отанға қызмет ету – үлкен сөздерден емес, күнделікті адал еңбектен басталады. Сондықтан әр жас өз ісіне жауапкершілікпен қарап, білім алып, еңбек етсе, бұл еліміздің болашағына қосылған нақты үлес деп есептеймін.

Талдыбек Қайнар