«Мектепке жол» акциясы – мейірім мен қамқорлықтың жарқын көрінісі

Жаңа оқу жылы – әр бала үшін ерекше қуаныш пен жаңа үміттің бастауы. Мектеп табалдырығын аттап, білім әлеміне қадам басатын әр оқушының қажетті оқу құралдары түгел, көңілі көтеріңкі болғаны маңызды. Осы мақсатта елімізде дәстүрлі түрде ұйымдастырылып келе жатқан «Мектепке жол» республикалық қайырымдылық акциясы биыл да өз жалғасын табуда. 2026 жылы акция 1 тамыз бен 30 қыркүйек аралығында өткізіледі. Осы ізгі бастама аясында Тұйық орта мектебінде де «Мектепке жол» акциясы ұйымдастырылып, оқушыларға қолдау көрсету жұмыстары жүргізілді.
Акция барысында мектеп оқушыларына (мектеп формасы, мектеп сөмкесі, аяқ киім, оқу құралдары, кеңсе тауарлары және т.б.) табысталды. Балаларға жасалған бұл көмек – олардың жаңа оқу жылын жақсы көңіл-күймен бастап, мектепке алаңсыз келуіне үлкен қолдау болды. Жақсылық жасаған жандарға алғысымыз шексіз. Бұл игі істің жүзеге асуына өз үлесін қосып, 17 оқушыға мектеп сөмкесі мен оқу-құралдарын, кеңсе тауарларымен толыққанды қамтамасыз еткен ауылымыздан шыққан жеке кәсіпкер Т.Н есімді азамат, 2 оқушыға мектеп сөмкесі мен оқу-құралдарын берген аудандық мәслихат төрағасы Алмасбек Нөкербанұлы, акцияға атсалысқан ауылымыздағы жеке кәсіпкер Алия Майлыққызы, аналар кеңесінің төрағасы Сасыкова Науша апай және ауылымызда жаңадан шахта ашып, аймақтың экономикалық әлеуетін көтеруді қолға алған инвесторлар игі істің үлгісін көрсетті. Өндіріс ошағының басшылығы тек бизнес емес, әлеуметтік жауапкершілікке де үлкен мән беретінін дәлелдеп, мектебіміздің 10 оқушысын қыстық және күздік куртка, спорттық киім, аяқ киімдермен қамтамасыз етті, алдағы уақытта қосымша материалдық базаны нығайтуға үлес қоспақ.
Атсалысқан барша азаматтарға, инвесторлар Хуан Чжаньфа, Жанг Шуанмин мен «Слава Мунай Сервис» компаниясының директоры Мұратбек Зәруге Тұйық орта мектебінің ұжымы атынан шынайы алғысымызды білдіреміз.
Қайырымдылық – қоғамды біріктіретін ізгі қасиеттердің бірі. Өзгенің қуанышына себепші болу, балаларға қол ұшын созу – адамгершіліктің биік үлгісі. Демеушілеріміздің балаға деген жанашырлығы мен азаматтық жауапкершілігі– көпке үлгі. Олардың жасаған әрбір жақсылығы оқушылардың жүрегінде мейірімділік пен алғыс сезімін қалыптастырады.
«Мектепке жол» акциясы – бір реттік көмекпен шектелетін шара ғана емес. Бұл – балаға қамқорлық танытып, оның білім алуына жағдай жасауға бағытталған маңызды әлеуметтік бастама.
Ендеше, «Мектепке жол» акциясы аясындағы игі істер жалғасын тауып, әрбір балаға бақытты балалық шақ, сапалы білім және жарқын болашақ тілейміз!
Баланың қуанышы – елдің қуанышы. Оған жасалған әрбір қамқорлық – болашаққа жасалған жарқын қадам.

Т.Жанайдарова,
Тұйық орта мектебі директордың тәрбие ісі жөніндегі орынбасары.