Ата Заң – ұлттың бірлігі мен елдігіміздің тірегі

Ата Заң – ұлттың бірлігі мен елдігіміздің тірегі
Әрбір елдің ең басты байлығы – оның тәуелсіздігі, бірлігі және бейбіт өмірі. Осы құндылықтарды сақтап, мемлекеттің даму жолын айқындайтын негізгі құжат – Конституция. Ол қоғамның құқықтық негізін қалыптастырып қана қоймай, халықтың ортақ мақсаты мен болашаққа деген сенімін нығайтуға қызмет етеді.
Менің ойымша, жаңа Конституция жөніндегі қоғамдық талқылаулардың маңызы ерекше. Себебі елдің негізгі заңы – тек заңгерлер мен мемлекеттік қызметшілерге ғана қатысты құжат емес. Ол әрбір отбасының, әрбір азаматтың өмірімен тікелей байланысты. Сондықтан оның мазмұнын түсіну, негізгі қағидаттарын білу және қоғамдағы орнын бағалау баршамыз үшін маңызды.
Бүгінгі таңда елімізге білімді, еңбекқор, жауапкершілігі жоғары әрі отаншыл азаматтар қажет. Мемлекеттің қуаты тек табиғи байлығымен немесе экономикалық көрсеткіштерімен өлшенбейді. Оның басты күші – халқының бірлігінде, азаматтарының белсенділігінде және заңға деген құрметінде. Осы тұрғыдан алғанда, Конституцияда бекітілетін құндылықтардың күнделікті өмірде жүзеге асуы аса маңызды.
Әсіресе, ұрпақ тәрбиесіне ерекше көңіл бөлуіміз керек. Жастар елдің тарихын білуі, мемлекеттік рәміздерді құрметтеуі, ана тілін қадірлеуі және қоғам алдындағы жауапкершілігін сезінуі тиіс. Оларға отансүйгіштікті құр сөзбен емес, нақты іспен көрсету қажет. Өз еліне адал қызмет ету, сапалы білім алу, адал еңбек ету және қоғамдық тәртіпті сақтау – нағыз азаматтық ұстанымның белгісі.
Сонымен қатар, қоғамдағы бірлік пен келісімді сақтау – әрқайсымыздың міндетіміз. Түрлі көзқарас пен пікір болғанымен, ортақ мақсатымыз бір болуы керек. Ол – тәуелсіз Қазақстанның тұрақты дамуы, халықтың әл-ауқатының артуы және келешек ұрпаққа бейбіт, өркендеген ел қалдыру.
Конституцияның маңызын түсіндіру барысында азаматтардың ұсыныстары мен пікірлеріне де назар аударған жөн. Ашық пікір алмасу қоғамның құқықтық мәдениетін көтеріп, ортақ жауапкершілікті қалыптастырады. Өйткені мемлекет пен халықтың мүддесі өзара үйлескен кезде ғана ауқымды өзгерістер нәтижелі болады.
Конституция – елдігіміздің тұғыры, бірлігіміздің негізі және болашағымыздың бағдары. Оның қағидаттарын құрметтеу әр азаматтың күнделікті ісінен көрініс табуы қажет. Тәуелсіздігімізді бағалап, татулығымызды сақтап, заң үстемдігін қамтамасыз ету жолында бірлесе еңбек етсек, еліміздің келешегі кемел боларына сенім мол.
Құрман Ринат












