Ел игілігіне ашылған қос медициналық пункт
Талды мен Жайдақбұлақта жаңа медициналық нысандар ел игілігіне берілді.
Халықтың әл-ауқаты мен тұрмыс сапасын айқындайтын маңызды көрсеткіштердің бірі – медициналық көмектің қолжетімділігі. Әсіресе ауыл тұрғындары үшін алғашқы медициналық-санитарлық көмектің дер кезінде көрсетілуі, қажетті қызметті шалғайға сабылмай, өз елді мекенінен алу мүмкіндігі – үлкен мәнге ие.
Осы ретте ауданда ауыл медицинасының материалдық-техникалық базасын нығайтуға бағытталған игі жұмыстар жалғасын тауып, Талды және Жайдақбұлақ ауылдарында жаңа медициналық пункттер ашылып, тұрғындар игілігіне пайдалануға берілді.
Екі ауылда қатар жүзеге асқан бұл бастама – елді мекендердің әлеуметтік инфрақұрылымын дамытуға, халықтың денсаулығын сақтауға және медициналық қызметтің сапасы мен қолжетімділігін арттыруға бағытталған нақты қадам.
Бой көтерген қос жаңа медициналық пункттің ашылуы тұрғындар үшін елеулі оқиға болды. Салтанатты шараға аудан әкімі Нұрбақыт Молдахметұлы, Кеген ауданының прокуроры Алмат Амитжанұлы Данилов, денсаулық сақтау саласының өкілдері, аудандық ардагерлер кеңесінің төрағасы Шыңғыс Тұрсынов, Талды ауылының ақсақалдар алқасының мүшесі Тамит Қиялов, медицина саласының ардагерлері, мекеме басшылары мен ауыл тұрғындары қатысты.
Жиында аудан әкімі Нұрбақыт Молдахметұлы жаңа нысанның ауыл халқы үшін маңыздылығына тоқталып, халық денсаулығын сақтау мен медициналық көмектің қолжетімділігін арттыру– ел дамуының маңызды бағыттарының бірі екенін атап өтті. Ал аудан прокуроры Алмат Амитжанұлы Данилов ауыл тұрғындарын жаңа медициналық пункттің ашылуымен құттықтап, игі бастаманың ел игілігіне қызмет етуіне тілектестік білдірді.
Салтанатты рәсім барысында жаңа нысанның кілті Кеген аудандық ауруханасының бас дәрігері Қуаныш Бөлегенұлы Байкубесовке табысталып, лента қиылды. Ақ жаулықты әжелер шашу шашып, ақсақалдар ақ батасын берді.
Талдыдағы игі бастама Жайдақбұлақ ауылында да жалғасын тапты. Мұнда да тұрғындар үшін аса қажетті әлеуметтік нысан– жаңа медициналық пункт салтанатты түрде ашылды.
Ақсақалдар ақ батасын беріп, медициналық пункттің лентасы қиылды. Салтанатты рәсім барысында ақ жаулықты әжелер шашу шашып, ауыл тұрғындары қуанышты сәтті бірге бөлісті.
Жаңа медициналық пункттің ішкі жұмысымен Кеген аудандық ауруханасының бас дәрігері Қуаныш Бөлегенұлы Байкубесов таныстырып, нысанның ауыл тұрғындарына көрсететін медициналық қызметінің маңыздылығына тоқталды. Талды мен Жайдақбұлақ ауылдарында жаңа медициналық пункттердің ашылуы – ауыл медицинасына көрсетілген қамқорлықтың нақты көрінісі. Қос нысан да тұрғындарға алғашқы медициналық-санитарлық көмекті жақындатып, медициналық қызметтің қолжетімділігін арттыруға мүмкіндік берері сөзсіз.
Талды мен Жайдақбұлақтағы қос медициналық пункттің ашылуы – елді мекендердің әлеуметтік әлеуетін арттырып қана қоймай, ауыл тұрғындарының ертеңгі күнге деген сенімін нығайтатын игілікті істің бірі.
Ел игілігіне ашылған жаңа нысандар халыққа сапалы қызмет көрсетіп, ауыл тұрғындарының алғысына бөлене берсін! Ақ халатты абзал жандардың еңбегі жемісті болып, қос ауылдың медициналық пункттері талай жанның денсаулығын сақтауға себепкер болғай дестік.
