Мен елімізде өтетін Құрылтай сайлауын маңызды қоғамдық-саяси науқан деп есептеймін

Мен елімізде өтетін Құрылтай сайлауын маңызды қоғамдық-саяси науқан деп есептеймін. Бұл – қоғамдағы түрлі саланың өкілдері өз пікірін білдіріп, елдің дамуына қатысты ұсыныстарын ортаға салатын маңызды үдеріс. Құрылтайдың басты мақсаты – халықтың үнін естіп, қоғамдағы өзекті мәселелерді талқылау арқылы елдің тұрақты дамуына үлес қосу деп білемін.

Өмір бойы еңбек еткен адам ретінде еліміздің бірлігі мен тұрақтылығы бәрінен қымбат екенін жақсы түсінемін. Сондықтан Құрылтай құрамына халықтың сеніміне ие, елдің болашағын ойлайтын, ұлттық құндылықтарды дәріптейтін және қоғам игілігі үшін еңбек ететін азаматтардың сайланғанын қалаймын. Осындай азаматтар халықтың ұсыныстарын жеткізіп, елдің дамуына бағытталған бастамаларды қолдайды деп сенемін.

Әрбір азамат бұл маңызды науқанға бейжай қарамай, өзінің азаматтық ұстанымын білдіруі қажет. Өйткені еліміздің ертеңі – баршамызға ортақ жауапкершілік. Құрылтай жұмысы Қазақстанның одан әрі дамуына, халықтың әл-ауқатының артуына және қоғамдағы татулық пен келісімнің нығаюына өз үлесін қосады деп сенемін.

Сағымбекова Гаухар