Даладағы еңбек дүбірі
Жаз – жер төсін емген елдің еңбегі еселеніп, дала төсінің дүбірге бөленетін берекелі шағы. Көктемгі егіс науқанынан кейін шаруаның маңдай терін ақтар мезгілі – шөп шабу, мал азығын дайындау, піскен егінді ысырапсыз жинап алу кезеңі. Бұл – ауылдағы ағайынның бір жылдық еңбегінің нәтижесі таразыға түсетін жауапты уақыт.
Жазғы науқан қызу жүріп жатыр. Даланың әр қиырынан техниканың үні естіліп, шабылған шөптің жұпар иісі аңқып, егін алқаптарында орақ науқаны басталды. Таң сібірлеп атқаннан күн қызарып батқанға дейін тынымсыз еңбек еткен шаруалар үшін бұл күндер – нағыз сын сағаты. Өйткені уақытпен санасып, әрбір ашық күнді тиімді пайдалану – мол өнімнің негізгі кепілі.
Бүгінде аудан шаруалары алдына қойылған ауқымды міндеттерді орындау бағытында тізе қосып еңбек етуде.
Мал шаруашылығы – өңірдің негізгі бағыттардың бірі болып саналады. Сондықтан төрт түліктің қыстан қоңды шығуы үшін жаз айларында жеткілікті көлемде сапалы мал азығын дайындаудың маңызы зор.
Биыл аудан бойынша 267,5 мың тонна мал азығын дайындау жоспарланған. Қазіргі таңда оның 235,2 мың тоннасы дайындалып, жоспардың 88 пайызы орындалды. Бұл – дала еңбеккерлерінің тынымсыз тірлігінің нәтижесі.
Мал азығын дайындау жұмыстарына 148 ауыл шаруашылығы техникасы, 101 тырма, 130 косилка және 80 рулон жұмылдырылып отыр. Техникалардың жұмысы үйлестіріліп, шабылған шөпті жинау, тасымалдау және рулондау жұмыстары кезең- кезеңімен жүзеге асуда.
Биыл ауданда 8 750 гектар алқапқа дәнді дақылдар егілген. Қазіргі таңда оның 400 гектары орылып үлгерді. Алдағы уақытта егін жинау жұмыстарының қарқынын арттыру көзделіп отыр. Егін орағын белгіленген мерзімде әрі сапалы аяқтау үшін шаруалар қажетті техникаларды алдын ала қамдап, жұмыс күшін ұйымдастыруда. Науқанның уақытылы өтуі үшін төрт комбайнмен келісім жасалып, оның екеуі Кеген ауылында, біреуі Қарабұлақта, тағы біреуі Жалағаш ауылында жұмыстарын бастап кетті.
Қазір алқаптағы жұмыс таңның атысынан күннің батысына дейін жалғасуда. Диқандар уақыттың әр сәтін тиімді пайдалануға тырысады. Өйткені егіннің толық пісіп-жетілуі мен оны ысырапсыз жинап алу арасында санаулы ғана уақыт бар. Дала жұмысының өз тәртібі, өз ырғағы бар. Бір жерде комбайн егін орып жатса, енді бір жерде техника жиналған астықты тасымалдауға кіріседі. Шөп шабылған алқаптарда рулондар жиналып, қысқы мал азығы дайындалуда.Осындай сәтте шаруаның шеберлігі мен техниканың мүмкіндігі қатар сыналады. Уақыттың тығыздығы, ауа райының құбылмалылығы, техниканың үздіксіз жұмыс істеуі – бәрі де егін орағының нәтижесіне әсер ететін маңызды факторлар.
Кегеннің табиғаты қатаң болғанымен, оның жеріне еңбек сіңірген адам несібесін де молынан алады. Тау бөктеріндегі жайылым, жазықтағы егістік, шүйгін шабындық – бәрі де маңдай термен астасқанда ғана берекеге айналады.
Қазақ «Еңбек етсең ерінбей, тояды қарның тіленбей» деп бекер айтпаған. Даладағы бүгінгі еңбек – осы ұлағатты сөздің нақты көрінісі.
Мал азығын дайындау мен егін орағы – ауыл шаруашылығы үшін аса маңызды екі бағыт. Бірі – төрт түліктің қысқы азығын қамдаса, екіншісі – елдің астық қорын толықтырады. Екеуінің де түпкі мақсаты – ауылдың тұрақты дамуына, шаруаның тұрмысының жақсаруына, ел ырысының артуына қызмет ету.
Бүгінде Кеген даласында еңбек дүбірі естілуде. Бір алқапта шөп шабылып жатса, екінші жерде алтын дән жиналуда. Әрбір рулон шөп, әрбір орылған гектар – ертеңгі күнге жасалған қам.
Дала төсіндегі бүгінгі дүбір – ертеңгі берекенің бастауы. Әр гектардың артында маңдай тер, әрбір жиналған өнімнің артында тынымсыз еңбек бар. Ендеше Кегеннің кең даласында қазір жүріп жатқан жазғы науқан – ел ырысын еселейтін, ауылдың еңсесін көтеретін жауапты еңбек кезеңі.
Жерге дән сепкен диқанның үміті – мол өнім. Шөп шапқан шаруаның тілегі – төрт түліктің қыстан аман шығуы.
Жаздың әр күнін еңбекке арнаған шаруалар үшін бүгінгі дала дүбірі – ертеңгі молшылықтың жарқын нышаны десек артық айтқандық емес.
Лаура Қарасартова.
